ନୂଆଦିଲ୍ଲୀ : ଆମ୍ ଆଦମୀ ପାର୍ଟି (ଆପ) ନେତା ତଥା ରାଜ୍ୟସଭା ସାଂସଦ ରାଘବ ଚଢା ସରକାରୀ ବଙ୍ଗଳା ଯେଭଳି ହାତଛଡା ନ ହୋଇଯିବ ସେଥିପାଇଁ ହାଇକୋର୍ଟକୁ ଯାଇଛନ୍ତି | ନିକଟରେ ପଟିଆଲା ହାଉସ କୋର୍ଟ ତାଙ୍କୁ ଟାଇପ୍ ୭ ବଙ୍ଗଳା ଖାଲି କରିବାକୁ ନିର୍ଦ୍ଦେଶ ଦେଇଥିଲେ। ଆଉ ବର୍ତ୍ତମାନ ରାଜ୍ୟସଭା ସାଂସଦ ପଟିଆଲା ହାଉସ କୋର୍ଟର ନିଷ୍ପତ୍ତି ବିରୋଧରେ ହାଇକୋର୍ଟରେ ପହଞ୍ଚିଛନ୍ତି। ନିମ୍ନ ଅଦାଲତର ଆଦେଶ ବାତିଲ କରିବାକୁ ଦିଲ୍ଲୀ ହାଇକୋର୍ଟରେ ଆମ୍ ଆଦମୀ ପାର୍ଟିର ସାଂସଦ ରାଘବ ଚଢା ଚ୍ୟାଲେଞ୍ଜ କରିଛନ୍ତି। ରାଘବଙ୍କ ଓକିଲ କହିଛନ୍ତି ଯେ ସଂସଦ ସଦସ୍ୟଙ୍କୁ ଏକ ନୋଟିସ ଦିଆଯାଇଛି ଏବଂ ବଙ୍ଗଳା ଖାଲି କରିବାକୁ ପ୍ରକ୍ରିୟା ଚାଲିଛି। ଉଲ୍ଲେଖ ଥାଉ କି ଜୁଲାଇ ୨୦୨୨ରେ ରାଘବ ଚଡ୍ଡାଙ୍କୁ ଟାଇପ୍-୬ ବଙ୍ଗଳା ଆବଣ୍ଟନ କରାଯାଇଥିଲା। ଅଗଷ୍ଟ ୨୦୨୨ରେ ସେ ଟାଇପ୍-୭ ଆବାସ ଆବଣ୍ଟନ ପାଇଁ ରାଜ୍ୟସଭା ଅଧ୍ୟକ୍ଷଙ୍କ ଦ୍ୱାରସ୍ଥ ହୋଇଥିଲେ। ଏହାପରେ ତାଙ୍କୁ ଦିଲ୍ଲୀର ପଣ୍ଡାରା ରୋଡରେ ଟାଇପ୍-୭ ଆବାସ ବଙ୍ଗଳା ଦିଆଯାଇଥିଲା।
ତେବେ, ରାଜ୍ୟସଭା ସଦସ୍ୟ ହ୍ୟାଣ୍ଡବୁକ୍ ଅନୁଯାୟୀ, ପ୍ରଥମ ଥର ସାଂସଦ ହୋଇଥିବା ଚଡ୍ଡା ଟାଇପ୍-୫ ଆବାସ ପାଇବାର ଅଧିକାର ରଖିଛନ୍ତି। ଦିଲ୍ଲୀର ପାଣ୍ଡରା ରୋଡରେ ଥିବା ଟାଇପ୍-୭ ବଙ୍ଗଳା ପାଇଁ ସାଂସଦଙ୍କ ଆବଣ୍ଟନ ମାର୍ଚ୍ଚ ମାସରେ ରାଜ୍ୟସଭା ସଚିବାଳୟ ଦ୍ୱାରା ବାତିଲ କରାଯାଇଥିଲା। ପ୍ରଥମ ଥର ସାଂସଦ ଭାବେ ଟାଇପ୍-୭ ବଙ୍ଗଳା ତାଙ୍କ ଅଧିକାର ଠାରୁ ଅଧିକ ହୋଇଥିବାରୁ ଆବଣ୍ଟନ ବାତିଲ କରାଯାଇଥିବା ଏବଂ ତାଙ୍କୁ ଆଉ ଏକ ଫ୍ଲାଟ୍ ଆବଣ୍ଟନ କରାଯାଇଥିବା କୁହାଯାଇଥିଲା।ଏହାପରେ ରାଘବ ଚଡ୍ଡା ରାଜ୍ୟସଭା ସଚିବାଳୟ ବିରୋଧରେ ଦିଲ୍ଲୀର ପଟିଆଲା ହାଉସ୍ କୋର୍ଟଙ୍କ ଦ୍ୱାରସ୍ଥ ହୋଇଥିଲେ ଏବଂ ଏପ୍ରିଲରେ ଏହି ଉଚ୍ଛେଦ ବିରୋଧରେ ସ୍ଥଗିତାଦେଶ ପାଇଥିଲେ। ଏହାପରେ ରାଜ୍ୟସଭା ସଚିବାଳୟ ଚଡ୍ଡାଙ୍କ ଆବେଦନକୁ ବିରୋଧ କରି ଏକ ଆବେଦନ ଦାଖଲ କରିଥିଲା ଏବଂ ଯୁକ୍ତି ଦର୍ଶାଇଥିଲେ ଯେ ସଚିବାଳୟର ଶୁଣାଣି ନକରି ଅଦାଲତ ଏହି ଆଦେଶ ଦେଇପାରି ନଥାନ୍ତେ। ଗତ ଶୁକ୍ରବାର ଦିନ ଦିଲ୍ଲୀ ଅଦାଲତ ତାଙ୍କ ଆଦେଶକୁ ପ୍ରତ୍ୟାହାର କରିଥିଲେ ଯେଉଁଥିରେ ରାଜ୍ୟସଭା ସଚିବାଳୟକୁ ଆପ୍ ସାଂସଦଙ୍କୁ ତାଙ୍କ ସରକାରୀ ବାସଭବନରୁ ହଟାଇବା ଉପରେ ରୋକ ଲଗାଯାଇଥିଲା। ଏଥିରେ କୁହାଯାଇଛି ଯେ ସରକାରୀ ବଙ୍ଗଳା ଆବଣ୍ଟନ କେବଳ ତାଙ୍କୁ ଦିଆଯାଇଥିବା ଏକ ଅଧିକାର ଏବଂ ଆବଣ୍ଟନ ବାତିଲ ହେବା ପରେ ମଧ୍ୟ ରାଘବ ଚଡ୍ଡାଙ୍କ କୋଠାକୁ ଦଖଲ କରିବାର କୌଣସି ଅଧିକାର ନାହିଁ। ଏହି ରାୟ ବିରୋଧରେ ରାଘବ ହାଇକୋର୍ଟକୁ ଯାଇଛନ୍ତି |
