ପାଟନା: ଦ୍ୱିତୀୟ ପର୍ଯ୍ୟାୟ ଭୋଟ୍ ପାଇଁ ବିହାରରେ ବିଭିନ୍ନ ରାଜୈତିକ ଦଳର ନେତାମାନେ ପରସ୍ପର ବିରୋଧରେ ଆରୋପ ପ୍ରତ୍ୟାରୋପ ଜାରି ରଖିଛନ୍ତି। ଏହିକ୍ରମରେ ଜନତା ଦଳ ୟୁନାଇଟେଡ (ଜେଡିୟୁ) ସଭାପତି ତଥା ବିହାର ସିଏମ ନୀତୀଶ କୁମାର ଶନିବାର ଦିନ କଟିହାରର ଡୁମାରିଆରେ ପହଞ୍ଚି ଏକ ସାଧାରଣ ଜନସଭାକୁ ସମ୍ବୋଧିତ କରିଛନ୍ତି। ଏଠାରେ ସେ ପୁଣି ଥରେ ଲାଲୁ ଯାଦବଙ୍କ ପରିବାରକୁ ଟାର୍ଗେଟ କରିଛନ୍ତି। ନୀତୀଶ କୁମାର କହିଛନ୍ତି ଲାଲୁ ପ୍ରସାଦ ଯାଦବ ଅନେକ ସନ୍ତାନ ଜନ୍ମ ଦେଇଛନ୍ତି, ସେ ଏତେ ସନ୍ତାନ ଜନ୍ମ କରିବା ଉଚିତ୍ ନ ଥିଲା। ଏନେଇ ଲାଲୁ ଯତ୍ନବାନ ହେବା ଉଚିତ୍ ଥିଲା ବୋଲି ନୀତୀଶ କହିଛନ୍ତି।
ସୂଚନାଯୋଗ୍ୟ. ପୂର୍ବତନ ସିଏମ୍ ଲାଲୁ ଯାଦବଙ୍କର ୯ ସନ୍ତାନ ଅଛନ୍ତି, ତାଙ୍କର ଦୁଇ ପୁଅ ତେଜସ୍ୱୀ ଏବଂ ତେଜ ପ୍ରତାପ ରାଜନୀତିରେ ସକ୍ରିୟ ଅଛନ୍ତି, ଝିଅ ମିସା ଭାରତୀ ମଧ୍ୟ ରାଜ୍ୟସଭା ସାଂସଦ। ବର୍ତ୍ତମାନ ଆରଜେଡି ଲୋକସଭା ନିର୍ବାଚନରେ ମିସା ଭାରତୀଙ୍କୁ ଓହ୍ଲଇଛି ଏବଂ ତାଙ୍କ ସ୍ୱାମୀଙ୍କ ସହ ସିଙ୍ଗାପୁରରେ ରହୁଥିବା ଭଉଣୀ ରୋହିଣୀ ଆଚାର୍ଯ୍ୟଙ୍କୁ ମଧ୍ୟ ଦଳ ଟିକେଟ ଦେଇଛି।
ରିପୋର୍ଟ ଅନୁଯାୟୀ, ନୀତୀଶ କହିଛନ୍ତି ସ୍ୱାମୀ-ସ୍ତ୍ରୀ (ଲାଲୁ-ରାବ୍ରି) ସରକାର ବିହାରକୁ ୧୫ ବର୍ଷ ମଧ୍ୟରେ ଗଭୀର ଗାତକୁ ଠେଲି ଦେଇଛନ୍ତି। ମୁସଲମାନମାନଙ୍କୁ ମଧ୍ୟ କିଛି ଯୋଜନା କରି ନଥିଲେ। ଠକେଇ କାର୍ଯ୍ୟ କେବଳ ମୁସଲମାନ ସମ୍ପ୍ରଦାୟର ଭୋଟ୍ ପାଇବା ପାଇଁ କରାଯାଇଥିଲା ।
ବିଜେପି ସହିତ ଆମର ସମ୍ପର୍କ ୧୯୯୫ ରୁ ଆରମ୍ଭ ହୋଇଥିଲା। ୧୦ଲକ୍ଷ ନିଯୁକ୍ତି ପ୍ରସଙ୍ଗରେ ନୀତୀଶ କହିଛନ୍ତି ତେଜସ୍ୱୀ ଯାଦବ ଆମ କାମ ପାଇଁ ଶ୍ରେୟ ନେଉଛନ୍ତି। ସବୁ ସ୍ଥାନରେ ମିଥ୍ୟ କହୁଛନ୍ତି। ସିଏମ ନୀତୀଶ କୁମାର କହିଛନ୍ତି ଲାଲୁ ପ୍ରଥମେ ତାଙ୍କ ଦୁଇ ପୁଅଙ୍କୁ ରାଜନୀତିରେ ପ୍ରବେଶ କରାଇଥିଲେ। ବର୍ତ୍ତମାନ ସେ ନିଜ ଦୁଇ ଝିଅଙ୍କୁ ମଧ୍ୟ ରାଜନୀତିକୁ ଆଣିଛନ୍ତି।
ନୀତୀଶ କୁମାର ଆହୁରି ମଧ୍ୟ କହିଛନ୍ତି ଯେ ବିହାରର ବିକାଶ ପାଇଁ କେନ୍ଦ୍ର ଓ ରାଜ୍ୟ ସରକାର ମିଳିତ ଭାବେ କାର୍ଯ୍ୟ କରୁଛନ୍ତି। କେନ୍ଦ୍ରରେ ସରକାର ଗଠନ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏନଡିଏ ପ୍ରାର୍ଥୀଙ୍କୁ ପୁଣି ଥରେ ଜିତାଇବା ପାଇଁ ଲୋକମାନେ କାର୍ଯ୍ୟ କରିବା ଉଚିତ୍। ଏପ୍ରିଲ ୨୬ରେ ଦ୍ୱିତୀୟ ପର୍ଯ୍ୟାୟରେ କଟିହରରେ ଭୋଟିଂ ଅନୁଷ୍ଠିତ ହେବ । ଏହି ଆସନରୁ କଂଗ୍ରେସ ତାରିକ ଅନୱାର ଏବଂ ଜେଡିୟୁ ଦୁଲାଲ ଚନ୍ଦ୍ର ଗୋସ୍ୱାମୀଙ୍କୁ ପ୍ରାର୍ଥୀ କରିଛି।
