ଆଗରପଡ଼ା :ଗତ ଶନିବାର ସନ୍ଧ୍ୟା ସମୟରେ ଆଗରପଡ଼ା କାଣ୍ଡବା ସାଳନ୍ଦୀନଦୀ ସେତୁ ଅନତିଦୂରରେ ପଲସର ବାଇକରେ ତିନିଜଣ ଯୁବକ ଆସି ବନ୍ଧୁକ ଓ ଛୁରୀ ଦେଖାଇ ଜନୈକା ମହିଳା ପିନ୍ଧିଥିବା ସମସ୍ତ ସୁନା ଗହଣାକୁ ନେଇ ଆଖିପିଛୁଳାକେ କେଉଁଆଡ଼େ ଫେରାର ହୋଇଯାଇଥିଲେ । କୌଣସି ସୂତ୍ରରୁ ଖବରପାଇ ଥାନାଧିକାରୀ ଅମିତ ଭୂୟାଁ ଘଟଣାସ୍ଥଳରେ ପହଂଚି ଲୁଟେରାଙ୍କ ପିଛା କରିଥିଲେ ସୁଦ୍ଧା ଅନ୍ଧାରର ସୁଯୋଗରେ ଅନ୍ୟରାସ୍ତା ଦେଇ ଖସିଯିବାରେ ସକ୍ଷମ ହୋଇଥିଲେ । ଖଇରା ଥାନା ଅନ୍ତର୍ଗତ କନ୍ତିଆ ଗ୍ରାମର କାହ୍ନୁଚରଣ ପଣ୍ଡା ସ୍ତ୍ରୀ ଓ ପୁଅଙ୍କ ସହ ବାଇକ ଯୋଗେ ଶ୍ୱଶୁର ଘର ଗଣିଜାଙ୍ଗରୁ ଘରକୁ ଫେରୁଥିଲେ ।
ଆଗରପଡ଼ା କାଣ୍ଡବା ସାଳନ୍ଦୀନଦୀ ସେତୁର କିଛିଦୂରରେ ହଠାତ୍ ତିନିଜଣ ଯୁବକ ଏକ ପଲସର ବାଇକରେ ଆସି କାହ୍ନୁଙ୍କୁ ଅଟକାଇଥିଲେ । ପରେ କାହ୍ନୁଙ୍କ ବେକରେ ବନ୍ଧୁକ ଓ ତାଙ୍କ ପୁଅ ବେକରେ ଛୁରୀ ଲଗାଇ ତାଙ୍କ ସ୍ତ୍ରୀ ପିନ୍ଧିଥିବା ସୁନାହାର,ମଙ୍ଗଳସୁତ୍ର,ବ୍ରେସଲେଟ,କାନଫୁଲ ଆଦି ସୁନାଗହଣା ଲୁଟେରାମାନେ ନେଇ ପଳାଇଥିଲେ । ଏ ସମ୍ପର୍କରେ ଥାନାରେ ଅଭିଯୋଗ ହେବା ପରେ ପୋଲିସ ମାମଲା ରୁଜ୍ଜୁ କରି ତଦନ୍ତ ଆରମ୍ଭ କରିଛି ।
