ରାୟଗଡ଼ା: ରାୟଗଡ଼ା ଜିଲ୍ଲା ଟିକିରି ଥାନା ଅଞ୍ଚଳରେ ଘଟିଛି ଏକ ଅଘଟଣ । ରାସ୍ତା ମଝିରେ ଅଟୋ ଚାଳକଙ୍କ ଗଳା କାଟିଦେଲେ ଦୁର୍ବୁତ୍ତ । ମୃତକ ହେଲେ ବଳରାମ ଖରା । ତାଙ୍କ ଘର କୋରାପୁଟ ଜିଲ୍ଲା ବନ୍ଧୁଗାଁ ବ୍ଲକ ଗାରିଡ଼ି ଗାଁରେ । ଘଟଣାରେ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି ।
ଖବର ମୁତାବକ, ବଳରାମ ଖରା ରାୟଗଡ଼ା ଜିଲ୍ଲା ଦୋରାଗୁଡ଼ା ଆରଆଇ କଲୋନୀରେ ଘର ଭଡ଼ା ନେଇ ପରିବାର ଲୋକଙ୍କ ସହ ରହୁଥିଲେ । ଆଜି ସେ ନିଜର ଅଟୋରେ ସିଙ୍ଗାରାମ ଠାରୁ ଟିକିରି ଅଭିମୁଖେ ଯାଉଥିବାବେଳେ ହଠାତ୍ ଫୁଲଯୋବା ଛକରେ କିଛି ଦୁର୍ବୁତ୍ତ ହଠାତ୍ ତାଙ୍କ ସାମ୍ନାକୁ ଆସି ଗାଡି ଅଟକାଇଥିଲେ । ଏହାପରେ ତାଙ୍କ ଗଳା କାଟି ହତ୍ୟା କରିଥିଲେ । ଏହାପରେ ରାସ୍ତାରେ ରକ୍ତ ଜୁଡୁବୁଡୁ ଅବସ୍ଥାରେ ପଡ଼ିଥିବା ଦେଖି ପୋପୁଲିସ କୁ ଖବର ଦେଇଥିଲେ ସ୍ଥାନୀୟ ଲୋକେ ।
ଖବର ପାଇ ଘଟଣାସ୍ଥଳରେ ରାୟଗଡା ଏସଡିପିଓ ରଶ୍ମିରଞ୍ଜନ ସେନାପତିଙ୍କ ସହ କାଶୀପୁର ଥାନା ଅଧିକାରୀ ସୂର୍ଯ୍ୟ ପ୍ରକାଶ ନାୟକଙ୍କ ସହ ପୋଲିସ ଟିମ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରୁଛନ୍ତି । କିଏ ଆଉ କଣ ପାଇଁ ଏହି ହତ୍ୟାକାଣ୍ଡ ଭିଆଇଲା ଜଣାପଡିନଥିବାବେଳେ, ପୂର୍ବ ଶତୃତା କାରଣରୁ ଏହା ଘଟିଥିବା ସନ୍ଦେହ କରୁଛି ପୋଲିସ ।
