ପୁରୀ: ନିଶ୍ଚିହ୍ନ ହୋଇଯିବ ୫ ଶହ ବର୍ଷର ମଠ ସଂସ୍କୃତି ! ଅତିବଡୀଙ୍କ ସାଧନା ପୀଠ ବିକ୍ରି ନେଇ ଚାଲିଛି ବଡ ଷଡ଼ଯନ୍ତ୍ର। ଶାଗମାଛ ଦରରେ ମଠକୁ ଅନ୍ୟ ହାତରେ ଟେକିବା ପାଇଁ ଶ୍ରୀମନ୍ଦିର ପ୍ରଶାସନ କରୁଛି ହୀନଉଦ୍ୟମ । ବଡ଼ ଓଡ଼ିଆ ମଠର ବିକ୍ରି ପାଇଁ ଯୋଜନା କରୁଛି ଶ୍ରୀମନ୍ଦିର ପ୍ରଶାସନ । ୫ଶହ ବର୍ଷ ପୁରୁଣା ଏହି ମଠର ଅଧା ଅଂଶକୁ ଏକ ନିଯୋଗ ହାତରେ ଟେକିବା ପାଇଁ ଷଡ଼ଯନ୍ତ୍ର ପୂର୍ବକ ଉଦ୍ୟମ ଆରମ୍ଭ ହୋଇଛି ।ଗତ ପରିଚାଳନା କମିଟି ବୈଠକରେ ଏନେଇ ଆଲୋଚନା ହୋଇଥିବା ବେଳେ କିଛି ସଦସ୍ୟଙ୍କ ବିରୋଧ ଯୋଗୁଁ ମୁଖ୍ୟ ପ୍ରଶାସକଙ୍କୁ ତଦନ୍ତ ପାଇଁ ଅନୁରୋଧ କରାଯାଇଛି ।ତେବେ ଅତିବଡୀଙ୍କ ସାଧନା ପୀଠ ଏହି ମଠର ପ୍ରାୟ ୩୭ଡିସିମାଲ ଜମିକୁ ବିକ୍ରି ପାଇଁ ଏହି ପ୍ରୟାସକୁ ତେଜିଛି ବିବାଦ । ପ୍ରଶାସନର ଏପରି ଉଦ୍ୟମକୁ ତୀବ୍ର ନିନ୍ଦା କରିବା ସହ ଆତ୍ମହତ୍ୟା ଚେତାବନୀ ଦେଇଛନ୍ତି ମଠ ମହନ୍ତ ଅଧିକାରୀ ବଂଶୀଧର ଦାସ ।
ଅତିବଡୀ ଜଗନ୍ନାଥ ଦାସଙ୍କ ସାଧନା ପୀଠ ଶ୍ରୀକ୍ଷେତ୍ରର ବଡ ଓଡ଼ିଆ ମଠ। ଶ୍ରୀମନ୍ଦିର ସଂସ୍କୃତି ସହିତ ଅଙ୍ଗାଅଙ୍ଗୀ ଭାବରେ ଜଡିତ ଏହି ମଠ । ଅଣସର ଘରେ ମହାପ୍ରଭୁଙ୍କ ତାତି ଓହ୍ଲାଇବା ପାଇଁ ଫୁଲୁରି ତେଲ ଯୋଗାଇଥାଏ ଏହି ମଠ ।ମହାପ୍ରଭୁଙ୍କ ପାଇଁ ଅଧର ହାଣ୍ଡି ବି ଏହି ମଠ ଯୋଗାଇଥାଏ । ଶ୍ରୀମନ୍ଦିର ପଶ୍ଚିମଦ୍ୱାର ସମ୍ମୁଖ ବାସେଳୀ ସାହି ମୌଜାର ୫୦୦ବର୍ଷ ପୁରୁଣା ମଠକୁ ଜାଲ ଇଛାପତ୍ର କରି ହାତେଇବାକୁ ଚାଲିଛି ଷଡ଼ଯନ୍ତ୍ର ।
ଏଭଳି ଅଭିଯୋଗ ଆଣିଛନ୍ତି ମଠର ବର୍ତ୍ତମାନର ମହନ୍ତ ଅଧିକାରୀ ବଂଶୀଧର ଦାସ । ଓଡ଼ିଆ ଭାଗବତ ଓ ଓଡ଼ିଆ ସାହିତ୍ୟକୁ ପୁରପଲ୍ଲୀରେ ପ୍ରଚାର କରିବାର ପ୍ରମୁଖ ଦାୟିତ୍ୱ ନେଇଥିବା ବଡ଼ ଓଡିଆ ମଠର ପ୍ରାୟ ୩୭ ଡିସିମଲ ଅଂଶ ଏବେ ବିକ୍ରି ହେବ । ଗତ ପରିଚାଳନା ବୈଠକରେ ଏନେଇ ହୋଇଛି ଆଲୋଚନା । ଏହି ମଠ ଅଧୀନରେ ଥିବା ୬୧୬ ଓ ୬୧୭ ପ୍ଲଟର ୩୭ ଡିସିମଲ ଜାଗାକୁ ଏକ ନିଯୋଗକୁ ଟେକିଦେବା ପାଇଁ ଉଦ୍ୟମ ଆରମ୍ଭ ହୋଇଛି । ପୂର୍ବରୁ ଦୁଇଦୁଇ ଥର ଏନେଇ ଆଲୋଚନା ହୋଇଥିବା ବେଳେ କିଛି ସଦସ୍ୟଙ୍କ ବିରୋଧ ଯୋଗୁଁ ସମ୍ଭବ ହୋଇପାରିନଥିଲା। ତେବେ ପୁଣି ଏ ନେଇ ଆଲୋଚନା ଆରମ୍ଭ ହୋଇଥିବା ବେଳେ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ ଏନେଇ ତଦନ୍ତ କରିବାକୁ ଅନୁରୋଧ କରାଯାଇଛି ।
ତେବେ ୨୦୦୨ପରିଚାଳନା କମିଟି ନିଷ୍ପତ୍ତି ଅନୁସାରେ କୌଣସି ମଠର ବିଜେ ସ୍ଥଳୀ,ବିକ୍ରି,ଖରିଦ କିମ୍ବା ହସ୍ତାନ୍ତର ହୋଇପାରିବ ନାହିଁ।ତେବେ ୧୯୯୯ ବାତ୍ୟା ଠାରୁ ବିକ୍ରି ହେବାକୁ ଥିବା ସ୍ଥାନରୁ ଠାକୁରଙ୍କୁ ନେଇ ଜଗମୋହନରେ ପୂଜା କରାଯାଉଛି । ତେଣୁ ଏହା ବିଜେସ୍ଥଳୀ ନୁହେଁ ବୋଲି ଶ୍ରୀମନ୍ଦିର ପ୍ରଶାସନର ଯୁକ୍ତି ରହିଛି । କିନ୍ତୁ ମଠ ପରିସରରେ ଥିବା ସମସ୍ତ ସ୍ଥାନ ବିଜେସ୍ଥଳୀ ବୋଲି ଯୁକ୍ତି ବାଢିଛନ୍ତି ମହନ୍ତ । ତେବେ ମଠର ଏହି ୩୭ ଡିସିମଲ ସ୍ଥାନକୁ ୧୯୫୪ ମସିହାରେ ତତ୍କାଳୀନ ମଠ ମହନ୍ତ ବୃନ୍ଦାବନ ଦାସ ଗୋସ୍ଵାମୀଙ୍କ ମାରଫତରେ ହସ୍ତାନ୍ତର କରାଯାଇଥିବା ବେଳେ ୧୯୩୭ ମସିହାର ଜାଲ ଦସ୍ତଖତ କରାଯାଇ ଏହାକୁ ଏବେ ଦଖଲ କରିବାକୁ ଷଡ଼ଯନ୍ତ୍ର ଚାଲିଛି ବୋଲି କହିଛନ୍ତି ମଠ ମହନ୍ତ ।
ତେବେ ଖୁବଶୀଘ୍ର ଆଇନ ର ଆଶ୍ରୟ ନେବା ସହ ଯଦି ଜୋର ଜବରଦସ୍ତ ମଠକୁ ଅନ୍ୟକୁ ହସ୍ତାନ୍ତର କରାଯାଏ ତେବେ ଶ୍ରୀମନ୍ଦିର ସମ୍ମୁଖରେ ଆତ୍ମହତ୍ୟା କରିବି ବୋଲି ଚେତାବନୀ ଦେଇଛନ୍ତି ମଠ ମହନ୍ତ । ସେପଟେ ଏହାକୁ ସମ୍ପୂର୍ଣ୍ଣ ନୈତିକତା ବିରୋଧୀ ବୋଲି କହିଛନ୍ତି ଆଇନଜୀବି ।ଏଭଳି ଷଡ଼ଯନ୍ତ୍ର ବିରୋଧରେ ବୁଦ୍ଧିଜୀବି ମାନେ ପଦକ୍ଷେପ ନେବା ଆବଶ୍ୟକ ବୋଲି କହିଛନ୍ତି ଆଇନଜୀବୀ ଅଶୋକ ଦାସ
