ରାଞ୍ଚି: ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଚମ୍ପଇ ସୋରେନ ସୋମବାର ରାଞ୍ଚିର ରାଜ ଭବନରେ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ନେତୃତ୍ୱାଧୀନ ଝାଡଖଣ୍ଡ କ୍ୟାବିନେଟରେ ମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ଜୁଲାଇ ୪ରେ ହେମନ୍ତ ସୋରେନ ଝାଡଖଣ୍ଡର ୧୩ତମ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବା ପୂର୍ବରୁ ଚମ୍ପଇ ସୋରେନ ଜୁଲାଇ ୩ରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ।
ଚମ୍ପଇ ସୋରେନଙ୍କ ବ୍ୟତୀତ ଜେଏମଏମ ନେତା ବୈଦନାଥ ରାମ, ବାବି ଦେବୀ, ମିଥିଳେଶ ଠାକୁର, ଦୀପକ ବିରୁଆ ଏବଂ ହାଫିଜୁଲ ହସନ ମଧ୍ୟ ମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। କଂଗ୍ରେସ ନେତା ରାମେଶ୍ୱର ଓରାୱଂ, ବନ୍ନା ଗୁପ୍ତା, ଇରଫାନ୍ ଅନସାରୀ, ଦୀପିକା ପାଣ୍ଡେ ସିଂ ଏବଂ ଆରଜେଡି ନେତା ସତ୍ୟନନ୍ଦ ଭୋକ୍ତା ମଧ୍ୟ କ୍ୟାବିନେଟରେ ଯୋଗ ଦେଇଛନ୍ତି। ଏହାପୂର୍ବରୁ ହେମନ୍ତ ସୋରେନ ବିଧାନସଭାର ସ୍ୱତନ୍ତ୍ର ଅଧିବେଶନରେ ୪୫ ଜଣ ବିଧାୟକଙ୍କ ସମର୍ଥନରେ ଆସ୍ଥା ଭୋଟ୍ ଜିତିଥିଲେ।
ହେମନ୍ତଙ୍କୁ ପ୍ରାୟ ପାଞ୍ଚ ମାସ ପରେ ଜୁନ୍ ୨୮ରେ ବିର୍ସା ମୁଣ୍ଡା ଜେଲରୁ ମୁକ୍ତ କରାଯାଇଥିଲା। ଜମି ଦୁର୍ନୀତି ସହ ଜଡିତ ଅର୍ଥ ହେରଫେର ମାମଲାରେ ସେ ଝାଡଖଣ୍ଡ ହାଇକୋର୍ଟରୁ ଜାମିନ ପାଇଥିଲେ। ଜାନୁଆରୀ ୩୧ ରେ ଗିରଫ ହେବା ପୂର୍ବରୁ ସେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ଜମି ଦୁର୍ନୀତି ଏବଂ ଅର୍ଥ ହେରଫେର ଅଭିଯୋଗରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଦ୍ୱାରା ତାଙ୍କୁ ଗିରଫ କରାଯାଇଥିଲା।
ହେମନ୍ତଙ୍କୁ ଗିରଫ କରାଯିବା ପରେ ଚମ୍ପଇ ସୋରେନ ଫେବୃଆରୀ ୨ ରେ ମୁଖ୍ୟମନ୍ତ୍ରୀ ଭାବରେ ଦାୟିତ୍ବ ଗ୍ରହଣ କରିଥିଲେ। ୫ ମାସ ପରେ ସେ ଏହି ପଦରୁ ଇସ୍ତଫା ଦେଇଥିଲେ। ଏକ ଭିଡିଓ ବାର୍ତ୍ତାରେ ହେମନ୍ତ ସୋରେନ ବିଜେପିକୁ ମିଥ୍ୟା ମାମଲାରେ ସମ୍ପୃକ୍ତ କରିଥିବା ଅଭିଯୋଗ କରିଛନ୍ତି। ସେ କହିଛନ୍ତି, ୨୦୧୯ ଝାଡଖଣ୍ଡ ବିଧାନସଭା ନିର୍ବାଚନରେ ଲୋକମାନେ ଆମ ଦଳକୁ ଜନାଦେଶ ଦେଇଛନ୍ତି, କିନ୍ତୁ ଷଡଯନ୍ତ୍ରକାରୀମାନେ ବଡ ପଦବୀରେ ଆଦିବାସୀ ଯୁବକଙ୍କ ଉପସ୍ଥିତି ହଜମ କରି ପାରୁ ନାହାନ୍ତି। ଜାନୁୟାରୀ ୩୧ ରେ ବିଜେପି ମୋତେ ଏହି ପଦବୀରୁ ହଟାଇ ଦେଇଥିଲା।
ମୁଖ୍ୟମନ୍ତ୍ରୀ ଭାବରେ ହେମନ୍ତ ସୋରେନଙ୍କ ପ୍ରତ୍ୟାବର୍ତ୍ତନ ଲୋକସଭା ନିର୍ବାଚନରେ ଆଦିବାସୀ ପ୍ରାଧାନ୍ୟରେ ଥିବା ଝାଡଖଣ୍ଡରେ ତିନିଟି ଆସନ ଜିତିଥିବା ଜେଏମଏମର ଶକ୍ତି ବୃଦ୍ଧି କରିବ ବୋଲି ଆଶା କରାଯାଉଛି। ୨୦୧୯ ରେ, ଜେଏମଏମ କଂଗ୍ରେସ ଏବଂ ଲାଲୁ ପ୍ରସାଦ ଯାଦବଙ୍କ ରାଷ୍ଟ୍ରୀୟ ଜନତା ଦଳ (ଆରଜେଡି) ସହିତ ମିଳିତ ଭାବରେ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ୮୧ ସଦସ୍ୟ ବିଶିଷ୍ଟ ବିଧାନସଭାରେ ୪୭ ଟି ଆସନ ସହ ସଂଖ୍ୟାଗରିଷ୍ଠତା ହାସଲ କରିଥିଲା।
