ଅନୁଷ୍ଠିତ ହେଲା ଡାକ୍ତର କବି ପ୍ରସାଦ ମିଶ୍ର ସ୍ମୃତି ପରିଷଦର ଆଲୋଚନା ଚକ୍ର
ଭୁବନେଶ୍ୱର, ୨୩/୦୫ : ଆଧୁନିକତାର ଚାକଚକ୍ୟ ମଧ୍ୟରେ ମଣିଷ ଆଜି ନିଜର ଆଧ୍ୟାତ୍ମିକ ସତ୍ତା ଓ ମାନବୀୟ ମୂଲ୍ୟବୋଧକୁ ପାସୋରି ଦେଇଛି। ଏଭଳି ଏକ ସମ୍ବେଦନଶୀଳ ପ୍ରସଙ୍ଗକୁ ନେଇ ରାଜଧାନୀ ଭୁବନେଶ୍ୱରସ୍ଥିତ ଲେଖକ ସମବାୟ ସମିତି ପରିସରରେ ‘ଡାକ୍ତର କବି ପ୍ରସାଦ ମିଶ୍ର ସ୍ମୃତି ପରିଷଦ’ ପକ୍ଷରୁ ଏକ ଭାବଗମ୍ଭୀର ମାସିକ ଆଲୋଚନା ଚକ୍ର ଅନୁଷ୍ଠିତ ହୋଇଯାଇଛି। ଆଲୋଚନାର ଶୀର୍ଷକ ଥିଲା— “ମଣିଷ ଦେହେ ଦିବ୍ୟଜ୍ଞାନ?”।
ଏହି ଆଲୋଚନା ଚକ୍ରରେ ବିଶିଷ୍ଟ ବକ୍ତାମାନେ ମଣିଷର ବର୍ତ୍ତମାନର ସ୍ଥିତି ଉପରେ ଗଭୀର ଚିନ୍ତା ପ୍ରକଟ କରିଥିଲେ। ଆଲୋଚକଙ୍କ ମତରେ, ଆଜିର ମଣିଷ ଅତ୍ୟଧିକ ତାମସିକ ପ୍ରବୃତ୍ତିର ବଶବର୍ତ୍ତୀ ହୋଇପଡ଼ିଛି। କେବଳ ଭୋଗବିଳାସ ଓ ସୁଖ-ସାଧନ ତାର ଏକମାତ୍ର ଲକ୍ଷ୍ୟ ହୋଇଥିବାରୁ, ସେ ନିଜ ଭିତରେ ଥିବା ମାନବିକତା, ବିବେକ ଏବଂ ଈଶ୍ୱରଦତ୍ତ ଦୟା, କ୍ଷମା ଓ ସହନଶୀଳତା ଭଳି ଦୈବୀ ଗୁଣଗୁଡ଼ିକୁ ହରାଇବାକୁ ବସିଲାଣି।
ସୁକାନ୍ତ ପ୍ରଧାନଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟ ବକ୍ତା ଭାବେ ଡାକ୍ତର ସୀମାନ୍ତ କୁମାର ନନ୍ଦ ଯୋଗଦେଇ ଶ୍ରୀମଦ ଭାଗବତର ସେହି ଅମର ବାଣୀ “ମଣିଷ ଦେହେ ଦିବ୍ୟଜ୍ଞାନ” ଉପରେ ସୁବିସ୍ତୃତ ଆଲୋକପାତ କରିଥିଲେ। ସେ କହିଥିଲେ ଯେ, ଶରୀର ମଧ୍ୟରେ ହିଁ ସେହି ପରମ ଜ୍ଞାନର ଆଲୋକ ରହିଛି, କିନ୍ତୁ ଅଜ୍ଞାନତା ବଶତଃ ଆମେ ତାହାକୁ ଅନୁଭବ କରିପାରୁନାହୁଁ। ଆଲୋଚକ ଭାବେ ସାହିତ୍ୟିକା ମିନତୀ ଷଡ଼ଙ୍ଗୀ, ମନୋଜ କୁମାର ଜେନା ଓ ବିରଜା ପ୍ରସାଦ ଶତପଥୀ ପ୍ରମୁଖ ଯୋଗଦେଇ ଆଧ୍ୟାତ୍ମିକ ଚେତନା ମାଧ୍ୟମରେ କିପରି ସମାଜରେ ପୁନର୍ବାର ନୈତିକତା ପ୍ରତିଷ୍ଠା କରାଯାଇପାରିବ, ସେ ସମ୍ପର୍କରେ ନିଜ ନିଜର ମତାମତ ରଖିଥିଲେ।
କାର୍ଯ୍ୟକ୍ରମର ପ୍ରାରମ୍ଭରେ ପରିଷଦର ସମ୍ପାଦକ ରମାକାନ୍ତ ମିଶ୍ର ସ୍ୱାଗତ ଭାଷଣ ପ୍ରଦାନ କରିବା ସହ ସ୍ୱର୍ଗତ ଡାକ୍ତର କବି ପ୍ରସାଦ ମିଶ୍ରଙ୍କ ବହୁମୁଖୀ ପ୍ରତିଭା ସମ୍ପର୍କରେ ସ୍ମୃତିଚାରଣ କରିଥିଲେ। ସେ କହିଥିଲେ ଯେ, ଡାକ୍ତର ମିଶ୍ର କେବଳ ଜଣେ ଚିକିତ୍ସକ ନଥିଲେ, ବରଂ ସେ ଥିଲେ ଜଣେ ଉଚ୍ଚକୋଟୀର ସାହିତ୍ୟିକ ଓ ସମାଜ ସଂସ୍କାରକ, ଯାହାଙ୍କ ଜୀବନାଦର୍ଶ ଆଜି ବି ଆମ ପାଇଁ ପ୍ରେରଣାର ଉତ୍ସ।
ଶେଷରେ ଇଞ୍ଜିନିୟର ସୁବାସ ଚନ୍ଦ୍ର ଉପସ୍ଥିତ ସମସ୍ତ ଅତିଥି ଓ ଶ୍ରୋତାମାନଙ୍କୁ ଧନ୍ୟବାଦ ଅର୍ପଣ କରିଥିଲେ। ଏହି ଆଲୋଚନା ଚକ୍ରଟି ବୌଦ୍ଧିକ ଓ ଆଧ୍ୟାତ୍ମିକ ଦୃଷ୍ଟିକୋଣରୁ ବେଶ୍ ଉଚ୍ଚକୋଟୀର ହୋଇଥିଲା, ଯାହା ଉପସ୍ଥିତ ସାହିତ୍ୟାନୁରାଗୀଙ୍କୁ ଗଭୀର ଭାବେ ପ୍ରଭାବିତ କରିଥିଲା।
