ଆଗରପଡ଼ା :ଭଦ୍ରକ ଜିଲ୍ଲାର ଅନ୍ୟତମ ଚର୍ଚ୍ଚିତ ଭଣ୍ଡାରିପୋଖରୀ ବିଧାନସଭା ନିର୍ବାଚନ ମଣ୍ଡଳୀରେ ବିଜେଡ଼ି,କଂଗ୍ରେସ ଓ ବିଜେପି ପରି ୩ପ୍ରମୁଖ ରାଜନୈତିକ ଦଳର ପ୍ରାର୍ଥୀମାନଙ୍କ ମଧ୍ୟରେ ଭୋଟିଂ ପୂର୍ବରୁ ପ୍ରତିଦ୍ୱନ୍ଦୀତା କ୍ରମଶଃ ତୀବ୍ର ହେବାରେ ଲାଗିଛି । ନିଜ ନିଜ ସପକ୍ଷରେ ଭୋଟ ହାସଲ ପାଇଁ ସବୁ ପ୍ରାର୍ଥୀ ପ୍ରାଣମୂର୍ଚ୍ଛା ଉଦ୍ୟମ ଜାରୀ ରଖିଛନ୍ତି । ପୂର୍ବ ନିର୍ବାଚନରେ ଲଗାତର ଭାବେ ୩ଥର ଏହି ଆସନ ବିଜେଡ଼ି କବ୍ଚାରେ ରହିଥିଲା । ଏଥର ମଧ୍ୟ ବିଜେଡ଼ି ପ୍ରାର୍ଥୀ ତଥା ଭଦ୍ରକ ବିଧାୟକ ସଂଜୀବ ମଲ୍ଲିକ ଏହି ଆସନରୁ ଜିତିବା ପାଇଁ ନିଜର ଅଭିଜ୍ଞତା ଓ ନବୀନ ହାୱାକୁ ପାଥେୟ କରି ଉଦ୍ୟମ ଆରମ୍ଭ କରିଛନ୍ତି । କଂଗ୍ରେସ ପ୍ରାର୍ଥୀ ତଥା ପ୍ରାକ୍ତନ ମନ୍ତ୍ରୀ ନିରଜଂନ ପଟ୍ଟନାୟକ ଗତ ନିର୍ବାଚନରେ ପ୍ରାର୍ଥୀ ବେଳେ ହୋଇଥିବା ତୃଟିକୁ ସୁଧାରି ଏହି ଆସନକୁ ହାତେଇବା ପାଇଁ ରଣକୌଶଳ ପ୍ରସ୍ତୁତ କରି ପ୍ରଚାର କାର୍ଯ୍ୟକୁ ଜୋରସୋରରେ ଚଳାଇଛନ୍ତି । ପ୍ରାକ୍ତନ ପ୍ରାଧ୍ୟାପକ ତଥା ବରିଷ୍ଠ ନାଟ୍ୟକାର ଡ଼ଃ ସୁଧାଂଶୁ ଶେଖର ନାୟକ ବିଜେପିରୁ ନୂତନଭାବେ ପ୍ରାର୍ଥୀ ହୋଇଥିଲେ ସୁଦ୍ଧା ତାଙ୍କର ବହୁ ବର୍ଷର ରାଜନୈତିକ ଅଭିଜ୍ଞତା ରହିଛି । ମୋଦୀ ଗ୍ୟାରେଣ୍ଟି ଓ ନିଜର ଅଭିଜ୍ଞତାକୁ ପାଥେୟ କରି ଅଧିକ ଭୋଟ ନିଜ ସପକ୍ଷରେ ହାସଲ ପାଇଁ ସେ ଗୋଟି ଚାଳନା କରୁଛନ୍ତି । ତେବେ ବିଭିନ୍ନ ଦୃଷ୍ଟିକୋଣରୁ ୩ପ୍ରାର୍ଥୀଙ୍କ ମଧ୍ୟରେ କାଣ୍ଟେକା ଟକ୍କର ଚାଲିଛି ।
