ଭୁବନେଶ୍ୱର: ଆନ୍ତର୍ଜାତୀୟ ବ୍ୟାଘ୍ର ଦିବସ ଅବସରରେ ଶିମିଳିପାଳ ସୁରକ୍ଷା ପାଇଁ ମିନି ମାରାଥନ୍ ଆୟୋଜିତ ହୋଇଛି। ଶିମିଳିପାଳ ବ୍ୟାଘ୍ର ଅଭୟାରଣ୍ୟ ନିକଟରେ ପ୍ରତିଷ୍ଠା ହେବାକୁ ଥିବା ମେଲାନିଷ୍ଟିକ୍ ଟାଇଗର (କଳା ବାଘ) ସଫାରି ଆଉ ପାଦେ ଆଗେଇଛି। ବିଶ୍ବର ପ୍ରଥମ ମେଲାନିଷ୍ଟିକ୍ ଟାଇଗର ସଫାରିକୁ ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ (ଏନ୍ଟିସିଏ)ଙ୍କ ଅନୁମତି ମିଳିସାରିଛି। ଏଥିସହ କେନ୍ଦ୍ରୀୟ ଚିଡ଼ିଆଖାନା କର୍ତ୍ତୃପକ୍ଷ (ସିଜେଡ୍ଏ)ଙ୍କ ଦ୍ବାରା ପ୍ରକଳ୍ପର ଡିଜାଇନ୍ ଅନୁମୋଦିତ ହୋଇଛି।
ଆଇଏଫଏସ ଅଧିକାରୀ ଏକ୍ସରେ ଦର୍ଶାଇଛନ୍ତି ଯେ ବାରିପଦାସ୍ଥିତ ମଞ୍ଜିଆପଡା ଠାରେ ୧୦୦ ଏକର ଜମିରେ ସଫାରି ଆସିବ। ଜାନୁଆରୀରେ, ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶିମିଳିପାଳ ନିକଟରେ ବିଶ୍ୱର ପ୍ରଥମ ମେଲାନଷ୍ଟିକ୍ ଟାଇଗର ସଫାରି ପାଇଁ ଯୋଜନା ଉନ୍ମୋଚନ କରିଥିଲେ, ଯାହା ସ୍ୟୁଡୋ-ମେଲାନଷ୍ଟିକ୍ ବାଘମାନଙ୍କ ପାଇଁ ଏକ ସ୍ୱତନ୍ତ୍ର ବାସସ୍ଥାନ କରିଥିଲେ। ଚଳିତ ବର୍ଷ ଅକ୍ଟୋବର ସୁଦ୍ଧା ସଫାରି ପରିଦର୍ଶକମାନଙ୍କ ପାଇଁ ପ୍ରସ୍ତୁତ ହେବ ବୋଲି ଆଶା କରାଯାଉଥିଲା।
ନନ୍ଦନକାନନ ପ୍ରାଣୀ ଉଦ୍ୟାନରେ ଥିବା ୩ଟି କଳା ବାଘଙ୍କୁ ମେଲାନିଷ୍ଟିକ୍ ଟାଇଗର ସଫାରିକୁ ଯିବେ। ଏହାବ୍ୟତୀତ ଚଳିତ ମାସରେ ରାଞ୍ଚିସ୍ଥିତ ଭଗବାନ ବିର୍ସା ମୁଣ୍ଡା ପ୍ରାଣୀ ସଂଗ୍ରହାଳୟରୁ ନନ୍ଦନକାନନ ଆସିଥିବା ଦୁଇଟି ବାଘୁଣୀକୁ ସେଠାକୁ ପଠାଯିବ। କଳା ବାଘ ଓ ବାଘୁଣୀଙ୍କ ମିଳନ କରାଯାଇ ମେଲାନିଷ୍ଟିକ୍ ଟାଇଗର ସଫାରିକୁ ସମୃଦ୍ଧ କରିବାକୁ ରାଜ୍ୟ ସରକାର ଯୋଜନା ପ୍ରସ୍ତୁତ କରିଛନ୍ତି। ଅନ୍ୟପଟେ ବ୍ୟାଘ୍ର ଦିବସରେ ଶିମିଳିପାଳର ଏକ ମହାବଳ ବାଘ ପରିବାରର ନୂଆ ଭିଡିଓ ସାମ୍ନାକୁ ଆସିଛି। ଶିମିଳିପାଳରୁ ଆସିଥିବା ଏହି ଭିଡିଓରେ ୪ଟି ମେଲାନିଷ୍ଟିକ ବା କଳା ବାଘକୁ ଏକାଠି ଦେଖିବାକୁ ମିଳିଛି। ଶିମିଳିପାଳ ଅଭୟାରଣ୍ୟର ରାତିର ଏହି ଦୃଶ୍ୟକୁ ଟ୍ରାପ କ୍ୟାମେରାରେ କଏଦ କରାଯାଇଛି। ଏନେଇ ସୂଚନା ଦେଇଛନ୍ତି ଆଇଏଫଏସ ଅଧିକାରୀ ।
