କଟକ (ମାନସ କୁମାର ନାୟକ) : ସାଙ୍ଗ ମାନଙ୍କ ସହିତ ମହାନଦୀରେ ଗାଧୋଇବା ହେଲା କାଳ । ଜଗତପୁର ଥାନା ଅନ୍ତର୍ଗତ ବାଲିସାହି ପାଖ ମହାନଦୀକୁ ଗାଧୋଇବାକୁ ଯାଇଥିଲେ ପ୍ରାୟ ୧୦ଜଣ ସାଙ୍ଗ। ସେମାନଙ୍କ ମଧ୍ୟରୁ ଜଣେ ସାଙ୍ଗ ଗାଧୋଇବା ବେଳେ ବୁଡି ଯାଉଥିଲେ। ଏହାଦେଖି ରାଜକିଶୋର ବିଦ୍ୟାପୀଠର ଅଷ୍ଟମ ଶ୍ରେଣୀର ୨ଜଣ ଛାତ୍ର ବୁଡି ଯାଉଥିବା ସାଙ୍ଗକୁ ପାଣିରୁ ଉଦ୍ଧାର କରିବାକୁ ଚେଷ୍ଟା କରିଥିଲେ। ହେଲେ ଉଦ୍ଧାର କରିବା ସମୟରେ ଅସାବଧାନତା କାରଣରୁ ୨ଜଣ ଛାତ୍ର ମହାନଦୀର ଭରା ପାଣିରେ ବୁଡି ନିଖୋଜ ହୋଇଗଲେ।
ଜଗତପୁର ଥାନା ପୋଲିସ ଠାରୁ ଖବରପାଇ ଚାଉଳିଆଗଞ୍ଜ ଅଗ୍ନିଶମ କେନ୍ଦ୍ର ଏବଂ ଓଡ୍ରାଫ ଟିମ୍ ଘଟଣାସ୍ଥଳରେ ପହଞ୍ଚି ସର୍ଚ୍ଚ ଅପରେସନ ଆରମ୍ଭ କରିଥିଲେ। ଉଦ୍ଧାରକାରୀ ଟିମ୍ ପକ୍ଷରୁ ସ୍କୃବା ଡ୍ରାଇଭରକୁ ନିୟୋଜିତ କରାଯାଇଥିଲା।
ଦୀର୍ଘ ୩ଘଣ୍ଟାର ସର୍ଚ୍ଚ ଅପରେସନ ପରେ ଇମାମନଗର ସାମଲ ସାହିର ୧୪ବର୍ଷୀୟ ଆର୍ୟନ୍ ନାୟକଙ୍କ ମୃତଦେହକୁ ପାଣି ମଧ୍ୟରୁ ଉଦ୍ଧାର କରାଯାଇଥିଲା। ସନ୍ଧ୍ୟା ସୁଧା ବ୍ୟାରେଜ୍ କଲୋନୀର ୧୪ବର୍ଷୀୟ ମନୋରଞ୍ଜନ ବେହେରାଙ୍କ ନିଖୋଜ ରହିଥିଲେ। ଅନ୍ଧାର କାରଣରୁ ଉଦ୍ଧାରକାରୀ ଟିମ୍ ଉଦ୍ଧାର କାର୍ଯ୍ୟକୁ ସ୍ଥଗିତ ରଖି ଗତକାଲି ସକାଳେ ପୁନର୍ବାର ଖୋଜୁଥିବା ତାଙ୍କ ମୃତ ଦେହ ଉଦ୍ଧାର କରାଯାଇଛି।
ସୂଚନା ଅନୁସାରେ,ଅଷ୍ଟମ ଶ୍ରେଣୀ ଛାତ୍ରଛାତ୍ରୀଙ୍କ ବର୍ତ୍ତମାନ ଷାଣ୍ମାସିକ ପରୀକ୍ଷା ଜାରି ରହିଛି। ଆଜି ଡ୍ରଇଂ ପରୀକ୍ଷା ଥିବାରୁ ଅପରାହ୍ନ ୨ଟା ମଧ୍ୟରେ ପରୀକ୍ଷା ଶେଷ ହୋଇଥିଲା। ହାତରେ କିଛି ସମୟ ପାଇ ମହାନଦୀକୁ ସାଙ୍ଗ ହୋଇ ଗାଧୋଇବାକୁ ଆସିଥିବା ବେଳେ ଏଭଳି ଦୁଃଖଦ ଘଟଣା ଘଟିଯାଇଛି।
