ମୁମ୍ବାଇ: ଏନସିପି ସୁପ୍ରିମୋ ଶରଦ ପାୱାରଙ୍କୁ ଝଟକା ଦେଇ ଆଜି ସିନ୍ଦେ ସରକାରରେ ସାମିଲ ହୋଇଛନ୍ତି ଅଜିତ ପାୱାର | ମହାରାଷ୍ଟ୍ର ବିଧାନସଭାର ବିରୋଧୀ ଦଳ ନେତା ଘଣ୍ଟାକ ଭିତରେ ଆଜି ଏକନାଥ ସିନ୍ଦେଙ୍କ ସରକାରରେ ସାମିଲ ହୋଇ ଉପମୁଖ୍ୟମନ୍ତ୍ରୀ ହୋଇଛନ୍ତି | ତେବେ ଅଜିତ ପାୱାର ଏକନାଥଙ୍କ ସରକାରରେ ଯୋଗଦେବା ପରେ ଏନସିପି ସୁପ୍ରିମୋ ଶରଦ ପାୱାର କହିଛନ୍ତି ମୁଁ ପୁଣି ଥରେ ଦଳକୁ ଛିଡା କରି ଦେଖାଇବି | ସେ କହିଛନ୍ତି ଯେ ବିଦ୍ରୋହ ପରେ ଅନେକ ଦଳର ନେତା ମୋତେ ଫୋନ କରିଥିଲେ | ଶରଦ ପାୱାର କହିଛନ୍ତି ଯେ ମୁଁ ଜୁଲାଇ ୬ରେ ସମସ୍ତ ନେତାଙ୍କ ସହ ଏକ ବୈଠକ କରିବାକୁ କହିଥିଲି, ଯେଉଁଠାରେ କିଛି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ହୋଇଥାନ୍ତା ଏବଂ ଦଳ ଭିତରେ କିଛି ପରିବର୍ତ୍ତନ କରାଯାଇଥାନ୍ତା | କିନ୍ତୁ ଏହା ପୂର୍ବରୁ କିଛି ନେତା ଭିନ୍ନ ଆଭିମୁଖ୍ୟ ଗ୍ରହଣ କରିଛନ୍ତି। ସମସ୍ତେ ମୋତେ ସମର୍ଥନ କରିଛନ୍ତି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କଠାରୁ ଆରମ୍ଭ କରି କଂଗ୍ରେସ ନେତାମାନେ ମଧ୍ୟ ମୋତେ କଲ କରିଥିଲେ | ବର୍ତ୍ତମାନ ମୁଁ ରାଜ୍ୟ ତଥା ଦେଶ ଭ୍ରମଣ କରିବି ଏବଂ ଦଳର ବିକାଶ ପାଇଁ କାର୍ଯ୍ୟ କରିବି।
ଏନସିପି ନେତା ଶରଦ ପାୱାର ଦଳରେ ବିଭାଜନ ବିଷୟରେ କହିଛନ୍ତି ଯେ ମୁଁ ମୋର ଦଳକୁ ପୁଣି ଥରେ ଠିଆ କରିବି। ୧୯୮୦ରେ ନିର୍ବାଚନ ପରେ ଦଳର ୫୮ ଜଣ ବିଧାୟକ ଜିତିଥିଲେ | କିନ୍ତୁ କେବଳ ୬ ଜଣ ବିଧାୟକଙ୍କ ବ୍ୟତୀତ ସମସ୍ତ ବିଧାୟକ ଦଳ ଛାଡିଥିଲେ। ମୁଁ ୬ ଜଣ ବିଧାୟକଙ୍କ ସହ ଦଳକୁ ଉଠାଇଛି। ମୁଁ ଦଳକୁ ପୁଣି ଥରେ ଠିଆ କରିବି | ପ୍ରଫୁଲ୍ଲ ପଟେଲଙ୍କ ବିଷୟରେ ଶରଦ ପାୱାର କହିଛନ୍ତି ଯେ ତାଙ୍କ ଉପରେ ଆଉ ଭରସା ନାହିଁ। ସେ ମୋ ବିଶ୍ୱାସ ଭାଙ୍ଗିଛନ୍ତି। ପାୱାର କହିଛନ୍ତି ଯେ ସେ ଏକ ବଡ ଭୁଲ କରିଛନ୍ତି। ମହାରାଷ୍ଟ୍ରର ଲୋକମାନେ ମୋତେ ସମର୍ଥନ କରିବେ। ସେହିପରି ସାମ୍ବାଦିକମାନେ ଯେତେବେଳେ ଶରଦ ପାୱାରଙ୍କୁ ପ୍ରଶ୍ନ କରିଥିଲେ ଯେ ଦଳର ବିଶ୍ୱସନୀୟ ଚେହେରା କିଏ ହେବ ବା ଦଳର ସବୁଠାରୁ ବିଶ୍ୱାସଯୋଗ୍ୟ ଚେହେରା କିଏ, ସେତେବେଳେ ସେ ନିଜ ହାତ ଉଠାଇ “ଶରଦ ପାୱାର” ବୋଲି କହିଥିଲେ।
