ବାରିପଦା – ମୟୂରଭଞ୍ଜ ଜିଲ୍ଲା ବିଶୋଇ ଥାନା ଅନ୍ତର୍ଗତ ଜାତୀୟ ରାଜପଥ ୪୯ ନମ୍ବର ପାଲଟିଛି ମରଣଯନ୍ତା । ସୂଚନାଯୋଗ୍ୟ ପୂର୍ବାହ୍ନ ୧୧ ଘଟିକା ସମୟ ପାଖାପାଖିରେ ଜାତୀୟ ରାଜପଥ ୪୯ ନମ୍ବର କୁରକୁଟିଆ ଛକରେ ଏକ ମାଲବାହୀ ଟ୍ରକ୍ ( ଏମ୍ ଏଚ୍ ୨୧ ବି ଏଚ୍ ୭୮୬୮)ଏକ ସ୍କୁଟିକୁ ଧକ୍କା ଦେଇଥିଲା। ଫଳରେ ବିଶୋଇ ଥାନା ଅନ୍ତର୍ଗତ ନୁଆଗାଁ ଅଞ୍ଚଳର ଦୁଇ ଯୁବକ ସତ୍ୟବାନ ମହାନ୍ତ (୩୫) ଓ ଯଶୋବନ୍ତ ମହାନ୍ତ (୨୫) ରକ୍ତ ଜୁଡୁବୁଡୁ ଅବସ୍ଥାରେ ରାସ୍ତାରେ ଛିଟିକି ପଡ଼ିଥିଲେ ।ଘଟଣା ସ୍ଥଳରେ ସତ୍ୟବାନ ମହାନ୍ତଙ୍କର ମୃତ୍ୟୁ ହୋଇଥିବା ବେଳେ ଡ଼ାକ୍ତରଖାନାରେ ଯଶୋବନ୍ତ ମହାନ୍ତ ଙ୍କ ମୃତ୍ୟୁ ହୋଇଥିଲା । ଘଟଣାକୁ ନେଇ ସ୍ଥାନୀୟ ଲୋକମାନଙ୍କ ମଧ୍ୟରେ ଚାପା ଉତ୍ତେଜନା ହୋଇଥିଲା ଏବଂ ମୃତକଙ୍କୁ କ୍ଷତିପୂରଣ ଦାବି ନେଇ କିଛି ସମୟ ରାସ୍ତା ଅବରୋଧ କରିଥିଲେ । ଦୁର୍ଘଟଣା ଖବର ପାଇ ବିଶୋଇ ଥାନା ଅଧିକାରିଣୀ ମିନି ଭୋଇ ଓ ବିଶୋଇ ଅତିରିକ୍ତ ତହସିଲଦା ମନୋଜ କୁମାର ସାହୁ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହ ଲୋକଙ୍କୁ ବୁଝାସୁଝା କରିଥିଲେ । ପ୍ରଶାସନ ତରଫରୁ ରେଡ଼କ୍ରସ ଓ ହରିଶ୍ଚନ୍ଦ୍ର ଯୋଜନା ତରଫରୁ ମୃତକଙ୍କ ପରିବାରକୁ ସହାୟତା କରାଯିବା ସହ ମୃତକଙ୍କୁ ଶବ ବ୍ୟବଚ୍ଛେଦ ପାଇଁ ରାଇରଙ୍ଗପୁର ଉପଖଣ୍ଡ ଚିକିତ୍ସାଳୟକୁ ପଠାଇ ଦେଇଥିଲେ । ପୋଲିସ ଦୁର୍ଘଟଣା ଜନିତ ମାମଲା ରୁଜୁ କରିବା ସହ ମାଲବାହୀ ଟ୍ରକ ଏବଂ ସ୍କୁଟିକୁ ଜବତ କରିଛି । ନୂଆଗାଁ ଗ୍ରାମବାସୀ ଦୁଇ ଯୁବକଙ୍କୁ ହରାଇ ଦୁଃଖରେ ଭାଙ୍ଗି ପଡିଛନ୍ତି । ଗାଁ ରେ ଏକ ଶୋକାକୁଳ ପରିବେଶ ସୃଷ୍ଟି ହୋଇଛି ।
