ପାଖେଇ ଆସିଲାଣି ଲୋକସଭା ନିର୍ବାଚନ। ସିଟ୍ ଭାଗବଣ୍ଟାକୁ ନେଇ ବିରୋଧୀଙ୍କ ଇଣ୍ଡିଆ ମେଣ୍ଟରେ ଜାରି ରହିଛି ଟଣାଓଟରା। ଇଣ୍ଡି ଆଲାଏନ୍ସର ସହଯୋଗୀ ଦଳ ରାଷ୍ଟ୍ରିୟ ଲୋକ ଦଳ (ଆରଏଲଡି) ଭାରତୀୟ ଜନତା ପାର୍ଟି (ବିଜେପି) ରେ ଯୋଗଦେବା ପରେ ପୁଣିଥରେ ଉତ୍ତରପ୍ରଦେଶରେ ଆସନ ଭାଗବଣ୍ଟା ଗଣିତ ବିଗିଡିଯାଇଛି। ଏହାରି ଭିତରେ କଂଗ୍ରେସକୁ ଅଲ୍ଟିମେଟମ ଦେଇଛି ସାମଜବାଦୀ ପାର୍ଟି। ଉତ୍ତରପ୍ରଦେଶରେ ଅଧିକ ସିଟ୍ ମାଗିଲେ ଇଣ୍ଡିଆ ସହ ମେଣ୍ଟ ହେବ ନାହିଁ ବୋଲି ରୋକଠୋକ ଶୁଣାଇ ଦେଇଛନ୍ତି ସପା ଅଧ୍ୟକ୍ଷ ଅଖିଳେଶ ସିଂହ ଯାଦବ।
ସୂତ୍ର ଅନୁଯାୟୀ ସମାଜବାଦୀ ପାର୍ଟି କଂଗ୍ରେସକୁ ଉତ୍ତରପ୍ରଦେଶରେ ୧୫ଟି ସିଟ୍ ଅଫର୍ କରିଛି। ଏହି ତାଲିକା ଧରାଇ ଏହା ତୁମର ଅନ୍ତିମ ତାଲିକା ବୋଲି କଂଗ୍ରେସକୁ କହିଛି ସପା। ଯଦି ଏହି ୧୫ଟି ଆସନକୁ ନେଇ କଂଗ୍ରେସ ରାଜ ହୁଏ ତେବେ ଉତ୍ତରପ୍ରଦେଶରେ ଇଣ୍ଡିଆ ଅଲାଏନ୍ସ ସହ ମେଣ୍ଟ ହେବ। ଯଦି କଂଗ୍ରେସ ଏହାଠାରୁ ଗୋଟିଏ ବି ସିଟ୍ ଅଧିକ ମାଗେ ତେବେ ସପା ଏହାକୁ ଗ୍ରହଣ କରିବ ନାହିଁ ବୋଲି କହିଛି।
ଏହି ୧୫ଟି ଆସନକୁ ନେଇ ସହମତି ଅଛି ନା ନାହିଁ ସେ ନେଇ ଆଜି ସମାଜବାଦୀ ପାର୍ଟିକୁ ଉତ୍ତର ଦେବ କଂଗ୍ରେସ। ସିଟ୍ ଭାଗବଣ୍ଟାକୁ ନେଇ ନିଷ୍ପତ୍ତି ହେବା ପରେ ହିଁ କଂଗ୍ରେସର ଭାରତ ଯୋଡୋ ନ୍ୟାୟ ଯାତ୍ରାରେ ଅଖିଳେଶ ସାମିଲ ହେବେ ବୋଲି କହିଛନ୍ତି।
ପୂର୍ବରୁ ଅଖିଳେଶ ରାଏବରେଲିରେ ନ୍ୟାୟ ଯାତ୍ରାରେ ସାମିଲ ହେବାକୁ ନେଇ କଂଗ୍ରେସ ମହାସଚିବ ଜୟରାମ ରମେଶ ସୂଚନା ଦେଇଥିଲେ। କିନ୍ତୁ ସିଟ୍ ଭାଗବଣ୍ଟା ଫାଇନାଲ ନ ହେବା ଯାଏ କଂଗ୍ରେସର କୌଣସି ବି କାର୍ଯ୍ୟକ୍ରମରେ ଅଖିଳେଶ ସାମିଲ ହେବେ ନାହିଁ ବୋଲି ସୂତ୍ରରୁ ସୂଚନା ମିଳିଛି।
ଉତ୍ତରପ୍ରଦେଶରେ କଂଗ୍ରେସକୁ ୧୧ଟି ସିଟ୍ ଦେବାକୁ ସମାଜବାଦୀ ପାର୍ଟି ପୂର୍ବରୁ ଘୋଷଣା କରିଥିଲା ଏବେ ସପା କଂଗ୍ରେସକୁ ୧୫ଟି ସିଟ୍ ଦେବାକୁ ରାଜି ହୋଇଛି। କିନ୍ତୁ କଂଗ୍ରେସ ୨୦ରୁ ୨୨ଟି ସିଟ୍ ଦାବି କରୁଛି। ସେଥିପାଇଁ ସିଟ୍ ଭାଗବଣ୍ଟାକୁ ନେଇ କୌଣସି ନିଷ୍କର୍ସ ବାହାରି ପାରୁନାହିଁ।
