ନୂଆଦିଲ୍ଲୀ: ଦେଶର ସର୍ବବୃହତ ଅର୍ଦ୍ଧସାମରିକ ବାହିନୀର କିଛି ମହିଳା ଯବାନଙ୍କ ଦ୍ୱାରା ସିଆରପିଏଫ ଡିଆଇଜିଙ୍କ ବିରୋଧରେ ଆସିଥିବା ଯୌନ ନିର୍ଯାତନା ଅଭିଯୋଗରେ କେନ୍ଦ୍ର ସରକାର ତାଙ୍କୁ ଚାକିରିରୁ ବହିଷ୍କାର କରିଛନ୍ତି। ସେଣ୍ଟ୍ରାଲ ରିଜର୍ଭ ପୁଲିସ ଫୋର୍ସ (ସିଆରପିଏଫ)ର ଡେପୁଟି ଇନ୍ସପେକ୍ଟର ଜେନେରାଲ (ଡିଆଇଜି) ତଥା ପୂର୍ବତନ କ୍ରୀଡ଼ା ଅଧିକାରୀ ଖଜାନ ସିଂହଙ୍କ ବିରୋଧରେ ମେ’ ୩୦ ତାରିଖରେ ରାଷ୍ଟ୍ରପତିଙ୍କ କାର୍ଯ୍ୟାଳୟ ପକ୍ଷରୁ ଚାକିରିରୁ ବହିଷ୍କାର ପାଇଁ ଆଦେଶ ଜାରି କରାଯାଇଥିଲା ଚାକିରିରୁ ବହିଷ୍କାର ମେ’ ୩୧ ତାରିଖରୁ ଲାଗୁ ହେବ ବୋଲି ନିର୍ଦ୍ଦେଶନାମାରେ କୁହାଯାଇଛି।
ଗତ କିଛି ମାସ ମଧ୍ୟରେ ସିଆରପିଏଫ ଏହି ଅଧିକାରୀଙ୍କୁ ଗୃହ ମନ୍ତ୍ରାଳୟ ଏବଂ କେନ୍ଦ୍ର ଲୋକସେବା ଆୟୋଗ (ୟୁପିଏସସି) ଦ୍ୱାରା ଅନୁମୋଦନ ପ୍ରାପ୍ତ ଦୁଇଟି କାରଣ ଦର୍ଶାଅ ନୋଟିସ ଜାରି କରିବା ପରେ ବହିଷ୍କାର ପାଇଁ ଏବେ ଚୂଡ଼ାନ୍ତ ଆଦେଶ ଆସିଛି।
ଅନ୍ୟପକ୍ଷରେ ଫୋର୍ସର ପଶ୍ଚିମ ସେକ୍ଟର ଅଧୀନରେ ନଭି ମୁମ୍ବାଇରେ ଅବସ୍ଥାପିତ ସିଂହ ଯୌନ ନିର୍ଯାତନା ଅଭିଯୋଗକୁ ଖଣ୍ଡନ କରିଛନ୍ତି ଏବଂ ଦାବି କରିଛନ୍ତି ଯେ ଏହା ସମ୍ପୂର୍ଣ୍ଣ ମିଥ୍ୟା ଏବଂ ତାଙ୍କ ‘ଭାବମୂର୍ତ୍ତି’କୁ ଖରାପ କରିବା ଉଦ୍ଦେଶ୍ୟରେ କରାଯାଇଛି।
କିଛି ବର୍ଷ ତଳେ ସିଆରପିଏଫ ଦ୍ୱାରା କରାଯାଇଥିବା ତଦନ୍ତରେ ଅଧିକାରୀଙ୍କୁ ନିର୍ଯାତନା ଅଭିଯୋଗରେ ଦୋଷୀ ସାବ୍ୟସ୍ତ କରାଯିବା ପରେ ଗୃହ ମନ୍ତ୍ରାଳୟ ୟୁପିଏସସିର ସୁପାରିସକୁ ଗ୍ରହଣ କରି ତାଙ୍କ ବିରୋଧରେ କାରଣ ଦର୍ଶାଅ ନୋଟିସ ଜାରି କରାଯାଇଥିଲା। ସିଆରପିଏଫ ମୁଖ୍ୟାଳୟ ପୂର୍ବରୁ ଏକ ଆଭ୍ୟନ୍ତରୀଣ କମିଟି ଦ୍ୱାରା ପ୍ରସ୍ତୁତ ତଦନ୍ତ ରିପୋର୍ଟକୁ ଗ୍ରହଣ କରି ଉପଯୁକ୍ତ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ୟୁପିଏସସି ଏବଂ ଗୃହ ମନ୍ତ୍ରାଳୟକୁ ପଠାଇଥିଲା।
ଏହି ଅଧିକାରୀ ଦୁଇଟି ମାମଲାରେ ଅଭିଯୋଗର ସମ୍ମୁଖୀନ ହୋଇଥିଲେ। ସେ ସିଆରପିଏଫର ମୁଖ୍ୟ କ୍ରୀଡ଼ା ଅଧିକାରୀ ଭାବରେ କାର୍ଯ୍ୟ କରିଛନ୍ତି ଏବଂ ୧୯୮୬ ସିଓଲ ଏସୀୟ କ୍ରୀଡ଼ାରେ ୨୦୦ ମିଟର ବଟରଫ୍ଲାଇ ଇଭେଣ୍ଟରେ ରୌପ୍ୟ ପଦକ ଜିତିଥିଲେ, ଯାହା କି ୧୯୯୧ ସଂସ୍କରଣ ପରେ ଟୁର୍ଣ୍ଣାମେଣ୍ଟରେ ସନ୍ତରଣରେ ଭାରତର ପ୍ରଥମ ପଦକ ଥିଲା।
ପାଖାପାଖି ୩.୨୫ ଲକ୍ଷ ଯବାନ ବିଶିଷ୍ଟ ସିଆରପିଏଫ ୧୯୮୬ ମସିହାରେ ପ୍ରଥମ ଥର ପାଇଁ ମହିଳାମାନଙ୍କୁ ଲଢୁଆ ଦଳରେ ସାମିଲ କରିଥିଲା। ଏଥିରେ ବର୍ତ୍ତମାନ ୬ଟି ମହିଳା ବାଟାଲିୟନ ରହିଛି, ଯେଉଁଥିରେ ମୋଟ ୮,୦୦୦ ଯବାନ ଅଛନ୍ତି।
