ବାରିପଦା : ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟରେ ‘ଶିମିଳିପାଳର ଅତୀତ, ବର୍ତ୍ତମାନ ଏବଂ ଭବିଷ୍ୟତ’ ଶୀର୍ଷକ ଏକ ଦ୍ୱିଦିବସୀୟ ଜାତୀୟ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି । ବିଶ୍ୱବ୍ୟାଙ୍କ ଦ୍ୱାରା ଉତ୍କର୍ଷତା ଏବଂ ସମାନତା ପାଇଁ ଓଡିଶା ଉଚ୍ଚ ଶିକ୍ଷା ଯୋଜନାର ସମନ୍ୱିତ ବିକାଶ କାର୍ଯ୍ୟକ୍ରମ ଦ୍ୱାରା ପ୍ରାୟୋଜିତ ଓ ବିଶ୍ୱବିଦ୍ୟାଳୟର ‘ସେଣ୍ଟର ଫର ଶିମିଳିପାଳ ଷ୍ଟଡିଜ୍’ ଦ୍ୱାରା ଆୟୋଜିତ ଏହି ଆଲୋଚନାଚକ୍ରକୁ ବିଶ୍ୱବିଦ୍ୟାଳୟ କୁଳପତି ପ୍ରଫେସର ସନ୍ତୋଷ କୁମାର ତ୍ରିପାଠୀ ମୁଖ୍ୟ ଅତିଥି ଭାବେ ଯୋଗ ଦେଇ ଉଦ୍ଘାଟନ କରିଥିଲେ । ନିଜ ବକ୍ତବ୍ୟରେ ପ୍ରଫେସର ତ୍ରିପାଠୀ ଶିମିଳିପାଳକୁ ମୟୂରଭଞ୍ଜ ଜିଲ୍ଲା ତଥା ରାଜ୍ୟର ଜୀବନରେଖା ରୂପେ ଅଭିହିତ କରିଥିଲେ ଏବଂ ବୃକ୍ଷଲତା, ବନ୍ୟପ୍ରାଣୀ ଓ ମନୁଷ୍ୟ ମଧ୍ୟରେ ଉତ୍ତମ ସହାବସ୍ଥାନ ଯୋଗୁଁ ଶିମିଳିପାଳର ଅତୀତ ମହନୀୟ ଥିଲା ଏବଂ ବିଭିନ୍ନ ବିକାଶମୂଳକ ପଦକ୍ଷେପ ଯୋଗୁଁ ଏହାର ବର୍ତ୍ତମାନ ପରିବର୍ତ୍ତନଶୀଳ ଓ ଏହାର ଭବିଷ୍ୟତ ନିମନ୍ତେ ଆମକୁ ଉତ୍ତରଦାୟୀ ହେବାକୁ ପଡ଼ିବ ବୋଲି ମତବ୍ୟକ୍ତ କରିଥିଲେ । ଶିମିଳିପାଳର ଅତୀତ ଓ ବର୍ତ୍ତମାନ ହିଁ ଏହାର ଭବିଷ୍ୟତ ନିର୍ଦ୍ଧାରଣ କରିବ ଏବଂ ଶିମିଳିପାଳର ସୁରକ୍ଷା ପାଇଁ ଜନସଚେତନତା ହିଁ ସର୍ବଶ୍ରେଷ୍ଟ ମାଧ୍ୟମ । ଟାଇମ୍ସ ମାଗାଜିନ ଦ୍ୱାରା ଶିମିଳିପାଳ ବିଶ୍ୱର ଶ୍ରେଷ୍ଠ ୫୦ଟି ପର୍ଯ୍ୟଟନସ୍ଥଳୀର ମାନ୍ୟତା ପାଇଛି ଏବଂ ଶିମିଳିପାଳର ଉପରେ ଅଧ୍ୟୟନ ଓ ଗବେଷଣା ଦିଗରେ ବିଶ୍ୱବିଦ୍ୟାଳୟର ପ୍ରଚେଷ୍ଟା ଜାରି ରହିଲେ ଆଗାମୀ ଦିଗରେ ବିଶ୍ୱବିଦ୍ୟାଳୟ ମଧ୍ୟ ବିଶ୍ୱସ୍ତରୀୟ ହୋଇପାରିବ ବୋଲି କୁଳପତି ପ୍ରଫେସର ତ୍ରିପାଠୀ ଦୃଢ଼ୋକ୍ତି ପ୍ରକାଶ କରିଥିଲେ । ସ୍ନାତକୋତ୍ତର ପରିଷଦର ଅଧ୍ୟକ୍ଷ ତଥା ଆଲୋଚନାଚକ୍ରର ଆବାହକ ପ୍ରଫେସର ହେମନ୍ତ କୁମାର ସାହୁ ପୌରହିତ୍ୟ କରିଥିଲେ ଓ ଅତିଥି ପରିଚୟ ପ୍ରଦାନ କରିଥିଲେ ।
ସମ୍ମାନିତ ଅତିଥି ରୂପେ ଯୋଗ ଦେଇ ଆସାମ ଡନ୍ ବସ୍କୋ ବିଶ୍ୱବିଦ୍ୟାଳୟର ପ୍ରଫେସର ସୁଶୀଲ କୁମାର ଦତ୍ତ ଇତିହାସ ସ୍ମୃତିଚାରଣ କରି ବିଶ୍ୱବିଦ୍ୟାଳୟରେ ସେଣ୍ଟର ଫର ଶିମିଳିପାଳ ଷ୍ଟଡିଜ୍ର ଜନ୍ମକଥା ଉପସ୍ଥାପନ କରିଥିଲେ ଏବଂ ଶିମିଳିପାଳର ଅତୀତ ଅତୀବ ମନୋରମ, ବର୍ତ୍ତମାନ ପରିବର୍ତ୍ତନଶୀଳ ଓ ଭବିଷ୍ୟତ ଆହ୍ୱାନମୟ ବୋଲି ଅଭିମତ ପ୍ରକାଶ କରିଥିଲେ । ଅନ୍ୟତମ ସମ୍ମାନିତ ଅତିଥି ରୂପେ ଯୋଗ ଦେଇ ଶିମିଳିପାଳ ଜାତୀୟ ବ୍ୟାଘ୍ର ପ୍ରକଳ୍ପର କ୍ଷେତ୍ରୀୟ ଉପନିର୍ଦ୍ଦେଶକ ଡ. ସମ୍ରାଟ ଗୌଡ଼ା ନିଜ ବକ୍ତବ୍ୟରେ ଶିମିଳିପାଳର ଭବିଷ୍ୟତ ବୈଷୟିକ ଜ୍ଞାନକୌଶଳର ସଦୁପଯୋଗରେ ନିହିତ ରହିଛି ବୋଲି ମତବ୍ୟକ୍ତ କରିବା ସହିତ ଆଗାମୀ ଦିନରେ ଶିମିଳିପାଳ ଉପରେ ଗବେଷଣା ପାଇଁ ବିଶ୍ୱବିଦ୍ୟାଳୟ ସହିତ ଏମ୍ଓୟୁ ସ୍ୱାକ୍ଷର କରାଯିବ ବୋଲି ପ୍ରତିଶୃତି ଦେଇଥିଲେ । ଓଡ଼ିଶାର ବିଖ୍ୟାତ ପରିବେଶବିତ ଡ. ଜୟକୃଷ୍ଣ ପାଣିଗ୍ରାହୀ ଶିମିଳିପାଳ ପାଦଦେଶରେ ଥିବା ବାରିପଦା ବିଶ୍ୱର ସବୁଠୁ ଉତ୍ତପ୍ତ ସ୍ଥାନ ହେବା ନେଇଁ କ୍ଷୋଭ ପ୍ରକାଶ କରିଥିଲେ ଏବଂ ବିକାଶ ନାମରେ ଏହାର ହନନ ହେଉଛି ବୋଲି ଶଙ୍କା ପ୍ରକାଶ କରିଥିଲେ । ପୁଣି ଶିମିଳିପାଳର ସୁରକ୍ଷା କେବଳ ସରକାରଙ୍କ ଦାୟିତ୍ୱ ନୁହେଁ ବରଂ ଜନସାଧାରଣଙ୍କର ଏ ଦିଗରେ ଯଥେଷ୍ଟ ଭୂମିକା ରହିଛି ବୋଲି କହିଥିଲେ । ବିଶ୍ୱବିଦ୍ୟାଳୟ ଆନୁଷ୍ଠାନିକ ବିକାଶ କାର୍ଯ୍ୟକ୍ରମର ସଂଯୋଜକ ପ୍ରଫେସର ହୃଦୟନାଥ ଥାଟୋଇ ଶିମିଳିପାଳକୁ ନେଇ ବିଶ୍ୱବିଦ୍ୟାଳୟରେ କରାଯାଉଥିବା ବିଭିନ୍ନ ପ୍ରକାର ଗବେଷଣାତ୍ମକ କାର୍ଯ୍ୟକ୍ରମ ଗୁଡ଼ିକ ଉପରେ ଏକ ବିବରଣୀ ପ୍ରଦାନ କରିଥିଲେ । ବିଶ୍ୱବିଦ୍ୟାଳୟ ତରଫରୁ ଅତିଥିମାନଙ୍କୁ ଏବଂ ଓଡିଶା ଏନ୍ଭାଇରନ୍ମେଣ୍ଟ ସୋସାଇଟିର ସଭାପତି ଡ. ସୁନ୍ଦର ନାରାୟଣ ପାତ୍ର ଓ ଆଇ.ସି.ଏ.ଆର. ରାଷ୍ଟ୍ରୀୟ ପାଦପ ଆନୁବଂଶିକ ସଂସାଧନ ବ୍ୟୁରୋର ମୁଖ୍ୟ ବୈଜ୍ଞାନିକ ଡ. ରମେଶ ଚନ୍ଦ୍ର ମିଶ୍ରଙ୍କୁ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା ।
ଏ ଅବସରରେ ଅତିଥିମାନଙ୍କ ଦ୍ୱାରା ଆଲୋଚନାଚକ୍ରର ଗବେଷଣା ପୁସ୍ତିକା ଉନ୍ମୋଚନ ହୋଇଥିଲା । ପୁଣି ବିଶ୍ୱବିଦ୍ୟାଳୟର ଅନଲାଇନ୍ ଜର୍ନାଲ୍ ୱେବ୍ସାଇଟ୍ https://mscbujournals.org କୁଳପତିଙ୍କ ଦ୍ୱାରା ଲୋକାର୍ପିତ ହୋଇଥିଲା । ଶେଷରେ ଆଲୋଚନାଚକ୍ରର କାର୍ଯ୍ୟକାରୀ ସଂପାଦକ ଜୈବପ୍ରଯୁକ୍ତି ବିଦ୍ୟା ବିଭାଗର ସହଯୋଗୀ ପ୍ରଫେସର ଡ. ବିଶ୍ୱଜିତ ରଥ ଧନ୍ୟବାଦ ଅର୍ପଣ କରିଥିଲେ । କାର୍ଯକ୍ରମ ପରିଚାଳନାରେ ନୃତତ୍ୱ ଜନଜାତି ବିଭାଗର ସହଯୋଗୀ ପ୍ରଫେସର ବସନ୍ତ କୁମାର ମହାନ୍ତ, ସହକାରୀ ପ୍ରଫେସର ଡ. ପ୍ରିୟଙ୍କା ଦାସ, ବନ୍ୟପ୍ରାଣୀ ଓ ଜୈବବିବିଧତା ସଂରକ୍ଷଣ ବିଭାଗର ସହକାରୀ ପ୍ରଫେସର ଡ. ଦେବାଶିଷ ନାୟକ, ପ୍ରାଣୀ ବିଜ୍ଞାନ ବିଭାଗର ସହକାରୀ ପ୍ରଫେସର ଡ. କୁକୁ ମହାପାତ୍ର, ଉଦ୍ଭିଦ ବିଜ୍ଞାନ ବିଭାଗର ସହକାରୀ ପ୍ରଫେସର ଡ. ବିଷ୍ଣୂପ୍ରିୟା ହାଁସଦା, କମ୍ପ୍ୟୁଟର ବିଜ୍ଞାନ ବିଭାଗର ସହକାରୀ ପ୍ରଫେସର ଡ. ଶାନ୍ତିସ୍ୱରୁପ ବସା ପ୍ରମୁଖ ସହଯୋଗ କରିଥିଲେ । ଏହି କାର୍ଯ୍ୟକ୍ରମରେ ରାଜ୍ୟ ଓ ରାଜ୍ୟ ବାହାରର ବିଶିଷ୍ଟ ବ୍ୟକ୍ତିତ୍ୱ, ବିଶେଷଜ୍ଞ, ବିଭିନ୍ନ ବିଶ୍ୱବିଦ୍ୟାଳୟ, ଏନ୍ଜିଓ ଏବଂ ସଂଗଠନର ବିଦ୍ୱାନ ତଥା ଅନୁସନ୍ଧାନକାରୀ, ଅଧ୍ୟାପକ ଅଧ୍ୟାପିକା, ଅଣଶିକ୍ଷକ କର୍ମଚାରୀ ଓ ଛାତ୍ରଛାତ୍ରୀଙ୍କୁ ମିଶାଇ ପ୍ରାୟ ୨୫୦ ଜଣ ଯୋଗଦେଇ ଗବେଷଣା ଉପସ୍ଥାପନା, ପ୍ୟାନେଲ ଆଲୋଚନା, ଏବଂ କର୍ମଶାଳାରେ ସକ୍ରିୟ ଭାବରେ ଅଂଶଗ୍ରହଣ କରି ବୌଦ୍ଧିକ ଆଦାନ ପ୍ରଦାନ ଏବଂ ସହଯୋଗର ବାତାବରଣ ସୃଷ୍ଟି କରିଥିଲେ । ଏହି କାର୍ଯ୍ୟକ୍ରମ ଉପଲକ୍ଷେ ବିଶ୍ୱବିଦ୍ୟାଳୟ ପରିସରରେ ବାରିପଦା ବନଖଣ୍ଡ ଅଧିକାରୀଙ୍କ ତରଫରୁ ଶିମିଳିପାଳ ବନ୍ୟଜାତ ସାମଗ୍ରୀର ଏକ ଷ୍ଟଲ୍ ପ୍ରଦର୍ଶିତ ହୋଇଥିଲା ।
