ଇସଲାମାବାଦ: ମୁମ୍ବାଇରେ ୨୬ ନଭେମ୍ବର (୨୬/୧୧) ୨୦୦୮ରେ ହୋଇଥିବା ଆତଙ୍କବାଦୀ ଆକ୍ରମଣର ଷଡଯନ୍ତ୍ରକାରୀ ତହବୁର ରାଣାକୁ ଭାରତକୁ ପ୍ରତ୍ୟର୍ପଣ କରାଯିବା ଖବର ଶୁଣି ପାକିସ୍ତାନ ଚିନ୍ତିତ ହୋଇଯାଇଛି । ପାକିସ୍ତାନ ତହବୁର ପ୍ରସଙ୍ଗରୁ ନିଜକୁ ଦୂରେଇ ରଖିବାକୁ ଚେଷ୍ଟା କରୁଛି। ପାକିସ୍ତାନରେ ଜନ୍ମିତ ତହବୁର ହୁସେନ ରାଣାଙ୍କୁ ଭାରତକୁ ପ୍ରତ୍ୟର୍ପଣ ସମ୍ପର୍କରେ ପାକିସ୍ତାନ ବୈଦେଶିକ ମନ୍ତ୍ରଣାଳୟର ପ୍ରଥମ ପ୍ରତିକ୍ରିୟାରେ ମଧ୍ୟ ଏହି ଭୟ ପ୍ରତିଫଳିତ ହୋଇଥିଲା। ରାଣାଙ୍କ ପ୍ରତ୍ୟର୍ପଣ ସମ୍ପର୍କରେ ପ୍ରଶ୍ନର ଉତ୍ତରରେ, ପାକିସ୍ତାନୀ ବୈଦେଶିକ ମନ୍ତ୍ରଣାଳୟ ତାଙ୍କୁ ଜଣେ କାନାଡିଆନ ନାଗରିକ ଭାବରେ ଉଲ୍ଲେଖ କରିଥିଲା ଏବଂ ପାକିସ୍ତାନ ସହିତ କୌଣସି ସମ୍ପର୍କକୁ ଅସ୍ୱୀକାର କରିବାକୁ ଚେଷ୍ଟା କରିଥିଲା।
ପାକିସ୍ତାନ ବୈଦେଶିକ କାର୍ଯ୍ୟାଳୟ ଏକ ଭିଡିଓ ବିବୃତିରେ କହିଛି ଯେ, ‘ତହବୁର ରାଣା ଗତ ଦୁଇ ଦଶନ୍ଧି ଧରି ତାଙ୍କର ପାକିସ୍ତାନୀ ଡକ୍ୟୁମେଣ୍ଟ ନବୀକରଣ କରିନାହାନ୍ତି।’ ତାଙ୍କର କାନାଡିଆନ ନାଗରିକତା ସ୍ପଷ୍ଟ। ଯଦିଓ ତହବୁର ରାଣାଙ୍କର କାନାଡିଆନ ନାଗରିକତା ଅଛି, ସେ ପାକିସ୍ତାନରେ ଜନ୍ମଗ୍ରହଣ କରିଥିଲେ ଏବଂ ପାକିସ୍ତାନୀ ସେନା ଏବଂ ଆଇଏସଆଇର ଜଣେ ସଦସ୍ୟ ଥିଲେ। ପାକିସ୍ତାନ ଏହା ମଧ୍ୟ ଭୟ କରୁଛି ଯେ, ଭାରତକୁ ପ୍ରତ୍ୟର୍ପଣ ପରେ ତହବୁର ମୁମ୍ବାଇ ଆକ୍ରମଣରେ ପାକିସ୍ତାନର ଭୂମିକାର ପର୍ଦ୍ଦାଫାଶ୍ କରିବେ।
ତହବୁରଙ୍କୁ ଆମେରିକାରୁ ଭାରତ ଆଣିବା ପାଇଁ ଦୀର୍ଘ ଆଇନଗତ ଲଢ଼େଇ ପରେ ପ୍ରତ୍ୟାର୍ପଣ କରାଯାଇଛି। ତହବୁର ରାଣା ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣର ମୁଖ୍ୟ ଷଡ଼ଯନ୍ତ୍ରକାରୀ ଡେଭିଡ୍ କୋଲମ୍ୟାନ୍ ହେଡଲି ଓରଫ ଦାଉଦ୍ ଗିଲାନିଙ୍କର ଜଣେ ଘନିଷ୍ଠ ସହଯୋଗୀ। ୨୦୦୮ ଆତଙ୍କବାଦୀ ଆକ୍ରମଣରେ ୧୬୬ ଜଣ ପ୍ରାଣ ହରାଇଥିଲେ। ବୁଧବାର (୯ ଏପ୍ରିଲ) ଦିନ ରାଣାଙ୍କୁ ନେଇ ଏକ ସ୍ୱତନ୍ତ୍ର ଚାର୍ଟର୍ଡ ବିମାନ ଆମେରିକାରୁ ଭାରତ ଅଭିମୁଖେ ଯାତ୍ରା କରିଥିଲା।
ମୁମ୍ବାଇ ଆତଙ୍କବାଦୀ ଆକ୍ରମଣର ଷଡଯନ୍ତ୍ରକାରୀ ତହବୁର ରାଣାଙ୍କୁ ତିହାର ଜେଲରେ ରଖିବା ପାଇଁ ପ୍ରସ୍ତୁତି ଚାଲିଛି । ସୂତ୍ର ଅନୁସାରେ, ୬୪ ବର୍ଷୀୟ ରାଣାଙ୍କୁ ଦିଲ୍ଲୀର ତିହାର ଜେଲର ଏକ ଉଚ୍ଚ ସୁରକ୍ଷା ୱାର୍ଡରେ ରଖାଯିବ। ଆତଙ୍କବାଦୀଙ୍କୁ ରଖିବା ପାଇଁ ଜେଲରେ ସମସ୍ତ ଆବଶ୍ୟକୀୟ ପ୍ରସ୍ତୁତି ହୋଇସାରିଛି।
