ଭୁବନେଶ୍ୱର: ଗତ ୨୦ ବର୍ଷରେ ଓଡ଼ିଶାର ଜଙ୍ଗଲ ଜମିର ପରିମାଣ ଏବଂ ସେହି ସମୟ ମଧ୍ୟରେ ବିକାଶ ଉଦ୍ଦେଶ୍ୟରେ ଏହାକୁ ବ୍ୟବହାର ସମ୍ପର୍କରେ ଆଜି ବିଧାନସଭାରେ ବିଜେପି ବିଧାୟକ ଅମରେନ୍ଦ୍ର ଦାସ ପ୍ରଶ୍ନ ପଚାରିଥିଲେ । ଏହାର ଉତ୍ତର ରଖି ଜଙ୍ଗଲ, ପରିବେଶ ଏବଂ ଜଳବାୟୁ ପରିବର୍ତ୍ତନ ରାଷ୍ଟ୍ରମନ୍ତ୍ରୀ ଗଣେଶ ରାମ ସିଂହ ଖୁଣ୍ଟିଆ ସୂଚନା ଦେଇଛନ୍ତି ଯେ, ଭାରତୀୟ ବନ ସର୍ଭେ ରିପୋର୍ଟ ଅନୁଯାୟୀ ଗତ ଦୁଇ ଦଶନ୍ଧିରେ ଓଡ଼ିଶାରେ ଜଙ୍ଗଲ ଜମି ୪ ହଜାର ବର୍ଗ କିଲୋମିଟରରୁ ଅଧିକ ବୃଦ୍ଧି ପାଇଛି ।
ଭାରତ ସରକାରଙ୍କ ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ ଗତ ଦୁଇ ଦଶନ୍ଧିରେ ୪୦୦ ରୁ ଅଧିକ ଉନ୍ନୟନମୂଳକ ପ୍ରକଳ୍ପ ପାଇଁ ପ୍ରାୟ ୩୯,୦୮୪ ହେକ୍ଟର ଜଙ୍ଗଲ ଜମିର ବ୍ୟବହାରକୁ ଅନୁମୋଦନ କରିଛନ୍ତ ବୋଲି ଖୁଣ୍ଟିଆ କହିଥିଲେ ।
ବିଧାୟକ ଦାସ ଆହୁରି ପଚାରିଥିଲେ ଯେ, ଗତ ଦୁଇ ଦଶନ୍ଧି ପୂର୍ବେ ଓଡ଼ିଶାରେ କେତେ ଜଙ୍ଗଲ ଜମି ଥିଲା ଏବଂ ବର୍ତ୍ତମାନ ଏହାର ପରିମାଣ କେତେ? ପ୍ରକଳ୍ପ ପାଇଁ କମ୍ପାନୀ ଏବଂ ବ୍ୟକ୍ତିବିଶେଷଙ୍କୁ କେତେ ଜଙ୍ଗଲ ଜମି ଦିଆଯାଇଛି?” ଏହି ସମ୍ପର୍କିତ ଉତ୍ତର ଦେଇ ମନ୍ତ୍ରୀ କହିଛନ୍ତି ଯେ, ଡେରାଡୁନ-ସ୍ଥିତ ଭାରତୀୟ ବନ ସର୍ବେକ୍ଷଣ ସଂସ୍ଥା ପ୍ରତି ଦୁଇ ବର୍ଷରେ ଥରେ ଜଙ୍ଗଲ ଆଚ୍ଛାଦିତ ଅଞ୍ଚଳଗୁଡ଼ିକର ସାଟେଲାଇଟ୍-ଆଧାରିତ ସର୍ଭେ କରିଥାଏ ।
୨୦୦୩ ରିପୋର୍ଟ ଅନୁଯାୟୀ, ଓଡ଼ିଶାରେ ୪୮,୩୬୬ ବର୍ଗ କିଲୋମିଟର ଜଙ୍ଗଲ ଜମି ଥିଲା ଯେତେବେଳେ ସଦ୍ୟତମ ଭାରତ ବନ ରାଜ୍ୟ ରିପୋର୍ଟରେ ପ୍ରକାଶ ପାଇଛି ଯେ ରାଜ୍ୟରେ ୫୨,୪୩୩.୫୬ ବର୍ଗ କିଲୋମିଟର ଜଙ୍ଗଲ ଜମି ଥିଲା । ସେହିପରି ଗତ ୨୦ ବର୍ଷ ମଧ୍ୟରେ, କେନ୍ଦ୍ର ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ ୧୯୮୦ ମସିହାର ବନ ସଂରକ୍ଷଣ ଆଇନ ଅନୁଯାୟୀ ୪୨୭ଟି ପ୍ରକଳ୍ପ ପାଇଁ ୩୯,୦୮୪.୮୩୦ ହେକ୍ଟର ଜଙ୍ଗଲ ଜମିକୁ ସ୍ଥାନାନ୍ତର କରିଛି ।
ମନ୍ତ୍ରୀଙ୍କ ଦ୍ୱାରା ପ୍ରଦାନ କରାଯାଇଥିବା ତଥ୍ୟ ଅନୁଯାୟୀ, ୨୦୨୩ ମସିହାରେ ପ୍ରକଳ୍ପ ପାଇଁ ସର୍ବାଧିକ ଜଙ୍ଗଲ ଜମି ପରିବର୍ତ୍ତନ ଦେଖାଯାଇଥିଲା ।
