ରାଜସ୍ଥାନ: କୁହାଯାଏ ଯେ, ସତ କେବେ ଲୁଚି ରହେନା । ବିଳମ୍ବରେ ହେଉ ପଛେ କିନ୍ତୁ ଦିନେ ନା ଦିନେ ସତ ସାମ୍ନାକୁ ଆସେ । ଏପରି କିଛି ଘଟଣା ଦେଖିବାକୁ ମିଳିଛି ରାଜାସ୍ଥାନ ବାସିନ୍ଧା ମୋନା ବୁଗାଲିଆଙ୍କ କ୍ଷେତ୍ରରେ । ଜଣେ ଟ୍ରକ ଡ୍ରାଇଭରଙ୍କ ଝିଅ ମୋନା ବୁଗାଲିଆ ଜଣେ ପୋଲିସ ଅଫିସର ହେବାକୁ ସ୍ଵପ୍ନ ଦେଖୁଥିଲେ । କିନ୍ତୁ ସେ ପୋଲିସରେ ଭର୍ତ୍ତି ହେବା ପାଇଁ ହେଉଥିବା ପରୀକ୍ଷାରେ କୃତକାର୍ଯ୍ୟ ହୋଇପାରିନଥିଲେ । ପରବର୍ତ୍ତୀ ପରୀକ୍ଷା ପାଇଁ ଅପେକ୍ଷା କରିବା ବଦଳରେ ମୋନା ଏପରି ଏକ ରାସ୍ତା ବାଛିନେଲେ ଯାହାକୁ ଜାଣିବା ପରେ ପୋଲିସ ମଧ୍ୟ ଆଶ୍ଵର୍ଯ୍ୟ ହୋଇଯାଇଥିଲା ।
ମୋନା ଏପରି ଚତୁର ଢଙ୍ଗରେ ଏକ ନକଲି ପୋଲିସ ଅଫିସର ଭାବରେ ସମ୍ନାକୁ ଆସିଲେ ଯେ ପ୍ରକୃତ ପୋଲିସ ମଧ୍ୟ ତାଙ୍କୁ ଚିହ୍ନି ପାରିନଥିଲା | କିଛି ଦିନ ପରେ ନକଲି ସବ୍-ଇନ୍ସପେକ୍ଟର ମୋନା ପ୍ରକୃତ ପୋଲିସ କର୍ମଚାରୀଙ୍କୁ ହଇରାଣ କରିବା ଆରମ୍ଭ କରିଥିଲେ । କିନ୍ତୁ ପୋଲିସ ହେବାର ନିଶାରେ ସେ ଦିନେ ଏପରି ଏକ ଭୁଲ କରି ବସିଲେ ଯେ, ଯେଉଁଥିରେ ତାଙ୍କର ଅସଲ ଚେହେରା ସମସ୍ତଙ୍କ ସାମ୍ନାକୁ ଆସିଥିଲା । ନାଗୌର ଜିଲ୍ଲାର ନିମ୍ବା ଅଞ୍ଛଳରେ ରହୁଥିବା ମୋନା ବୁଗାଲିଆ ସବ୍ ଇନ୍ସପେକ୍ଟର ନିଯୁକ୍ତି ପରୀକ୍ଷା ପାଇଁ ପ୍ରସ୍ତୁତ ହେଉଥିଲେ । କିନ୍ତୁ ପରୀକ୍ଷାରେ ସେ ଉତ୍ତୀର୍ଣ୍ଣ ହୋଇପାରିନଥିଲେ । ତିନି ବର୍ଷ ପୂର୍ବେ ଅର୍ଥାତ୍ ୨୦୨୧ ମସିହାରେ, ଯେତେବେଳେ ଫଳାଫଳ ଆସିଲା, ମୋନା ନିଜ ଗାଁରେ ସବ୍-ଇନ୍ସପେକ୍ଟର ଭାବରେ ମନୋନୀତ କରାଯାଇଥିବା ମିଥ୍ୟା ଖବର ପ୍ରଚାର କରିଥିଲେ | ଅନ୍ୟପକ୍ଷରେ, ପ୍ରକୃତ ମନୋନୀତ ସବ୍ ଇନ୍ସପେକ୍ଟରଙ୍କ ବ୍ୟାଚ୍ ୪୮ର ତାଲିମ ରାଜସ୍ଥାନ ପୋଲିସ୍ ଏକାଡେମୀରେ ୯ଜୁଲାଇ ୨୦୨୧ ରୁ ୪ ସେପ୍ଟେମ୍ବର ୨୦୨୨ ପର୍ଯ୍ୟନ୍ତ ହୋଇଥିଲା । ତା’ପରେ ୫ ସେପ୍ଟେମ୍ବର ୨୦୨୨ ରୁ ୧୦ ସେପ୍ଟେମ୍ବର ୨୦୨୩ ପର୍ଯ୍ୟନ୍ତ ଫିଲ୍ଡ ଟ୍ରେନିଂ ହୋଇଥିଲା |
ଠିକ ସେହି ସମୟରେ କ୍ରୀଡା କୋଟାର ସବ୍ ଇନ୍ସପେକ୍ଟରଙ୍କ ପ୍ରଶିକ୍ଷଣ ମଧ୍ୟ ଚାଲିଥିଲା | ନକଲି ପୋଲିସ ମୋନା ଚତୁରତାର ସହ ଅନ୍ୟ ପ୍ରାର୍ଥୀଙ୍କୁ ବିଭ୍ରାନ୍ତ କରି ଉଭୟ ସ୍ଥାନରେ ଭୁଲ ତଥ୍ୟ ଦେଇ ଦୁଇ ବର୍ଷ ଧରି ପୋଲିସ କେନ୍ଦ୍ରରେ ତାଲିମ ନେଇଥିଲେ । ଏପରିକି ଆରପିଏର କୌଣସି ଅଧିକାରୀ ମଧ୍ୟ ମୋନାଙ୍କୁ ସନ୍ଦେହ କରିନଥିଲେ । କିନ୍ତୁ ଦିନେ ଯେତେବେଳେ ସବ୍ ଇନ୍ସପେକ୍ଟରଙ୍କ ହ୍ଵାଟସଆପ୍ ଗ୍ରୁପରେ ଏକ ବିଷୟ ଉପରେ ଆଲୋଚନା ହେଉଥିଲା, ମୋନା ସେତେବେଳେ ଅନ୍ୟ ସବ୍ ଇନ୍ସପେକ୍ଟରଙ୍କୁ ଟ୍ରେନିଂ ସେଣ୍ଟରରୁ ବାହାରକରିଦେବାକୁ ଧମକ ଦେଇଥିଲେ । ସେହି ସବ୍-ଇନ୍ସପେକ୍ଟରଜଣଙ୍କ ମୋନାଙ୍କର ଏପରି ବ୍ୟବହାର ପାଇଁ ତାଙ୍କ ନାଁରେ ଉଚ୍ଚ ସ୍ତରରେ ଅଭିଯୋଗ କରିଥିଲେ। ଅଭିଯୋଗ ଅନୁସାରେ ଯେତେବେଳେ ଅନୁସନ୍ଧାନ କରାଗଲା, ଦେଖାଗଲା ଯେ ମୋନାଙ୍କ ନାମ କୌଣସି ବି ତାଲିକାରେ ନାହିଁ | କେବଳ ଏତିକି ନୁହେଁ, ସୋସିଆଲ ମିଡିଆରେ ପୂର୍ବତନ ଡିଜିପି ଏବଂ ବର୍ତ୍ତମାନର ଏଡିଜିଙ୍କ ସହିତ ଫଟୋ ସୋସିଆଲ ମିଡିଆରେ ପୋଷ୍ଟ କରିଥିଲେ ଅନେକ । ସତ୍ୟତା ଜଣାପଡିବା ପରେ ମୋନା ଫେରାର ଥିବା ବେଳେ ବର୍ତ୍ତମାନ ସୋସିଆଲ ମିଡିଆର ପୋଷ୍ଟକୁ ଦେଖି ପୋଲିସ ତାଙ୍କୁ ଖୋଜୁଛି ।
ଶାସ୍ତ୍ରୀ ନାଗର ପୋଲିସ ଷ୍ଟେସନ ଅଧିକାରୀ କିଶୋର ସିଂ କହିଛନ୍ତି ଯେ ଆରପିଏର ଜମା ହୋଇଥିବା ଇନ୍ସପେକ୍ଟର ରମେଶ ସିଂ ମୀନା ସେପ୍ଟେମ୍ବର ୨୯ ରେ ମୋନା ବୁଗାଲିଆ ନାମକ ଜଣେ ଝିଅଙ୍କ ବିରୋଧରେ ମାମଲା ରୁଜୁ କରିଛନ୍ତି । ଯେଉଁଥିରେ କୁହାଯାଇଛି ଯେ ମୋନା ଏକ ନକଲି ସବ୍-ଇନ୍ସପେକ୍ଟର ଭାବରେ ୧୧ ସେପ୍ଟେମ୍ବରରୁ ୨୩ ସେପ୍ଟେମ୍ବର ପର୍ଯ୍ୟନ୍ତ ସବ୍-ଇନ୍ସପେକ୍ଟର ଭାବରେ ତାଲିମ ନେବାକୁ ଆସିଥିଲେ। ଏହି ଅଭିଯୋଗରେ, ତାଙ୍କ ବିରୋଧରେ ଆଇପିସିର ଧାରା ୪୧୯,୪୬୮,୪୬୯, ଏବଂ ୬୬DIT ACT ଏବଂ ଧାରା ୬୧ ରାଜସ୍ଥାନ ପୋଲିସ ଅଧିନିୟମ ଅନୁଯାୟୀ ଏକ ମାମଲା ରୁଜୁ ହୋଇଛି । ବର୍ତ୍ତମାନ ଏହି ମାମଲାର ତଦନ୍ତ ଚାଲିବା ସହ ତାଙ୍କୁ ଖୋଜୁଛି ପୋଲିସ ।
