ନୂଆଦିଲ୍ଲୀ: ଲୋକସଭା ନିର୍ବାଚନ ପୂର୍ବରୁ ପଶ୍ଚିମବଙ୍ଗରେ ତୃଣମୂଳ କଂଗ୍ରେସକୁ ଡବଲ ଝଟକା ଲାଗିଛି | ଆଜି ପଶ୍ଚିମବଙ୍ଗର ବାରକପୁର ସାଂସଦ ତଥା ବିଦ୍ରୋହୀ ନେତା ଅର୍ଜୁନ ସିଂଙ୍କ ସହ ଅନ୍ୟ ଜଣେ ସାଂସଦ ଦିବେନ୍ଦୁ ଅଧିକାରୀ ଭାରତୀୟ ଜନତା ପାର୍ଟିରେ ଯୋଗ ଦେଇଛନ୍ତି। ଏହି ଦୁଇ ନେତା ଦିଲ୍ଲୀର ବିଜେପି ମୁଖ୍ୟାଳୟରେ ଦଳରେ ଯୋଗ ଦେଇଥିଲେ। ଦିବେନ୍ଦୁ ଅଧିକାରୀ ହେଉଛନ୍ତି ଭେଟେରାନ ବିଜେପି ନେତା ତଥା ବିଧାନସଭାରେ ବିରୋଧୀଦଳର ନେତା ଶୁଭେନ୍ଦୁ ଅଧିକାରୀଙ୍କ ଭାଇ। ଏହାପୂର୍ବରୁ ଶୁଭେନ୍ଦୁ ଅଧିକାରୀ ମଧ୍ୟ ତୃଣମୂଳ କଂଗ୍ରେସରେ ଥିଲେ। ପଶ୍ଚିମବଙ୍ଗର ତମଲୁକ ଲୋକସଭା ଆସନରୁ ଦିବେନ୍ଦୁ ଅଧିକାରୀ ଟିଏମସିର ଜଣେ ସାଂସଦ ଥିବାବେଳେ ଏଥର ମମତା ବାନାର୍ଜୀ ଦିବେନ୍ଦୁଙ୍କ ସ୍ଥାନରେ ତମଲୁକରୁ ଦେବାଂଶୁ ଭଟ୍ଟାଚାର୍ଯ୍ୟଙ୍କୁ ଟିଏମସି ପ୍ରାର୍ଥୀ କରିଛନ୍ତି।
ଏହା ପରେ ଦିବେନ୍ଦୁ ତ୍ରୖବମୂଳ କଂଗ୍ରେସ ଛାଡିବାକୁ ନିଷ୍ପତ୍ତି ନେଇଛନ୍ତି। ଅନ୍ୟପଟେ ଅର୍ଜୁନ ସିଂ ପଶ୍ଚିମବଙ୍ଗର ଜଣେ ଭେଟେରାନ ନେତା। ସେ ବର୍ତ୍ତମାନ ବାରାକପୁରର ସାଂସଦ ଥିବାବେଳେ ୨୦୧୯ ଲୋକସଭା ନିର୍ବାଚନରେ ସେ ବାରାକପୁରରୁ ବିଜେପି ଟିକେଟରେ ଜିତିଥିଲେ। ଅବଶ୍ୟ, ଯେତେବେଳେ ୨୦୨୧ ମସିହାରେ ବିଜେପି ରାଜ୍ୟରେ ସରକାର ଗଠନ କରିନଥିଲା, ସେତେବେଳେ ସେ ୨୦୨୨ରେ ତୃଣମୂଳ କଂଗ୍ରେସରେ ଯୋଗ ଦେଇଥିଲେ। ୨୦୧୯ ଲୋକସଭା ନିର୍ବାଚନ ପୂର୍ବରୁ ମଧ୍ୟ ସେ ତୃଣମୂଳ କଂଗ୍ରେସରେ ଥିଲେ ଏବଂ ଭାଟପାଡାରୁ ବିଧାୟକ ଥିଲେ। ସେ ୨୦୧୯ ଲୋକସଭା ନିର୍ବାଚନରେ ବିଜେପି ଟିକେଟରେ ନିର୍ବାଚନ ଲଢ଼ି ତୃଣମୂଳ କଂଗ୍ରେସ ପ୍ରାର୍ଥୀ ତଥା ପୂର୍ବତନ ରେଳମନ୍ତ୍ରୀ ଦୀନେଶ ତ୍ରିବେଦୀଙ୍କୁ ପରାସ୍ତ କରିଥିଲେ । ଏଥର ଟିଏମସି ତାଙ୍କୁ ୨୦୨୪ ଲୋକସଭା ନିର୍ବାଚନ ପାଇଁ ଟିକେଟ ଦେଇନଥିଲା | ଏହା ପରେ ସେ ଦଳ ବିରୋଧରେ ବିଦ୍ରୋହୀ ଆଭିମୁଖ୍ୟ ଗ୍ରହଣ କରିଥିଲେ ।
