ବାରିପଦା: ମୟୂରଭଞ୍ଜ ଜିଲ୍ଲାର ପାଞ୍ଚପୀଢ ଉପଖଣ୍ଡର ଯଶୀପୁର ଥାନା ଅନ୍ତର୍ଗତ ମାହାର୍ଦ୍ଦାପଳଶା ଗ୍ରାମରୁ ଜନୈକ ନିତ୍ୟାନନ୍ଦ ବେହେରାଙ୍କ ଏକ ମହେନ୍ଦ୍ର ବୋଲେରୋ ଗାଡି ନମ୍ବର OD -11E- 0991 ଗତକାଲି ରାତି ପ୍ରାୟ ୧୨ ରୁ ୧୨.୩୦ ମଧ୍ୟରେ ଚୋରି ହୋଇଥିବା ନେଇ ଯଶୀପୁର ଥାନାରେ ଅଭିଯୋଗ ହୋଇଥିଲା। ଉକ୍ତ ଚୋରି ହୋଇଥିବା ବୋଲେରୋ ଗାଡି ସମ୍ବନ୍ଧରେ ମୟୂରଭଞ୍ଜର ସମସ୍ତ ଥାନା ମାନଙ୍କୁ ଅବଗତ କରାଯାଇଥିଲା। ବହଳଦା ପୋଲିସ ଆଇଆଇସି ବିରେନ୍ଦ୍ର କୁମାର ରାଉତଙ୍କ ନେତୃତ୍ବରେ ଆଜି ଭୋର୍ ସକାଳେ କୈାଣସି ସୂତ୍ରରୁ ଖବର ପାଇ ବହଳଦା ଥାନା ଅନ୍ତର୍ଗତ ଦୁନ୍ଦୁ ଗ୍ରାମରେ ଜନୈକ ବ୍ୟକ୍ତିଙ୍କ ଘର ଆଗରେ ଏକ ମହେନ୍ଦ୍ର ବୋଲେରୋ ଗାଡି ଠିଆ ହୋଇଥିବା ଦେଖି ଏବଂ ଗାଡିର ନମ୍ବର ଦେଖି ଆଶ୍ଚର୍ଯ୍ୟ ହେବା ସହ ଉକ୍ତ ମହେନ୍ଦ୍ର ବୋଲେରୋ ଗାଡ଼ିଟି ଗତକାଲି ରାତିରେ ଯଶୀପୁର ଥାନା ଅନ୍ତର୍ଗତ ମାହାର୍ଦ୍ଦାପଳଶା ଗ୍ରାମରୁ ଚୋରି ହୋଇଥିବା ଗାଡି ବୋଲି ଜାଣି ପାରିଥିଲେ। ତୁରନ୍ତ ବହଳଦା ପୋଲିସ ଉକ୍ତ ବୋଲେରୋ ଗାଡିକୁ ଜବତ କରି ବହଳଦା ଥାନାକୁ ଆଣିବା ସହ ଦୁନ୍ଦୁର ଯାହା ଘର ଆଗରେ ଉକ୍ତ ବୋଲେରୋ ଗାଡି ରଖାଯାଇଥିଲା ସେହି ଘରର ଜନୈକ ବ୍ୟକ୍ତି ଜାବିର ଅହମ୍ମଦ (୨୬) କୁ ବହଳଦା ପୋଲିସ ଉଠାଇ ଆଣିବା ସହ ଥାନାରେ ଅଟକ ରଖି ଉକ୍ତ ବୋଲେରୋ ଗାଡି ସମ୍ବନ୍ଧରେ ପଚାରାଉଚୁରା କରୁଛି। ଜାବିର ଅହମ୍ମଦର ଘର ପଡୋଶୀ ଝାଡଖଣ୍ଡ ରାଜ୍ୟର ବାଙ୍ଗ ଥାନା ଅନ୍ତର୍ଗତ କେରାଇକେଲା ବୋଲି ଜଣାପଡିଛି ଏବଂ ଜାବିର ବହଳଦା ଥାନା ଅନ୍ତର୍ଗତ ଦୁନ୍ଦୁ ଗ୍ରାମରେ ବିବାହ କରିଛି ତଥା ସେହି ଦୁନ୍ଦୁରେ ଏକ ଭୋଡା ଘର ନେଇ ରହୁଥିବା ଜଣାପଡିଛି।ଚୋର ସନ୍ଦେହରେ ଥାନାରେ ଅଟକ ଥିବା ଜାବିର ଅହମ୍ମଦ ଗାଡି ଚୋରି ବିଷୟରେ ସେ କିଛି ଜାଣିନାହିଁ ଏବଂ ତା’ର ଜଣେ ଚିହ୍ନା ଲୋକ ଏଇ ବୋଲେରୋ ଗାଡି ଆଣି ତାଙ୍କ ଘରେ ରଖିଛି ବୋଲି କହୁଛି । ଜାବିର ରାଇରଙ୍ଗପୁର ସ୍ଥିତ ରାଜା ଓ୍ୱଲଡିଙ୍ଗ ଦୋକାନରେ କାମକରେ ବୋଲି ଜଣାପଡିଛି।
ବହଳଦା ପୋଲିସ ଏହି ବୋଲେରୋ ଗାଡି ସମ୍ବନ୍ଧରେ ଯଶୀପୁର ଥାନାକୁ ଜଣାଇବାରୁ ଯଶୀପୁର ଥାନା ଅଧିକାରୀ ସଂଯୁକ୍ତା ମହାଳିକ ଉକ୍ତ ଚୋରି ହୋଇଥିବା ବୋଲେରୋ ଗାଡିର ମାଲିକ ବହଳଦା ଥାନାରେ ପହଞ୍ଚିଛନ୍ତି।
ବହଳଦା ପୋଲିସ ଅଧିକ ତଦନ୍ତ ପାଇଁ ଉକ୍ତ ବୋଲେରୋ ଗାଡି ସହ ଅଭିଯୁକ୍ତ ଜାବିର ଅହମ୍ମଦକୁ ଯଶୀପୁର ଥାନା ଅଧିକାରୀଙ୍କୁ ହସ୍ତାନ୍ତର କରିଥିବା ଜଣାଯାଇଛି। ଯଶୀପୁର ଥାନାରେ ଏହି ଗାଡି ଚୋରି ଘଟଣା ନେଇ ୫/୨୦୨୫ ନମ୍ବରରେ ଏକ ମାମଲା ରୁଜୁ ହୋଇଛି।ଏଠାରେ ଉଲ୍ଲେଖଯୋଗ୍ୟ ଯେ ଗତକାଲି ରାତିରେ ପଡୋଶୀ ଜାମଦା ଥାନା ଅନ୍ତର୍ଗତ ଜଟାପାଣି ଗ୍ରାମର ଜନୈକ ମନୋରଞ୍ଜନ ବରାଳଙ୍କ ଏକ ଧଳା ରଙ୍ଗର ମହେନ୍ଦ୍ର ବୋଲେରୋ ଗାଡି ନମ୍ବର OR-09K- 7147 ତାଙ୍କ ଘର ଆଗରୁ ଚୋରି ହୋଇଥିବା ନେଇ ଜାମଦା ଥାନାର ଅଭିଯୋଗ ହୋଇଛି। ସମଗ୍ର ମୟୂରଭଞ୍ଜ ଜିଲ୍ଲା ର ବିଭିନ୍ନ ଥାନା ଅଞ୍ଚଳରେ ଗାଡି ଚୋରଙ୍କ ଦୈରାତ୍ମ ଭୀଷଣ ଭାବେ ବୃଦ୍ଧି ପାଇଛି। କିଛି ମାସ ତଳେ ବାରିପଦାରୁ ଚୋରି ହୋଇଥିବା ଏକ ଗାଡି ବହଳଦା ଥାନା ଅଞ୍ଚଳରେ ପୋଲିସ ଦ୍ୱାରା ଜବତ ହୋଇଥିଲା। ଏହି ସବୁ ଗାଡି ଚୋରିରେ ଏକ ବହୁତ ବଡ ରେକେର୍ଟ କାମ କରୁଥିବା ପୋଲିସ ସନ୍ଦେହ କରୁଛି।ବହଳଦା,ତିରିଂ,ଜାମଦା, ଯଶୀପୁର,ରରୁଆଁ ପ୍ରଭୁତି ଥାନା ଅଞ୍ଚଳ ଗୁଡିକ ପଡୋଶୀ ଝାଡଖଣ୍ଡ ସୀମାକୁ ଲାଗିକରି ଥିବାରୁ ଖୁବ୍ ସହଜରେ ଗାଡି ଚୋରମାନେ ଅକ୍ଳେଶରେ ଚୋରି ଗାଡିକୁ ଝାଡ଼ଖଣ୍ଡ ଏବଂ ବିହାରର ବିଭିନ୍ନ ଅଞ୍ଚଳକୁ ପାର କରିଦେଉଥିବା ସାଧାରଣରେ ଚର୍ଚ୍ଚା ହେଉଛି। ଆଜି ଚୋରି ବୋଲେରୋ ଗାଡି ପୋଲିସ ପାଇବା ପରେ ବାମନଘାଟୀ ଉପଖଣ୍ଡ ପୋଲିସ ପ୍ରଶାସନର ତତ୍ପରତା ପ୍ରକାଶ ପାଇବା ସହ ବିଭିନ୍ନ ଥାନା ଅଧିକାରୀଙ୍କୁ ଏଥିନେଇ ଅଧିକ ତଦନ୍ତ କରୁଥିବା ଜଣାପଡିଛି। ଆଜି ବହଳଦା ପୋଲିସ ଦ୍ୱାରା ଜବତ ହୋଇଥିବା ଯଶୀପୁରର ବୋଲେରୋ ଗାଡିରୁ ଗାଡିରେ ଥିବା ଗୋଟିଏ ଟ୍ୟାପ୍ ରେକର୍ଡର, ଦୁଇଟି ବକ୍ସ ଏବଂ ଗାଡିର କାଗଜପତ୍ର ଚୋରି ହୋଇଥିବା ଜଣାପଡିଛି।
