ଭୁବନେଶ୍ୱର : ଭାରତୀୟ ସନାତନ ସଂସ୍କୃତି ଓ ପରମ୍ପରାରେ ଯଜ୍ଞର ସ୍ଥାନ ସର୍ବୋପରି। ଯଜ୍ଞ କେବଳ ଏକ ଧାର୍ମିକ କର୍ମକାଣ୍ଡ ନୁହେଁ, ବରଂ ଏହା ମାନବ ଜୀବନକୁ ଶୃଙ୍ଖଳିତ କରିବା ସହ ବିଶ୍ୱ ବ୍ରହ୍ମାଣ୍ଡରେ ଶାନ୍ତି ଓ ସନ୍ତୁଳନ ରକ୍ଷା କରିବାର ଏକ ଅନନ୍ୟ ବିଜ୍ଞାନ। ଏହି ପରିପ୍ରେକ୍ଷୀରେ ଓଡ଼ିଶା ବ୍ରାହ୍ମଣ ମହାସଂଘ, ଭୁବନେଶ୍ୱର ପକ୍ଷରୁ ଆୟୋଜିତ ଏକ ଗୁରୁତ୍ୱପୂର୍ଣ୍ଣ ଆଲୋଚନା ଚକ୍ରରେ ବିଶିଷ୍ଟ ଅତିଥିମାନେ ଯଜ୍ଞର ମହତ୍ତ୍ୱ ଓ ପ୍ରାସଙ୍ଗିକତା ଉପରେ ଗଭୀର ଆଲୋକପାତ କରିଛନ୍ତି। ସ୍ଥାନୀୟ ଏକ ପରିସରରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ପଦ୍ମଶ୍ରୀ ପ୍ରଫେସର ଡାକ୍ତର ଅଶୋକ କୁମାର ମହାପାତ୍ର ବେଦ, ବେଦାନ୍ତ ଓ ଉପନିଷଦର ବିଭିନ୍ନ ଶ୍ଳୋକ ଉଦ୍ଧାର କରି କହିଥିଲେ ଯେ, ଯଜ୍ଞ କରିବା ଦ୍ୱାରା ମାନବ କେବଳ ବ୍ୟକ୍ତିଗତ ଶାନ୍ତି ପାଏ ନାହିଁ, ବରଂ ଏହା ଦ୍ୱାରା ସମଗ୍ର ବିଶ୍ୱର କଲ୍ୟାଣ ସାଧିତ ହୁଏ। ଯେତେବେଳେ ଯଜ୍ଞକୁଣ୍ଡରେ ପବିତ୍ର ଦ୍ରବ୍ୟ ଓ ସମିଧ ଅର୍ପଣ କରାଯାଏ, ସେଥିରୁ ନିର୍ଗତ ହେଉଥିବା ବାଷ୍ପ ବାୟୁମଣ୍ଡଳକୁ ପ୍ରଦୂଷଣମୁକ୍ତ କରିବା ସହ ମାନବ ଶରୀର ଓ ମନରେ ସକାରାତ୍ମକ ଶକ୍ତିର ସଞ୍ଚାର କରିଥାଏ। ବର୍ତ୍ତମାନର ଅଶାନ୍ତ ସମୟରେ ମାନସିକ ଚାପରୁ ମୁକ୍ତି ପାଇବା ଏବଂ ସମାଜରେ ଭ୍ରାତୃଭାବ ସ୍ଥାପନ କରିବା ପାଇଁ ଯଜ୍ଞର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ସେ ମତବ୍ୟକ୍ତ କରିଥିଲେ।
ଆଲୋଚନା ଚକ୍ରରେ ଯଜ୍ଞର ମହତ୍ତ୍ୱ ସମ୍ପର୍କରେ ବିସ୍ତୃତ ବ୍ୟାଖ୍ୟା କରି ପଣ୍ଡିତ ସୁନୀଲ କୁମାର ନନ୍ଦ ଓ ପ୍ରତାପ କୁମାର ମିଶ୍ର କହିଥିଲେ ଯେ, ଯଜ୍ଞ ହେଉଛି ‘ଦେବପୂଜା, ସଙ୍ଗତିକରଣ ଓ ଦାନ’ର ସମାହାର। ଏହା ଦ୍ୱାରା ସମାଜରେ ତ୍ୟାଗର ମନୋଭାବ ଜାଗ୍ରତ ହୁଏ। ଶରତ ଚନ୍ଦ୍ର କର ଓ କୈଳାସ ଚନ୍ଦ୍ର ରଥ ନିଜସ୍ୱ ବକ୍ତବ୍ୟରେ ଦର୍ଶାଇଥିଲେ ଯେ, ଯଜ୍ଞଶାଳାରୁ ଉଚ୍ଚାରିତ ମନ୍ତ୍ରଶକ୍ତି ବ୍ରହ୍ମାଣ୍ଡର ଗତିଶୀଳତାକୁ ସୁଧାରିଥାଏ ଏବଂ ପ୍ରକୃତିର ପଞ୍ଚଭୂତକୁ ସନ୍ତୁଷ୍ଟ କରି ସମୟାନୁସାରେ ବୃଷ୍ଟି ଓ ସମୃଦ୍ଧି ଆଣିଥାଏ। ଯଜ୍ଞ ଦ୍ୱାରା ଆତ୍ମଶୁଦ୍ଧି ହୁଏ ଏବଂ ବ୍ୟକ୍ତି ନିଜର ଅହଂକାରକୁ ଆହୁତି ଦେଇ ପରମାନନ୍ଦ ଲାଭ କରେ। ବିଶେଷକରି ପୁରୁଷୋତ୍ତମ ମାସ ପରି ଏକ ପବିତ୍ର ସମୟରେ ଯଜ୍ଞର ଫଳ ଶତଗୁଣିତ ହୋଇଥାଏ। ଏହି କାରଣରୁ ମାନବ ସମାଜର ମଙ୍ଗଳ ପାଇଁ ସର୍ବସାଧାରଣରେ ଯଜ୍ଞ ପ୍ରତି ଆଗ୍ରହ ସୃଷ୍ଟି କରିବା ଉପରେ ସମସ୍ତ ବକ୍ତା ଜୋର ଦେଇଥିଲେ।
ଏହି ଆଲୋଚନା ଚକ୍ରର ନିଷ୍ପତ୍ତି କ୍ରମେ, ପବିତ୍ର ପୁରୁଷୋତ୍ତମ ମାସ ଅବସରରେ ବିଶ୍ୱ କଲ୍ୟାଣ ଓ ଶାନ୍ତି ନିମନ୍ତେ ବ୍ରାହ୍ମଣ ମହାସଂଘ ଭୁବନେଶ୍ୱର ପକ୍ଷରୁ ଏକ ଭବ୍ୟ ମହାଯଜ୍ଞର ଆୟୋଜନ କରାଯାଇଛି। ଆସନ୍ତା ୧୩ ତାରିଖ ଶନିବାର ଦିନ ପ୍ରସିଦ୍ଧ ଲିଙ୍ଗରାଜ ମନ୍ଦିର ନିକଟସ୍ଥ ଡାକରା ବିଭୀଷଣ ମନ୍ଦିର ପରିସରରେ ଏହି ‘ଏକ ଦିବସୀୟ ବିଶ୍ୱ ଶାନ୍ତି ମହାଯଜ୍ଞ’ ଅନୁଷ୍ଠିତ ହେବ। ରମାକାନ୍ତ ମିଶ୍ରଙ୍କ ସଭାପତିତ୍ୱରେ ଅନୁଷ୍ଠିତ ଏହି ସଭାରେ ସଂପାଦକ ପରମେଶ୍ୱର ମିଶ୍ର ସ୍ୱାଗତ ଭାଷଣ ଦେବା ସହ ଯଜ୍ଞର ଆଭିମୁଖ୍ୟ ସମ୍ପର୍କରେ ସୂଚନା ଦେଇଥିଲେ। ସେ କହିଥିଲେ ଯେ, ସମାଜରେ ନୈତିକ ମୂଲ୍ୟବୋଧର ଅବକ୍ଷୟ ରୋକିବା ଏବଂ ବିଶ୍ୱରେ ପ୍ରେମ ଓ ଶାନ୍ତିର ବାର୍ତ୍ତା ପ୍ରସାର କରିବା ହିଁ ଏହି ଯଜ୍ଞର ପ୍ରକୃତ ଲକ୍ଷ୍ୟ। କାର୍ଯ୍ୟକ୍ରମର ଶେଷରେ ପ୍ରଭାତ କୁମାର ଦାଶ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ। ଏହି ମହାଯଜ୍ଞରେ ବହୁ ସଂଖ୍ୟାରେ ଶ୍ରଦ୍ଧାଳୁ ଯୋଗଦେଇ ପୁଣ୍ୟ ଅର୍ଜନ କରିବାକୁ ମହାସଂଘ ପକ୍ଷରୁ ନିବେଦନ କରାଯାଇଛି। ଯଜ୍ଞର ପବିତ୍ର ବାତାବରଣ ମଧ୍ୟରେ ରାଜଧାନୀବାସୀ ଏକ ଆଧ୍ୟାତ୍ମିକ ଅନୁଭୂତି ଲାଭ କରିବେ ବୋଲି ଆଶା କରାଯାଉଛି।
