ନୂଆଦିଲ୍ଲୀ: ଇସ୍ରାଏଲ ଏବଂ ହାମାସ ମଧ୍ୟରେ ଚାଲିଥିବା ଲଢେଇ ଦ୍ୱାରା ସମଗ୍ର ବିଶ୍ୱ ପ୍ରଭାବିତ ହୋଇଛି | ଲୋକମାନେ ନିଜ-ନିଜ ମତ ଅନୁଯାୟୀ ଉଭୟ ଇସ୍ରାଏଲ ଓ ହାମାସ ପକ୍ଷ ନେଉଛନ୍ତି। ତେବେ ଉତ୍ତରପ୍ରଦେଶର ଆଲିଗଡରେ ଥିବା ଆଲିଗଡ ମୁସଲିମ ବିଶ୍ୱବିଦ୍ୟାଳୟ (ଏମୟୁ) ରେ ମଧ୍ୟ ଏଭଳି ଘଟଣା ଘଟିଛି। ଏଏମୟୁର କିଛି ଛାତ୍ର ପାଲେଷ୍ଟାଇନ ସମର୍ଥନରେ ସ୍ଲୋଗାନ ଦେଇଥିଲେ। ଆଉ ପାଲେଷ୍ଟାଇନ ସମର୍ଥନରେ ସ୍ଲୋଗାନ ଦେଇଥିବା ଏହି ୪ ଜଣ ଛାତ୍ରଙ୍କ ବିରୋଧରେ ଏଫ୍ଆଇଆର୍ ଦାଖଲ କରାଯାଇଛି। ଅନ୍ୟପକ୍ଷରେ, ହାମାସ ଏବଂ ଇସ୍ରାଏଲ ମଧ୍ୟରେ କ୍ରମାଗତ ଯୁଦ୍ଧ ଚାଲିଛି ଏବଂ ଉଭୟ ପରସ୍ପର ଉପରେ ଆକ୍ରମଣ କରୁଛନ୍ତି। ଅଦ୍ୟାବଧି ହଜାର ହଜାର ଲୋକ ପ୍ରାଣ ହରାଇଛନ୍ତି ଏବଂ ଅନେକ ସହର ସମ୍ପୂର୍ଣ୍ଣ ଧ୍ୱଂସ ହୋଇଯାଇଛି। ଆଲିଗଡ ପୁଲିସ ଅଧୀକ୍ଷକ ମୃଗାଙ୍କ ଶେଖର ପାଠକ କହିଛନ୍ତି ଯେ ଏହି ଘଟଣାରେ ଅନେକ ଛାତ୍ରଙ୍କ ବିରୋଧରେ ମାମଲା ରୁଜୁ ହୋଇଛି ଯେଉଁଥିରୁ ଚାରିଜଣଙ୍କ ନାମ ରହିଛି।
ଏହି ୪ ଜଣ ଛାତ୍ର ହେଉଛନ୍ତି ଆତିଫ, ଖାଲିଦ, କାମରାନ ଓ ନଭେଦ ଚୌଧୁରୀ | ସେ କହିଛନ୍ତି ଯେ ଛାତ୍ରମାନଙ୍କୁ ଭାରତୀୟ ଦଣ୍ଡ ସଂହିତାର ଧାରା ୧୫୩ଏ (ଧର୍ମ, ଜାତି, ଜନ୍ମ ସ୍ଥାନ, ଭାଷା ଇତ୍ୟାଦି କାରଣରୁ ବିଭିନ୍ନ ଗୋଷ୍ଠୀ ମଧ୍ୟରେ ଶତ୍ରୁତାକୁ ପ୍ରୋତ୍ସାହନ), ୧୮୮ (ଜଣେ ସରକାରୀ କର୍ମଚାରୀଙ୍କ ଦ୍ୱାରା ଆଦେଶକୁ ଅବମାନନା) ଏବଂ ୫୦୫ ଅନୁଯାୟୀ ମାମଲା ପଞ୍ଜିକୃତ ହୋଇଛି | ଏହି ଛାତ୍ରମାନେ ରବିବାର ରାତିରେ ଏଏମୟୁ କ୍ୟାମ୍ପସରେ ଡକ୍ ପଏଣ୍ଟରୁ ସାର୍ ସୟଦ ଗେଟ୍ ପର୍ଯ୍ୟନ୍ତ ଏକ ବିରୋଧ ପ୍ରଦର୍ଶନ କରିଥିଲେ। ପୁଲିସ କହିଛି ଯେ ବିକ୍ଷୋଭକାରୀମାନେ ସେମାନଙ୍କ ରାଲି ପାଇଁ କୌଣସି ଅନୁମତି ନେଇନଥିଲେ | ଏଫ୍ଆଇଆରରେ କୁହାଯାଇଛି ଯେ ଛାତ୍ରମାନେ ଏକ ‘ଉଗ୍ରବାଦୀ ଗୋଷ୍ଠୀ’କୁ ସମର୍ଥନ କରି ବିରୋଧ କରିଥିଲେ। ଉଲ୍ଲେଖ ଥାଉ କି ଯେ ଭାରତ ସରକାର ଇସ୍ରାଏଲ ଏବଂ ହାମାସ୍ ମଧ୍ୟରେ ହୋଇଥିବା ଏହି ଯୁଦ୍ଧରେ ଇସ୍ରାଏଲ ସହିତ ଛିଡ଼ା ହେବାକୁ ଘୋଷଣା କରିଛନ୍ତି। ଅନ୍ୟପଟେ କଂଗ୍ରେସ କିନ୍ତୁ ପାଲେଷ୍ଟାଇନକୁ ସମର୍ଥନ ଘୋଷଣା କରିଛି। ସୋମବାର କଂଗ୍ରେସ କାର୍ଯ୍ୟକାରିଣୀ ବୈଠକରେ ଶେଷ ମୁହୂର୍ତ୍ତରେ ଏ ସଂକ୍ରାନ୍ତରେ ଏକ ସଂକଳ୍ପ ମଧ୍ୟ ପାରିତ ହୋଇଥିଲା। ଏହା ପୂର୍ବରୁ ମଧ୍ୟ କଂଗ୍ରେସ ଅନେକ ଥର ପାଲେଷ୍ଟାଇନ୍କୁ ଖୋଲାଖୋଲି ସମର୍ଥନ କରିଛି।
