ବାଲେଶ୍ୱର:ବାହାନଗା ଟ୍ରେନ ଦୁର୍ଘଟଣାରେ ଗିରଫ ତିନି ଅଭିଯୁକ୍ତ ପୁଣି ୪ ଦିନିଆ ରିମାଣ୍ଡରେ ଗଲେ । ପ୍ରଥମ ରିମାଣ୍ଡ ସରିବା ପରେ ସେମାଙ୍କୁ କୋର୍ଟରେ କୋର୍ଟରେ ହାଜର କରାଯାଇଥିଲା । ହେଲେ ଅଧିକ ଜେରା ପାଇଁ ପୁଣି ୪ ଦିନିଆ ରିମାଣ୍ଡରେ ନେଇଛି ସିବିଆଇ ।
ବାହାନଗା ରେଳ ଦୁର୍ଘଟଣାର ତଦନ୍ତ କରି ସିବିଆଇ ତିନି ଜଣଙ୍କୁ ଗିରଫ କରିଛି । ସେମାନେ ହେଲେ ସିଗନାଲ ସିନିୟର ସେକ୍ସନ୍ ଇଂଜିନିୟର ଅରୁଣ ମହନ୍ତ, ସେକ୍ସନ୍ ଇଂଜିନିୟର ମହମ୍ମଦ ଅମିର ଖାନ୍ ଓ ଟେକନିସିଆନ୍ ପପୁ କୁମାର । ସେମାନଙ୍କୁ ଆହୁରି ୫ଦିନ ରିମାଣ୍ଡରେ ନେବା ପାଇଁ କୋର୍ଟରେ ଆବେଦନ କରିଥିଲା ସିବିଆଇ ।
ପୂର୍ବରୁ ମଧ୍ୟ ତିନି ଅଭିଯୁକ୍ତଙ୍କୁ ୭ ଦିନିଆ ରିମାଣ୍ଡରେ ନେବା ପାଇଁ ଅନୁମତି ମାଗିଥିଲା ସିବିଆଇ । ହେଲେ କୋର୍ଟ ୫ ଦିନିଆ ରିମାଣ୍ଡ ଦେଇଥିଲେ । ଏଥର ମଧ୍ୟ ୫ ଦିନିଆ ରିମାଣ୍ଡ ମାଗିଥିଲେ ହେଁ ୪ ଦିନ ପାଇଁ ଅନୁମତି ଦେଇଛନ୍ତି କୋର୍ଟ ।
ଅନ୍ୟପକ୍ଷେ ସିଗନାଲ ସିନିୟର ସେକ୍ସନ୍ ଇଂଜିନିୟର ଅରୁଣ ମହନ୍ତ, ସେକ୍ସନ୍ ଇଂଜିନିୟର ମହମ୍ମଦ ଅମିର ଖାନଙ୍କ ବେଲ ପାଇଁ ଆବେଦନ କରିବେ ପରିବାର ଲୋକ । ଅରୁଣ ମହନ୍ତଙ୍କ ପାଇଁ ଆଇନଜୀବୀ ପ୍ରଭାତ ସାମନ୍ତରାୟ ଓ ଅମିର ଖାନଙ୍କ ପାଇଁ ଆଇନଜୀବୀ ଲଲାଟେନ୍ଦୁ ପ୍ରଧାନ ଆବେଦନ କରିବେ ।
ଅରୁଣ ମହନ୍ତଙ୍କ ଆଇନଜୀବୀ କହିଛନ୍ତି, ଏହା ଏକ ଅତି ସମ୍ବେଦନଶୀଳ ଘଟଣା ହୋଇଥିବାରୁ ଏହି ଗିରଫଦାରି କରାଯାଇଛି । ଘଟଣା ଦିନ ଅରୁଣ ମହନ୍ତ ଉପସ୍ଥିତ ନଥିଲେ । ତାଙ୍କୁ ତରବରିଆ ଭାବେ ଗିରଫ କରିଛି ସିବିଆଇ ।
