ଭୋପାଳ: ଭାରତୀୟ ଜନତା ପାର୍ଟି (ବିଜେପି)ର ବରିଷ୍ଠ ନେତା ତଥା ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ କହିଛନ୍ତି ଯେ ବେଳେବେଳେ ରାଜ୍ୟାଭିଷେକକୁ ଅପେକ୍ଷା କରିଥିବା ବ୍ୟକ୍ତି ବନବାସ ପଳାଇଯାଏ ।
ନଭେମ୍ବର ୨୦୨୩ରେ ଅନୁଷ୍ଠିତ ମଧ୍ୟପ୍ରଦେଶ ବିଧାନସଭା ନିର୍ବାଚନରେ ବିଜେପିର ବିପୁଳ ବିଜୟ ପରେ ଦଳ ଚୌହାନଙ୍କ ବଦଳରେ ମୋହନ ଯାଦବଙ୍କୁ ମୁଖ୍ୟମନ୍ତ୍ରୀ ଭାବେ ଚୟନ କରିଥିଲା। ଶିବରାଜ ସିଂହ ଚୌହାନ ୪ ଥର ରାଜ୍ୟର ମୁଖ୍ୟମନ୍ତ୍ରୀ ହୋଇଛନ୍ତି। ଗତକାଲି ସନ୍ଧ୍ୟାରେ ନିଜ ବୁଦ୍ଧନୀ ବିଧାନସଭା ଆସନ ଅନ୍ତର୍ଗତ ଶାହାଗଞ୍ଜ ସହରରେ ଏକ ସାଧାରଣ ସଭାକୁ ସମ୍ବୋଧିତ କରି ଚୌହାନ ଭାବପ୍ରବଣ ହୋଇ କହିଛନ୍ତି ଯେ ସେ ଲୋକଙ୍କ ମଧ୍ୟରେ, ବିଶେଷକରି ତାଙ୍କ ଭଉଣୀମାନଙ୍କ ମଧ୍ୟରେ ସବୁବେଳେ ରହିବେ। ଏହି ସମୟରେ ଦର୍ଶକଙ୍କ ମଧ୍ୟରେ ବସିଥିବା କିଛି ମହିଳା କହିଥିଲେ, ଭାଇ, ଆମକୁ ଏକୁଟିଆ ଛାଡି କେଉଁଆଡ଼େ ଯାଆନ୍ତୁ ନାହିଁ। ଏହାର ଉତ୍ତରରେ ଚୌହାନ କହିଛନ୍ତି, ମୁଁ କୌଣସି ସ୍ଥାନକୁ ଯିବି ନାହିଁ। ମୁଁ ଏଠାରେ ରହିବି ଏବଂ ଏଠାରେ ମରିବି।
ସେ କହିଛନ୍ତି ଯେ ପୂର୍ବ ବିଜେପି ସରକାର ଆରମ୍ଭ କରିଥିବା ସମସ୍ତ କାର୍ଯ୍ୟ ବର୍ତ୍ତମାନର ସରକାର ସମ୍ପୂର୍ଣ୍ଣ କରିବେ, ଯେଉଁଥିରେ ଲାଡଲି ବେହନା ଯୋଜନା (ମହିଳା କଲ୍ୟାଣ ପାଇଁ), ଲାଡଲି ବେହନା ଯୋଜନାର ହିତାଧିକାରୀଙ୍କ ପାଇଁ ଆବାସ ଯୋଜନା, ପ୍ରତ୍ୟେକ ପରିବାରରେ ଏକ ଚାକିରି ଯୋଜନା ଏବଂ କୃଷକମାନଙ୍କୁ ଦିଆଯାଇଥିବା ପ୍ରତିଶ୍ରୁତି ଅନ୍ତର୍ଭୁକ୍ତ । ଜନସଭାକୁ ସମ୍ବୋଧିତ କରି ଶ୍ରୀ ଚୌହାନ କହିଛନ୍ତି, ନୂଆ ସରକାର ଏହି ସବୁ କାର୍ଯ୍ୟକୁ ଆଗକୁ ବଢ଼ାଇବେ। ବେଳେବେଳେ ରାଜ୍ୟାଭିଷେକକୁ ଅପେକ୍ଷା କରିଥିବା ବ୍ୟକ୍ତି ବନବାସ ପଳାଇଯାଏ , କିନ୍ତୁ ଏହା ପଛରେ କୌଣସି ବଡ଼ ଉଦ୍ଦେଶ୍ୟ ଥିବ ।
