ଚଣ୍ଡୀଗଡ଼: କଂଗ୍ରେସର ବରିଷ୍ଠ ନେତା ନବଜୋତ ସିଂ ସିଦ୍ଧୁଙ୍କ ଦ୍ୱାରା କରାଯାଉଥିବା ରାଲିକୁ ବିରୋଧ କରି ପଞ୍ଜାବ କଂଗ୍ରେସର ଅନେକ ନେତାଙ୍କ ମଧ୍ୟରେ ଅସନ୍ତୋଷ କୁହୁଳୁଛି | ଆଉ ଏହାକୁ ନେଇ ଦଳର ନବନିଯୁକ୍ତ ପଞ୍ଜାବ ପ୍ରଭାରୀ ଦେବେନ୍ଦ୍ର ଯାଦବ କହିଛନ୍ତି ଯେ ସେ ଏହି ପ୍ରସଙ୍ଗରେ ପୂର୍ବତନ ରାଜ୍ୟ ୟୁନିଟ୍ ମୁଖ୍ୟଙ୍କ ସହ ଆଲୋଚନା କରିବେ। ପଞ୍ଜାବରେ ଶାସକ ଆମ୍ ଆଦମୀ ପାର୍ଟି ସହ ଆସନ ବାଣ୍ଟିବା ପୂର୍ବରୁ ଯାଦବ ତିନି ଦିନିଆ ରାଜ୍ୟ ଗସ୍ତରେ ଅଛନ୍ତି। ଏହି ସମୟରେ ସେ ବର୍ତ୍ତମାନର ତଥା ପୂର୍ବତନ ସାଂସଦ, ବିଧାୟକ ଏବଂ ରାଜ୍ୟ ୟୁନିଟ୍ ଅଧିକାରୀଙ୍କ ସମେତ ବ୍ଲକ ସଭାପତିଙ୍କୁ ଭେଟିବେ। ପଞ୍ଜାବ କଂଗ୍ରେସ ମୁଖ୍ୟ ଅମରିନ୍ଦର ସିଂ ରାଜା ୱାଡିଙ୍ଗ କହିଛନ୍ତି ଯେ ମଙ୍ଗଳବାର ଦିନ ଏହି ବୈଠକରେ ଆସନ୍ତା ଲୋକସଭା ନିର୍ବାଚନ ପାଇଁ ଅନେକ ପ୍ରସଙ୍ଗ ଉପରେ ଆଲୋଚନା କରାଯାଇଛି।
ସିଦ୍ଧୁଙ୍କ ଦ୍ୱାରା ଆୟୋଜିତ ରାଲିକୁ ନେଇ ଯାଦବ କହିଛନ୍ତି ଯେ ବୈଠକ ସମୟରେ ଏହା ତାଙ୍କ ନଜରକୁ ଆସିଛି। ମୁଁ ସବିଶେଷ ତଥ୍ୟ ନେଇଛି ଏବଂ ମୁଁ ସିଦ୍ଧୁଙ୍କ ସହ କଥା ହେବି ବୋଲି ପଞ୍ଜାବ କଂଗ୍ରେସ ମୁଖ୍ୟ କହିଛନ୍ତି। ସେ କହିଛନ୍ତି ଯେ ଦଳର ଶୃଙ୍ଖଳା ଭାଙ୍ଗୁଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ତେବେ ସିଦ୍ଧୁ ଅନୁଶାସନର ଉଲ୍ଲଂଘନ କରୁଛନ୍ତି କି ବୋଲି ପଚରାଯିବାରୁ ଯାଦବ କହିଛନ୍ତି ଯେ ଏହାକୁ ଦେଖିବା ଏବଂ ବୁଝିବା ଆବଶ୍ୟକ ଏବଂ ତା’ପରେ ମୁଁ ମନ୍ତବ୍ୟ ଦେବି। ପ୍ରଭାରୀ ଦେବେନ୍ଦ୍ର ଯାଦବ କହିଛନ୍ତି ଯେ ସେ (ସିଦ୍ଧୁ) ଆସନ୍ତାକାଲି ମୋତେ ଭେଟିବେ ଏବଂ ମୁଁ ତାଙ୍କ ସହ ଆଲୋଚନା କରିବି। ବାସ୍ତବରେ ରାଜ୍ୟର ବରିଷ୍ଠ ନେତାଙ୍କୁ ନ ଜଣାଇ ସିଦ୍ଧୁ ବଠିଣ୍ଡାରେ ଦୁଇଟି ଏବଂ ହୋଶିଆରପୁରରେ ଗୋଟିଏ ରାଲି କରିଥିଲେ | ଆଉ ଏହି ରାଲି ପ୍ରସଙ୍ଗରେ ସିଦ୍ଧୁଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବାକୁ ଡଜନରୁ ଅଧିକ ଦଳର ନେତା ଏହି ବୈଠକରୁ ଦୂରେଇ ରହିଥିଲେ।
