ନିର୍ବାଚନରେ ମହିଳା ଭୋଟରଙ୍କୁ ଲୁଭାଇବା ପାଇଁ ନୂତନ ଯୋଜନା ସବୁ ଘୋଷଣା କରାଯାଉଛି । ଏହି କ୍ରମରେ ବିହାରରେ ଆସନ୍ତା ବର୍ଷ ହେବାକୁ ଥିବା ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ତେଜସ୍ୱୀ ଯାଦବ ‘ମାଇ ବହନ ମାନ ଯୋଜନା’ ଘୋଷଣା କରିଛନ୍ତି । ମହିଳା ଭୋଟରମାନଙ୍କୁ ଉତ୍ସାହିତ କରିବା ପାଇଁ ସେ ଏହି ନୂତନ ଯୋଜନା ବିଷୟରେ ଘୋଷଣା କରିଛନ୍ତି ।
ତେଜସ୍ୱୀ କହିଛନ୍ତି ଯେ ଯଦି ସେ କ୍ଷମତାକୁ ଆସନ୍ତି, ତେବେ ଏହି ଯୋଜନା ଅନ୍ତର୍ଗତ ମହିଳାମାନଙ୍କୁ ପ୍ରତି ମାସରେ ୨୫୦୦ ଟଙ୍କା ଦିଆଯିବ । ଏହା ପ୍ରଥମ ନୁହେଁ ଯେ ତେଜସ୍ୱୀ ଯାଦବ ଏମିତି ଘୋଷଣା କରିଛନ୍ତି, ପୂର୍ବରୁ ମଧ୍ୟ ସେ ବିହାରରେ ଉପଭୋକ୍ତାମାନଙ୍କୁ ‘୨୦୦ ୟୁନିଟ୍ ମାଗଣା ବିଦ୍ୟୁତ୍’ ଯୋଗାଇଦେବାକୁ ପ୍ରତିଶ୍ରୁତି ଦେଇଥିଲେ ।
ଦରଭଙ୍ଗାରେ ମହିଳାମାନଙ୍କ ପାଇଁ ନୂତନ ଯୋଜନା ବିଷୟରେ ଘୋଷଣା କରି ତେଜସ୍ୱୀ ଯାଦବ କହିଛନ୍ତି, ‘ଯଦି ରାଜ୍ୟରେ ଆମ ସରକାର ଗଠନ ହୁଏ, ତେବେ ଆମେ ‘ମାଇ ବହନ ମାନ ଯୋଜନା’ ଆରମ୍ଭ କରିବୁ । ଏହି ଯୋଜନା ଅଧୀନରେ ଆମେ ଆର୍ଥିକ ରୂପେ ଦୁର୍ବଳ ମାଆ ଓ ଭଉଣୀମାନଙ୍କ ଖାତାକୁ ସିଧାସଳଖ ୨୫୦୦ ଟଙ୍କା ଦେବୁ । ସରକାର ଗଠନ ହେବା ମାତ୍ରେ ଆମେ ଏହି ଯୋଜନା ଆରମ୍ଭ କରିଦେବୁ’ ।
