ନୂଆଦିଲ୍ଲୀସ୍ଥିତ ଇଣ୍ଡିଆ ଇଣ୍ଟରନ୍ୟାସନାଲ ସେଣ୍ଟର (ଆଇଆଇସି) ଆର୍ଟ ଗ୍ୟାଲେରୀରେ ଓଡ଼ିଶାର ବିଶିଷ୍ଟ ସମସାମୟିକ ଚିତ୍ରଶିଳ୍ପୀ ବିରେନ୍ଦ୍ର ପାଣିଙ୍କ ଏକକ ଚିତ୍ରକଳା ପ୍ରଦର୍ଶନୀ ‘ନିଓ-ଅର୍ବାନ ଅବତାର: ଏ ମାଇଥୋପୋଏସିସ୍ ଅଫ୍ ଦି କଣ୍ଟେମ୍ପୋରାରୀ ଟାଇମ୍ସ-୨’ ଅନୁଷ୍ଠିତ ହୋଇଯାଇଛି। ପୁରୁଷୋତ୍ତମ ପବ୍ଲିକ ଟ୍ରଷ୍ଟ ସହଯୋଗରେ ଆୟୋଜିତ ଏହି ପ୍ରଦର୍ଶନୀ ଗତ ଜୁଲାଇ ୧ ତାରିଖରୁ ୧୪ ତାରିଖ ପର୍ଯ୍ୟନ୍ତ ଚାଲିଥିବା ବେଳେ ଏଥିରେ ଜୁଲାଇ ୩୦ ତାରିଖରେ ଏକ ଭବ୍ୟ ଉଦଘାଟନୀ ଉତ୍ସବ ଅନୁଷ୍ଠିତ ହୋଇଥିଲା। ଏହି ପ୍ରଦର୍ଶନୀକୁ ଜେଏନୟୁର ପ୍ରଫେସର ପାରୁଲ ଦାବେ ମୁଖାର୍ଜୀ, କଳା ଐତିହାସିକ ଡ. ରାଜଶ୍ରୀ ବିଶ୍ୱାଳ, ପଦ୍ମଭୂଷଣ ସମ୍ମାନିତ ପ୍ରସିଦ୍ଧ ଶିଳ୍ପୀ ଜତିନ ଦାସ, ଓଡ଼ିଶୀ ନୃତ୍ୟଶିଳ୍ପୀ ଶାରନ ଲୋୱେନ, ପୂର୍ବତନ କୂଟନୀତିଜ୍ଞ ଅମରେନ୍ଦ୍ର ଖଟୁଆ, ଐତିହାସିକ ନିବେଦିତା ମହାନ୍ତି ଓ ପୂର୍ବତନ ଆଇପିଏସ ସଞ୍ଜୀବ ପାଟଜୋଶୀଙ୍କ ଭଳି ବହୁ ପ୍ରତିଷ୍ଠିତ ବ୍ୟକ୍ତିତ୍ୱ ଉଦଘାଟନ କରିଥିଲେ। ଏଥିସହ ପ୍ରଦର୍ଶନୀ ଅବସରରେ ଜୁଲାଇ ୧୧ ତାରିଖରେ ଏକ ସ୍ୱତନ୍ତ୍ର ଆଲୋଚନା ଚକ୍ର ମଧ୍ୟ ଆୟୋଜିତ ହୋଇଥିଲା, ଯେଉଁଥିରେ କଳା ସମୀକ୍ଷକ ଜର୍ଜିନା ମ୍ୟାଡକ୍ସଙ୍କ ସଞ୍ଚାଳନାରେ କଳା ଲେଖିକା ସୁଷମା ବହଲ, ଐତିହାସିକ ପ୍ରଫେସର ସୀମା ବାୱା, ଟ୍ରଷ୍ଟି ରାଧିକା ଧୁମାଲ ଏବଂ ସ୍ୱୟଂ ଶିଳ୍ପୀ ବିରେନ୍ଦ୍ର ପାନୀ ଯୋଗଦେଇ କଳାକୃତିଗୁଡ଼ିକର ବିଭିନ୍ନ ଦିଗ ଉପରେ ଚର୍ଚ୍ଚା କରିଥିଲେ।
ଶିଳ୍ପୀ ବିରେନ୍ଦ୍ର ପାଣିଙ୍କ ୩୫ ବର୍ଷର କଳାତ୍ମକ ଯାତ୍ରାର ପରିପ୍ରକାଶ କରୁଥିବା ଏହି ପ୍ରଦର୍ଶନୀରେ ମୋଟ ୮୦ଟି ଚିତ୍ରକଳା, ସ୍କେଚ୍ ଓ ପ୍ରିଣ୍ଟ ସ୍ଥାନ ପାଇଥିଲା। ଏହାକୁ ମୁଖ୍ୟତଃ ପାଞ୍ଚଟି ଭାଗରେ ପ୍ରଦର୍ଶିତ କରାଯାଇଥିଲା। ପ୍ରଥମ ଭାଗରେ ବାରୋଦାରେ ରହୁଥିବା ସମୟର ସେରିଗ୍ରାଫି ପ୍ରିଣ୍ଟ ‘ଡେ ଡ୍ରିମିଂ ଇନ୍ ବାରୋଦା’, ଦ୍ୱିତୀୟ ଭାଗରେ ମାନସିକ ଦ୍ୱନ୍ଦ୍ୱ ଓ ସଂଘର୍ଷକୁ ଦର୍ଶାଉଥିବା ‘୩୬୫ ଡେଜ୍ ଡ୍ରଇଂ ସିରିଜ୍’, ତୃତୀୟ ଭାଗରେ ସ୍ଥାନୀୟ ସଂସ୍କୃତି ଓ ପ୍ରକୃତିର ସମ୍ପର୍କକୁ ନେଇ ପ୍ରସ୍ତୁତ ‘ହ୍ୟାଣ୍ଡମେଡ୍ ମେମୋରୀ ଏବଂ ସାଙ୍ଗୁଇନ୍ ଷ୍ଟୋରୀ ସିରିଜ୍’, ଚତୁର୍ଥ ଭାଗରେ ଆମେରିକାର ସାନ ଡିଏଗୋ ଏବଂ ଭାରତର ସହରୀ ଜୀବନର ଅନୁଭୂତିକୁ ନେଇ ‘ଅର୍ବାନ ଅବତାର ସିରିଜ୍’ ଏବଂ ପଞ୍ଚମ ଭାଗରେ ‘ନିଓ-ଅର୍ବାନ ଅବତାର’ ଶୀର୍ଷକ ଆକ୍ରିଲିକ୍ ଚିତ୍ରକଳା ପ୍ରଦର୍ଶିତ ହୋଇଥିଲା। ଏହି ଅନ୍ତିମ ଭାଗରେ ସିମେଣ୍ଟ ଜଙ୍ଗଲର ପ୍ରତୀକ ସ୍ୱରୂପ ‘ଦି ଅନନୋନ୍ ଓଡ଼ିସି’ ନାମକ ଏକ ବୃହତ୍ ଷଡ଼ଭୁଜାକାର (ହେକ୍ସାଗୋନାଲ୍) କଳାକୃତି ଦର୍ଶକଙ୍କୁ ବେଶ୍ ଆକୃଷ୍ଟ କରିଥିଲା। ଏହି ସମସ୍ତ ଚିତ୍ରକଳା ପାରମ୍ପରିକ ପଟ୍ଟଚିତ୍ର, ତାଳପତ୍ର ଖୋଦେଇ ଓ ଓଡ଼ିଶାର କଳା-ସ୍ଥାପତ୍ୟ ଦ୍ୱାରା ପ୍ରଭାବିତ। ଏଥିସହ ଜୋଗେନ ଚୌଧୁରୀ, କେ. ଜି ସୁବ୍ରମଣ୍ୟନ, ଭୂପେନ ଖାକର, ଜ୍ୟୋତି ଭଟ୍ଟ ଏବଂ ପାଶ୍ଚାତ୍ୟ ଶିଳ୍ପୀ ଡେଭିଡ୍ ହକ୍ନୀ ଓ ଲୁସିଆନ୍ ଫ୍ରଏଡ୍ଙ୍କ କଳା ଶୈଳୀର ପ୍ରଭାବ ମଧ୍ୟ ଏହି ପ୍ରଦର୍ଶନୀରେ ଚିତ୍ରିତ ହୋଇଥିବା ଶିଳ୍ପୀଙ୍କ ସୂଚନାରୁ ଜଣାପଡ଼ିଛି। ମାଧ୍ୟମ ଓ ଶୈଳୀର ଏହି ବିବର୍ତ୍ତନ ଜରିଆରେ ଅତି-ଆଧୁନିକତା, ବସ୍ତୁବାଦୀ ସହରୀକରଣ, ଗ୍ରାହକବାଦ, ପରିବେଶର ଅବକ୍ଷୟ ଏବଂ ସ୍ଥାନୀୟ ଲୋକକଳା ପ୍ରତି ହେଉଥିବା ଅବହେଳାକୁ ବ୍ୟଙ୍ଗାତ୍ମକ ଢଙ୍ଗରେ କଳାକୃତି ମାଧ୍ୟମରେ ଉପସ୍ଥାପନ କରାଯାଇଛି।
ଶାନ୍ତିନିକେତନର କଳା ଭବନ ଏବଂ ବାରୋଦାର ଏମ୍.ଏସ୍ ୟୁନିଭର୍ସିଟିରୁ କଳା ଶିକ୍ଷା ଲାଭ କରିଥିବା ଶିଳ୍ପୀ ବିରେନ୍ଦ୍ର ପାନୀ ବର୍ତ୍ତମାନ ଦିଲ୍ଲୀ, ଓଡ଼ିଶା ଓ ବାରୋଦାକୁ ନିଜର କର୍ମକ୍ଷେତ୍ର କରିଛନ୍ତି। ସେ ଏପର୍ଯ୍ୟନ୍ତ ବିଦେଶରେ (ନ୍ୟୁୟର୍କ, ସାନ ଡିଏଗୋ, ମାଲେସିଆ) ଏବଂ ଭାରତର ବିଭିନ୍ନ ସହରରେ ୧୬ଟି ଏକକ ପ୍ରଦର୍ଶନୀ କରିବା ସହ ୩୫୦ରୁ ଅଧିକ ଗ୍ରୁପ୍ ପ୍ରଦର୍ଶନୀରେ ଭାଗ ନେଇସାରିଛନ୍ତି। କେନ୍ଦ୍ର ସରକାରଙ୍କ ମାନବ ସମ୍ବଳ ବିକାଶ ମନ୍ତ୍ରଣାଳୟର ସିନିୟର ଓ ଜୁନିୟର ଫେଲୋସିପ୍ ସମେତ ସେ ନାଗପୁରର ଏସସିଜେଡସିସି ଜାତୀୟ ପୁରସ୍କାର ଏବଂ ଓଡ଼ିଶା ରାଜ୍ୟ ଲଳିତ କଳା ଏକାଡେମୀ ପୁରସ୍କାରରେ ସମ୍ମାନିତ ହୋଇଛନ୍ତି। କଳା ମାଧ୍ୟମରେ ସମାଜ ଓ ସଂସ୍କୃତିକୁ ଯୋଡ଼ିବା ପାଇଁ ସେ ଡ. ରାଜଶ୍ରୀ ବିଶ୍ୱାଳଙ୍କ ସହ ମିଶି ‘ନ୍ୟୁ ବ୍ରିଜ୍ ଇଣ୍ଡିଆ’ ନାମକ ଏକ ଅଣ-ଲାଭଦାୟକ ସାଂସ୍କୃତିକ ଅନୁଷ୍ଠାନ ମଧ୍ୟ ଗଠନ କରିଛନ୍ତି। ବିରେନ୍ଦ୍ରଙ୍କ ମତରେ, ଏହି ‘ନିଓ-ଅର୍ବାନ ଅବତାର’ ପ୍ରଦର୍ଶନୀ ହେଉଛି ବର୍ତ୍ତମାନର ଜଟିଳ ଓ ଯାନ୍ତ୍ରିକ ସମୟ ମଧ୍ୟରେ ମାନବ ସଭ୍ୟତାକୁ ଏକ ସକାରାତ୍ମକ ଦିଗରେ ଆଗେଇ ନେବା ପାଇଁ ‘ନିଜସ୍ୱ ସତ୍ତା’ ଏବଂ ‘ଆଶାର’ ଏକ କଳ୍ପନାତ୍ମକ ଅଭିବ୍ୟକ୍ତି।