ଆଗରପଡ଼ା :ଗତ ୧୩ ତାରିଖ ଶୁକ୍ରବାର ରାତିରେ ଗଣେଶ ଭସାଣୀ ଶୋଭା ଯାତ୍ରା ବେଳେ ଭୁଜାଲିରେ ଆକ୍ରମଣ କରିବା ସହ ଘରଗ୍ରିଲ୍ ଭାଙ୍ଗି ସୁନାଗହଣା ଲୁଟପାଟ କରିବା ଘଟଣାରେ ସଂପୃକ୍ତ ୨ ଜଣ ଅଭିଯୁକ୍ତଙ୍କୁ ପୋଲିସ ଗିରଫ କରିଥିବାର ଜଣାପଡ଼ିଛି । ପ୍ରାପ୍ତ ସୂଚନାନୁଯାୟୀ;ଆଗରପଡ଼ା ଥାନା ଅନ୍ତର୍ଗତ ନରିପୁର ଗ୍ରାମରେ ଗଣେଶମେଢ଼ ଭସାଣୀ ଗାଁ ପରିକ୍ରମା କରୁଥିଲା । ସେହି ଗ୍ରାମର ପ୍ରଭାକର ପଣ୍ଡାଙ୍କ ଘରସାମ୍ନା ରାସ୍ତାରେ ଏକ ବାଇକ୍ ରହିଥିବାର ଦେଖି ଶୋଭାଯାତ୍ରାକାରୀମାନେ ଉତ୍ତ୍ୟକ୍ତ ହୋଇ ଏହି ବାଇକ୍ ସହ ଅନ୍ୟ ଗୋଟେ ବାଇକ୍ ଓ ସ୍କୁଟିକୁ ପିଟି ଭାଙ୍ଗିଦେଇଥିଲେ । ଏହା ଦେଖି ପ୍ରଭାକର ପଣ୍ଡାଙ୍କ ପୁଅ ଗିରିଜା ଶଙ୍କର ଏହାର କାରଣ ପଚାରିବାରୁ ତାଙ୍କୁ ଭୁଜାଲିରେ ହାଣି ଦେଇଥିଲେ । ତାଙ୍କ ପତ୍ନୀ ଏହା ଦେଖି ଛଡାଛଡ଼ି କରୁଥିବାବେଳେ ତାଙ୍କୁ ମଧ୍ୟ ଦୁର୍ବ୍ୟବହାର କରିଥିଲେ । ହାତୁଡ଼ିରେ ଘର ଗ୍ରୀଲକୁ ଭାଙ୍ଗି ସୁନାଗହଣା ଲୁଟପାଟ କରିଥିବାର ଥାନାରେ ଅଭିଯୋଗ ହୋଇଛି । ଏହି ଘଟଣା ଆହୁରି ଭୟଙ୍କର ରୂପ ନେବା ପୂର୍ବରୁ ଖବର ପାଇ ପୋଲିସ ଘଟଣାସ୍ଥଳରେ ପହଂଚି ପରିସ୍ଥିତିକୁ ନିୟନ୍ତ୍ରଣ କରିଥିଲା । ଏହି ସଂପର୍କରେ ଥାନା କେସନଂ ୧୮୦/୨୪ରେ ମାମଲା ରୁଜ୍ଜୁ କରି ଅଭିଯୁକ୍ତ ଚନ୍ଦ୍ରକାନ୍ତ ଦେହୁରୀ ଓ ମାନସ ଦେହୁରୀଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି ବୋଲି ଥାନା ସୂତ୍ରରୁ ଜଣାପଡ଼ିଛି । ଅପର ପକ୍ଷରେ ୧୮୧/୨୪ରେ ଅନ୍ୟ ଏକ ମାମଲା ରୁଜ୍ଜୁ କରି ପୋଲିସ ତଦନ୍ତ ଜାରି ରଖିଥିବାର ଜଣାପଡ଼ିଛି ।
