ରାଜସ୍ଥାନର ଜୟପୁରର ଗୋପାଳପୁରା ଥିବା ଏକ ଘରୋଇ କୋଚିଂ ସେଣ୍ଟରରେ ବିଷାକ୍ତ ଗ୍ୟାସ ଲିକ୍ ହେବା ଯୋଗୁ ୧୨ରୁ ଅଧିକ ଛାତ୍ରଛାତ୍ରୀ ଅଚେତ ହୋଇପଡିଛନ୍ତି । ସେମାନଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ଗୁରୁତର ରହିଛି । ସେମାନଙ୍କୁ ଆଇସିୟୁରେ ଭର୍ତ୍ତି କରାଯାଇଛି । ଅନ୍ୟମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି । କ୍ଲାସ ଚାଲିଥିବା ବେଳେ ପିଲାମାନେ ହଠାତ୍ ନିଶ୍ବାସ ପ୍ରଶ୍ବାସ ନେବାରେ ଅସୁବିଧା ହୋଇଥିଲା । ସେମାନଙ୍କ ମୁଣ୍ଡ ବିନ୍ଧିବା ସହିତ ତଳେ ପଡିଯାଇଥିଲେ ।
ଖବର ମୁତାବକ, ଗୋପାଳପୁରାରେ ଥିବା କୋଚିଂ ସେଣ୍ଟରରେ ଗତକାଲି ସନ୍ଧ୍ୟା ପ୍ରାୟ ୭ଟା ସମୟରେ ପିଲାମାନେ କ୍ଲାସ କରୁଥିଲେ । ଲହି ସମୟରେ କିଛି ଛାତ୍ରୀଙ୍କୁ ନିଶ୍ବାସ ନେବାରେ ଅସୁବିଧା ହେବା ପରେ ମୁଣ୍ଡ ବିନ୍ଧା ହୋଇଥିଲା । ଫଳରେ ୧୨ ଛାତ୍ରଛାତ୍ରୀ ଅସୁସ୍ଥ ହୋଇ ତଳେ ପଡିଯାଇଥିଲେ । ସ୍ୱରେଜ ଲାଇନରୁ ବିଷାକ୍ତ ଗ୍ୟାସର ଗନ୍ଧ କ୍ଲାସ ରୁମ ଭିତରକୁ ପଶି ଆସିଥିଲା । ତୁରନ୍ତ ଆମ୍ବୁଲାନ୍ସ ଡକା ଯାଇ ପିଲାମାନଙ୍କୁ ଡାକ୍ତଖାନାରେ ଭର୍ତ୍ତି କରାଯାଇଥିଲା । ସେମାନଙ୍କ ମଧ୍ୟରୁ ୨ଜଣ ଅବସ୍ଥା ଗୁରୁତର ଥିବାରୁ ଆଇସିୟୁରେ ଭର୍ତ୍ତି କରାଯାଇଥିଲା ।
ଏମାନଙ୍କ ମଧ୍ୟରେ ୧୦ ଛାତ୍ରୀ, ଜଣେ ଛାତ୍ରୀ ଏବଂ ଜଣେ ରୋଷେୟା ସାମିଲ ରହିଛନ୍ତି । ତେବେ ଗତ ୧୫-୨୦ ଦିନ ହେଲାଣି କୋଚିଂ ସେଣ୍ଟରରେ କୌଣସି ଗନ୍ଧ ଆସୁଥିଲା । ପୋଲିସ ଅଧିକାରୀଙ୍କ କହିବା ଅନୁଯାୟୀ, ନାଳରୁ ଆସୁଥିବା ଗନ୍ଧ କିମ୍ବା ଗ୍ୟାସ ଲିକ୍, ଛାତ ଉପରେ ଥିବା ରୋଷେଇ ଘର ଧୂଆଁରୁ ଏଭଳି ହୋଇଛି ତାହା ଜଣାପଡିନାହିଁ ।
ଏସଡିଏମ ରୋଜଣେ ଜାଖଡ କହିବା ମୁତାବକ, କିଛି ଛାତ୍ରୀ ବେହୋସ ହୋଇଥିଲେ । ସେମାନଙ୍କୁ ଯାଞ୍ଚ ପାଇଁ ହସପିଟାଲ ନିଆଯାଇଛି । ତେବେ ଘଟଣା ପରେ ଛାତ୍ରମାନେ ବିରୋଧ ପ୍ରଦର୍ଶନ କରୁଛନ୍ତି । ଡାକ୍ତର କହିବା ମୁତାବକ, ୭ ଜଣ ପିଲା ନିଶ୍ବାସ ନେବାରେ ସମସ୍ୟା ହେବା କାରଣରୁ ହସପିଟାଲରେ ଭର୍ତ୍ତି ହୋଇଥିଲେ । ସମସ୍ତେ ଛାତ୍ରଛାତ୍ରୀ ଲଗାତର କାଶୁଥିବା ବେଳେ ନିଶ୍ବାସ ନେବାରେ ସମସ୍ୟାରେ ଥିଲେ । ତେବେ ଏବେ ସେମାନଙ୍କ ସ୍ବାସ୍ଥ୍ୟବସ୍ଥା ଭଲ ରହିଛି ।
ଘଟଣା ପରେ ସେଠାରେ ଉପସ୍ଥିତ ଥିବା ଅନ୍ୟ ଛାତଛାତ୍ରୀ କୋଚିଂ ସେଣ୍ଟର ବାହାରେ ପ୍ରଦର୍ଶନ କରୁଛନ୍ତି । ପିଲାମାନେ କୋଚିଂ ସେଣ୍ଟରର ଅବ୍ୟବସ୍ଥା ଏବଂ ଗନ୍ଧକୁ ନେଇ ଅସନ୍ତୋଷ ପ୍ରକାଶ କରିଥିଲେ । ପୋଲିସ ମାମଲାର ଯାଞ୍ଚ କରୁଛି ।
