ଆଚାର୍ଯ୍ୟ ଆହୁରୀ କହିଛନ୍ତି ଯେ, ପୂର୍ବତନ ମନ୍ତ୍ରୀ ତଥା ଭଟ୍ଲି ବିଧାୟକ ସୁଶାନ୍ତ ସିଂହଙ୍କ ଉପସ୍ଥିତିରେ ବହୁଚର୍ଚ୍ଚିତ ବରଗଡ ଜିଲ୍ଲା ଅମ୍ବାଭୋନା ଥାନା ଭଙ୍ଗାରୁଜା ଘଟଣାକୁ ଆଜି ମାସେ ବିତିଲା । ଥାନା ଭିତରେ ପସି ଭଙ୍ଗାରୁଜା କରିବା ସହିତ ସରକାରୀ ସମ୍ପତି ନଷ୍ଟ କରାଗଲା । ଥାନା ଭଙ୍ଗାରୁଜା ଘଟଣାରେ ତଥ୍ୟ, ଭିଡିଓ ଫୁଟେଜ୍ ଆଧାରରେ ୧୦୨ ଜଣ ଅଭିଯୁକ୍ତଙ୍କ ସମେତ ଅନ୍ୟାନ୍ୟ ସଂପୃକ୍ତଙ୍କ ନାମରେ ମାମଲା ରୁଜୁ କରାଗଲା । କାର୍ଯ୍ୟରତ ପୋଲିସ୍ ଅଧିକାରୀମାନଙ୍କୁ ଗାଳି ଓ ମରଣାନ୍ତକ ଆକ୍ରମଣ କରାଗଲା ।
ଚିହ୍ନିତ ୧୦୨ ଜଣଙ୍କ ଭିତରୁ ମାତ୍ର ୪ ଜଣ ଏବଂ ଅନ୍ୟାନ୍ୟଙ୍କ ଭିତରୁ ୧୮ ଜଣ, ଏଭଳି ସର୍ବମୋଟ ୨୨ ଜଣଙ୍କୁ ଗିରଫ କରିଥିଲା ପୋଲିସ୍ । ବର୍ତ୍ତମାନ ସୁଦ୍ଧା ଅନ୍ୟାନ୍ୟଙ୍କ ଭିତରୁ ୧୩ ଜଣଙ୍କୁ ବେଲ୍ ମିଳିସାରିଲାଣି । ଏହି ଘଟଣାରେ ପୋଲିସ୍ ନିଜେ ଅଭିଯୋଗକାରୀ, ଆକ୍ରମଣରେ ନିଜେ ଆହତ ଏବଂ ନିଜେ ମଧ୍ୟ ସାକ୍ଷୀ ।
‘କେସ୍ ଡାୟରୀ’ ଦାଖଲ ନହେବା ପର୍ଯ୍ୟନ୍ତ ପୋଲିସ୍ କୋର୍ଟରେ ଉପସ୍ଥିତ ରହୁଥିଲେ, କିନ୍ତୁ ‘କେସ୍ ଡାୟରୀ’ ଦାଖଲ ହେବା ପରେ ନିଜେ ପୋଲିସ୍ ଯିଏକି ଅଭିଯୋଗକାରୀ ଅନୁପସ୍ଥିତ ରହିଲେ । ମାନ୍ୟବର କୋର୍ଟଙ୍କ ନିର୍ଦ୍ଦେଶ ପରେ ବି ପୋଲିସ୍ ହାଜର ହେଲେ ନାହିଁ । ଏହା ହିଁ ପୋଲିସ୍ ପ୍ରଶାସନ ଏବଂ ଶାସକ ବିଜେଡିର ମଧୁଚନ୍ଦ୍ରିକାକୁ ସ୍ପଷ୍ଟ କରିଛି ।
ଏହି ଘଟଣାରେ ସଂପୃକ୍ତ ଅପରାଧୀମାନଙ୍କୁ ଜାମିନ ଦେବା ପାଇଁ ଖୋଦ୍ ପୋଲିସ୍ ସହାୟତା କରୁଛି । ଏଭଳି ସଙ୍ଗୀନ ଘଟଣାକୁ ଚାପି ଦେବା ପାଇଁ ଶାସକ ବିଜେଡି ଉଦ୍ୟମ କରୁଛି । ‘ମୋ ପୋଲିସ୍’ ବର୍ତ୍ତମାନ ‘ବିଜେଡି ପୋଲିସ୍’ରେ ପରିଣତ ହୋଇସାରିଛି । ଏହା କ’ଣ ‘ମୋ ପୋଲିସ୍’ର ଦକ୍ଷତା ବୋଲି ଶ୍ରୀ ଆଚାର୍ଯ୍ୟ ପ୍ରଶ୍ନ କରିଛନ୍ତି ।
ତେବେ ଅମ୍ବାଭୋନା ଥାନା ଭଙ୍ଗାରୁଜା ଘଟଣାରେ ସଂପୃକ୍ତ ସ୍ଥାନୀୟ ବିଧାୟକ ସୁଶାନ୍ତ ସିଂହଙ୍କୁ କାହିଁକି ତଦନ୍ତ ପରିସରଭୁକ୍ତ କରାଯାଇନାହିଁ? ଦଙ୍ଗାରେ ସଂପୃକ୍ତ ଥିବା ଶାସକ ବିଜେଡିର ନେତା ଓ କର୍ମୀ, ଶାସକ ଦଳର ଜନ ପ୍ରତିନିଧି ଏବଂ ସରକାରୀ କର୍ମଚାରୀଙ୍କୁ କାହିଁକି ଗିରଫ କରାଯାଉନାହିଁ? ସ୍ଥାନୀୟ ପୋଲିସ୍ ପ୍ରଶାସନ ଏବଂ ରାଜ୍ୟ ସରକାର ଯଦି ଅକ୍ଷମ, ତାହେଲେ ଜନସାଧାରଣଙ୍କ ସୁରକ୍ଷା ସ୍ୱାର୍ଥରୁ ଏହି ଘଟଣାର ତଦନ୍ତ ଭାର ସିବିଆଇକୁ ହସ୍ତାନ୍ତର କରିବାକୁ ଆଚାର୍ଯ୍ୟ ଦାବୀ କରିଛନ୍ତି ।
