ବେଙ୍ଗାଲୁରୁ: କର୍ଣ୍ଣାଟକର ଉପମୁଖ୍ୟମନ୍ତ୍ରୀ ଡି.କେ ଶିବକୁମାର ଆଜି ଏମିତି କିଛି କହିଦେଇଛନ୍ତି ଯାହାକୁ ନେଇ ରାଜନୈତିକ ଚର୍ଚ୍ଚା ଜୋର ଧରିଛି | ଶିବକୁମାର ଏମିତି କିଛି କହିଛନ୍ତି, ଯାହା ପରେ କର୍ଣ୍ଣାଟକ କଂଗ୍ରେସରେ ସବୁ କିଛି ଠିକ୍ ଚାଲିନାହିଁ ବୋଲି କଳ୍ପନାଜଳ୍ପନା ଆରମ୍ଭ ହୋଇଛି। ବାସ୍ତବରେ, ଉପମୁଖ୍ୟମନ୍ତ୍ରୀ ଡି.କେ ଶିବକୁମାର କହିଛନ୍ତି ଯେ ସିଦ୍ଧରମେୟା ସରକାର ସମାଲୋଚନାକୁ ଡରୁଥିଲେ ଏବଂ ସେଥିପାଇଁ ଗୁରୁତ୍ୱପୂର୍ଣ୍ଣ ପ୍ରକଳ୍ପ ଆରମ୍ଭ ପୂର୍ବରୁ ପଛଘୁଞ୍ଚା ଦେଉଥିଲେ | ଏକ ଫ୍ଲାଇଓଭର ନିର୍ମାଣକୁ ନେଇ ସେ ଏଭଳି କହିଛନ୍ତି | ଶିବକୁମାର କହିଛନ୍ତି ଯେ ଯଦି ସେ ସିଦ୍ଧରମେୟାଙ୍କ ସ୍ଥାନରେ ଥାଆନ୍ତେ, ତେବେ ସେ ଚାପର ସମ୍ମୁଖୀନ ହୋଇନଥାନ୍ତେ। ଡି.କେ ଶିବକୁମାର କହିଛନ୍ତି ଯେ ଅନେକ ଲୋକ ମୋତେ ଟନେଲ ଏବଂ ଫ୍ଲାଏ ଓଭର ନିର୍ମାଣ କରିବାକୁ ପରାମର୍ଶ ଦିଅନ୍ତି | ସିଦ୍ଧରମେୟା ସରକାରଙ୍କ ପୂର୍ବ କାର୍ଯ୍ୟକାଳରେ ସେ ଏକ ଇସ୍ପାତ ସେତୁ ନିର୍ମାଣ କରିବାକୁ ଚାହୁଁଥିଲେ କିନ୍ତୁ ଏହାକୁ ନେଇ ଅନେକ ବିବାଦ ଦେଖାଦେଇଥିଲା ଏବଂ ଲୋକମାନେ ଏହାକୁ ବିରୋଧ କରିଥିଲେ। ସିଦ୍ଧରମେୟା ଏବଂ କେଜେ ଜର୍ଜ ଲୋକଙ୍କ ବିରୋଧ ଦେଖି ଡରିଯାଇଥିଲେ ।
ଶିବକୁମାର କହିଛନ୍ତି ଯେ ଯଦି ମୁଁ ତାଙ୍କ ସ୍ଥାନରେ ଥାଆନ୍ତି, ତେବେ ମୁଁ ଭୟଭୀତ ହୋଇନଥାନ୍ତି ଏବଂ ପ୍ରକଳ୍ପ ସଂପୂର୍ଣ୍ଣ କରିଥାନ୍ତି । ଉଲ୍ଲେଖ ଥାଉ କି ଯେ ବେଙ୍ଗାଲୁରୁରେ ବଢୁଥିବା ଟ୍ରାଫିକ ସମସ୍ୟାକୁ ଦୂର କରିବା ପାଇଁ ଷ୍ଟିଲ ବ୍ରିଜ ନିର୍ମାଣ ଯୋଜନା କରାଯାଇଥିଲା। ଏହି ପ୍ରକଳ୍ପ ପାଇଁ ୧୮୦୦ କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ କରାଯାଇଥିଲା | ଏହି ଫ୍ଲାଏଓଭର ବାସଭେଶ୍ୱରା ସର୍କଲରୁ ହେବଲ ଫ୍ଲାଏଓଭର ପର୍ଯ୍ୟନ୍ତ ନିର୍ମାଣ ହୋଇଥାନ୍ତା ଏବଂ ଏହାର ଲମ୍ବ ୬.୭ କିଲୋମିଟର ହେବ ବୋଲି ପ୍ରସ୍ତାବ ଦିଆଯାଇଥିଲା | ତେବେ ବେଙ୍ଗାଲୁରୁର ଲୋକମାନେ ଏହି ପ୍ରକଳ୍ପକୁ ବିରୋଧ କରିଥିଲେ। ଏହି ପ୍ରକଳ୍ପକୁ ବିରୋଧ କରିବା ପରେ ବାଙ୍ଗାଲୋର ବିକାଶ ପ୍ରାଧିକରଣ ୨୦୧୬ରେ ଏହି ପ୍ରକଳ୍ପ ବନ୍ଦ କରି ଦେଇଥିଲା ଏବଂ ସିଦ୍ଧରମେୟା ସରକାର କର୍ଣ୍ଣାଟକ ହାଇକୋର୍ଟକୁ ଜଣାଇଥିଲେ ଯେ ଏହି ପ୍ରକଳ୍ପ କରାଯିବନାହିଁ।
