ବିଧାୟକ ମାନଙ୍କ ସହ କଲେ ବିଭାଗୀୟ କାର୍ଯ୍ୟ ଓ ଯୋଜନା ମାନଙ୍କର ସମୀକ୍ଷା
ବାରିପଦା: ମାନ୍ୟବର ଜଙ୍ଗଲ, ପରିବେଶ ଏବଂ ପର୍ଯ୍ୟାବରଣ ତଥା ଶ୍ରମ ମନ୍ତ୍ରୀ ଶ୍ରୀ ଗଣେଶ ରାମସିଂ ଖୁଣ୍ଟିଆ ରବିବାର ଦିନ ବାରିପଦା ଗସ୍ତରେ ଆସି ବିଭାଗୀୟ କାର୍ଯ୍ୟ ଗୁଡିକର ସମୀକ୍ଷା କରିବା ସହିତ ଆଗାମୀ ପଦକ୍ଷେପ ଏବଂ କାର୍ଯ୍ୟପନ୍ଥା ବିଷୟରେ ଜିଲ୍ଲା ସ୍ତରୀୟ ଓ ବିଭାଗୀୟ ଅଧିକାରୀ ମାନଙ୍କ ସହିତ ଆଲୋଚନା ତଥା ବିମର୍ଶ କରିଥିଲେ। ବାରିପଦାସ୍ଥ ମଞ୍ଚାବନ୍ଧା ବନ୍ୟ ବିଭାଗୀୟ ଡାକବଙ୍ଗଳା ବୈଠକ ଗୃହରେ ଏହି ସମୀକ୍ଷା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏହି ବୈଠକରେ ବନ ଖଣ୍ଡ ବିଭାଗ ସମେତ ମାନ୍ୟବର ମନ୍ତ୍ରୀ ଶ୍ରୀ ଖୁଣ୍ଟିଆ, ମୟୂରଭଞ୍ଜ ପ୍ରଭାଗୀୟ ଶ୍ରମ ଅଯୁକ୍ତଙ୍କ କାର୍ଯ୍ୟାଳୟ, ଜିଲ୍ଲା କର୍ମଚାରୀ ରାଜ୍ୟ ବୀମା କାର୍ଯ୍ୟାଳୟଙ୍କ ବିଭାଗୀୟ କାର୍ଯ୍ୟର ଜିଲ୍ଲା ସ୍ତରୀୟ ମାନକ ବୃଦ୍ଧି ପାଇଁ ସମୀକ୍ଷା କରିଥିଲେ। ସୂଚନା ଥାଉକି ବିଭିନ୍ନ ଯୋଜନା ଅଧୀନରେ ଜଙ୍ଗଲ କାର୍ଯ୍ୟକଳାପ ଏବଂ ଚାଲୁଥିବା ବୃକ୍ଷରୋପଣ କାର୍ଯ୍ୟକ୍ରମର ସମୀକ୍ଷା, ମୟୂରଭଞ୍ଜ ଜିଲ୍ଲାର କାରଖାନା, ବଏଲର ସଂଗଠନର କାର୍ଯ୍ୟକଳାପର ସମୀକ୍ଷା ଏବଂ ଜଙ୍ଗଲ ଭିତ୍ତିଭୂମି ବିକାଶ ପାଇଁ ଆୟୋଜିତ ଏହି ସମୀକ୍ଷା ବୈଠକରେ ମାନ୍ୟବର ମନ୍ତ୍ରୀଙ୍କ ସହ ମାନ୍ୟବର ବିଧାୟକ, ଉଦଳା ଶ୍ରୀ ଭାସ୍କର ଚନ୍ଦ୍ର ମଢେଇ ଏବଂ ମାନ୍ୟବର ବିଧାୟକ ବାରିପଦା ଶ୍ରୀ ପ୍ରକାଶ ସୋରେନ ମଧ୍ୟ ଯୋଗ ଦେଇ ଜିଲ୍ଲାରେ ତଥା ନିଜ ନିଜ ବ୍ୟକ୍ତିଗତ ନିର୍ବାଚନ ମଣ୍ଡଳୀରେ ହୋଇ ଆସୁଥିବା ଏବଂ ହେଉଥିବା ବିଭିନ୍ନ ଉନ୍ନତିମୂଳକ ଏବଂ କେନ୍ଦ୍ର ତଥା ରାଜ୍ୟ ସରକାରଙ୍କର ଜନହିତକର କାର୍ଯ୍ୟ ଗୁଡିକର ପ୍ରଗତି ସମ୍ବନ୍ଧରେ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଥିଲେ।
ମୁଖ୍ୟତଃ କେନ୍ଦ୍ର ସରକାରଙ୍କର ଏକ ପେଡ ମା କେ ନାମର ପ୍ରୟାଗ ଜିଲ୍ଲାରେ କିଭଳି ହେଉଛି ସେ ବିଷୟରେ ବିଶଦ ବିବରଣୀ, ମନ୍ତ୍ରୀ ଶ୍ରୀ ଖୁଣ୍ଟିଆ ପଚାରି ବୁଝିଥିଲେ ଏବଂ ଜିଲ୍ଲାରେ ଏହାର ସୁଉଚ୍ଚ ପ୍ରକ୍ରିୟାକରଣ ବିଷୟରେ ଜାଣିବାକୁ ପାଇ ସନ୍ତୁଷ୍ଟ ଥିବାର ପ୍ରକାଶ କରିଥିଲେ। ଏଥି ସହିତ ମାନ୍ୟବର ମନ୍ତ୍ରୀ ଶ୍ରୀ ଖୁଣ୍ଟିଆ ଜଙ୍ଗଲ ନିଆଁ ବିଷୟରେ ବନ ଅଧିକାରୀ ଙ୍କୁ ପଚାରି ବୁଝିଥିଲେ l ଏହାର ଉତ୍ତରରେ ବାରିପଦା ବନଖଣ୍ଡ ଅଧିକାରୀ କହିଥଲେ ଯେ ଏହି ଜଙ୍ଗଲ ନିଆଁ ଏକ ପ୍ରାକୃତିକ ଘଟଣା କିନ୍ତୁ ମନୁଷ୍ୟକୃତ ଜଙ୍ଗଲ ନିଆଁ କୁ ଜିଲାରେ ସମ୍ପୂର୍ଣ୍ଣ ରୂପେ ନିଷେଧ କରାଯାଇଅଛି l ସେଥିପାଇଁ ସମସ୍ତ ବନଖଣ୍ଡରେ ଜନସଚେତନତା ଏବଂ ଜଙ୍ଗଲ ସୁରକ୍ଷା ବିଷୟରେ ଶିକ୍ଷଣ ଦିଆଯାଇଅଛି ବୋଲି ପ୍ରକାଶ କରିଥିଲେ l ଏହି ସମୀକ୍ଷା ବୈଠକରେ, କ୍ଷେତ୍ର ନିର୍ଦ୍ଦେଶକ, ଶିମିଳିପାଳ ଟାଇଗର ରିଜର୍ଭ, ଡଃ ପ୍ରକାଶ ଗୋଗିନେନି, ଉପ-ନିର୍ଦ୍ଦେଶକ, ଶିମିଳିପାଳ (ଦକ୍ଷିଣ), ଶ୍ରୀ ସମ୍ରାଟ ଗୌଡା, ବିଭାଗୀୟ ଜଙ୍ଗଲ ଅଧିକାରୀ, ବାରିପଦା ଶ୍ରୀ ଉମା ମହେଶ, ସହକାରୀ ବନ ସଂରକ୍ଷଣକାରୀ, ଶ୍ରୀ ରବି ନାରାୟଣ ମହାନ୍ତି ଓ ଶ୍ରୀ ଅରୁଣ ବିଶ୍ୱାଳଂକ ସମେତ ଜିଲ୍ଲା ଶ୍ରମ ଅଧିକାରୀ ଶ୍ରୀ ଅନନ୍ତ ମହାମାନସିଂ ଓ ଅନ୍ୟାନ୍ୟ ବନ ବିଭାଗୀୟ ଓ ବିଭାଗୀୟ ଅଧିକାରୀ ଉପସ୍ଥିତ ଥିଲେ ।
