ଜି-୨୦ ସମ୍ମିଳନୀ ଲାଗି ସଜେଇ ହୋଇଛି ରାଜଧାନୀ ଦିଲ୍ଲୀ। ଚିକମିକ୍ ଆଲୋକମାଳାରେ ଝଲସୁଛି ରାସ୍ତାଘାଟ। ନୂଆଦିଲ୍ଲୀସ୍ଥିତ ଭାରତ ମଣ୍ଡପମ୍ରେ ଅତିଥିଙ୍କୁ ସ୍ୱାଗତ ଲାଗି ଜୋରସୋରରେ ଚାଲିଛି ପ୍ରସ୍ତୁତି। ଭାରତ ମଣ୍ଡପର ବିଲଡିଂକୁ ରଙ୍ଗୀନ ଆଲୋକମାଳାରେ ସଜାଯିବା ସହ ଚତୁଃର୍ଦିଗକୁ ସଫାସୁତରା କରାଯାଉଛି। ସେହିପରି ରାସ୍ତାକଡ଼ ପ୍ରାଚୀରକୁ ବିଭିନ୍ନ ରଙ୍ଗରେ ଚିତ୍ରଣ କରାଯାଉଛି।
ଅପରପକ୍ଷେ, ଦିଲ୍ଲୀର ନାମିଦାମୀ ଷ୍ଟାର୍ ହୋଟେଲଗୁଡିକରେ ମଧ୍ୟ ଦେଖାଦେଲାଣି ପ୍ରବଳ ଉତ୍ସାହ। ଦେଶ ବିଦେଶରୁ ଆସିବାକୁ ଥିବା ଅତିଥିଙ୍କ ପାଇଁ ହୋଟେଲ୍ଗୁଡିକୁ ସଜାଯିବା ସହିତ ଭଳିକି ଭଳି ଆଇଟମ୍ ପ୍ରସ୍ତୁତ କରାଯାଉଛି। ବିଶେଷ କରି ୟୁନାଇଟେଡ୍ ନେସନ ୨୦୨୩ ମସିହାକୁ ଇଣ୍ଟରନ୍ୟାସନାଲ୍ ଇୟର ଅଫ୍ ମିଲେଟ୍ ବୋଲି ଘୋଷଣା ପରେ ଏବେ ମାଣ୍ଡିଆରେ ପ୍ରସ୍ତୁତ ଆଇଟମକୁ ବିଦେଶୀ ଅତିଥିଙ୍କୁ ପରସିବାକୁ ପ୍ରସ୍ତୁତି ଚାଲିଛି। ଖାଲି ସେତିକି ନୁହେଁ, ଅତିଥିମାନେ ଜଅ ଏବଂ ବାଜରାରେ ତିଆରି ଖାଦ୍ୟପେୟର ମଧ୍ୟ ମଜା ଉଠାଇପାରିବେ। ଅତିଥିଙ୍କ ଲାଗି ବିଭିନ୍ନ ପ୍ରକାରର ଡ୍ରାଏ ଫ୍ରୁଟ୍ସ ସହ ମାଣ୍ଡିଆରେ ପ୍ରସ୍ତୁତ କେକ୍ ରଖାଯାଇଛି ।
