ନୂଆଦିଲ୍ଲୀ: ଲୋକସଭାରେ ବୁଧବାର ଜମ୍ମୁ-କଶ୍ମୀର ସଂରକ୍ଷଣ (ସଂଶୋଧନ) ବିଲ୍ ୨୦୨୩ ଏବଂ ଜମ୍ମୁ-କଶ୍ମୀର ପୁନର୍ଗଠନ ବିଲ୍ ୨୦୨୩ ଉପରେ ଆଲୋଚନା ବେଳେ କଂଗ୍ରେସ ଓ ପୂର୍ବତନ ପ୍ରଧାନମନ୍ତ୍ରୀ ଜଓ୍ବାହରଲାଲ ନେହରୁଙ୍କୁ ଟାର୍ଗେଟ କରିଛନ୍ତି ଗୃହମନ୍ତ୍ରୀ ଅମିତ ଶାହା । ନେହରୁଙ୍କ ଭୁଲ ଯୋଗୁଁ ପିଓକେ ସୃଷ୍ଟି ହୋଇଛି ବୋଲି ସେ କହିଛନ୍ତି। ପଣ୍ଡିତ ନେହେରୁ ପ୍ରଧାନମନ୍ତ୍ରୀ ଥିବା ସମୟରେ ଦୁଇଟି ବଡ଼ ଭୁଲ ହୋଇଥିଲା, ଯେଉଁଥିପାଇଁ କାଶ୍ମୀର ବର୍ଷ ବର୍ଷ ଧରି କ୍ଷତି ସହିଥିଲା। ଯେତେବେଳେ ଆମ ସେନା ବିଜୟୀ ହେଉଥିଲା, ସେତେବେଳେ ପଞ୍ଜାବ ଅଞ୍ଚଳ ଆସିବା ଏବଂ ପାକିସ୍ତାନ ଅଧିକୃତ କଶ୍ମୀର (ପିଓକେ)ର ଜନ୍ମ ହେବା ମାତ୍ରେ ଅସ୍ତ୍ରବିରତି ଲାଗୁ କରାଯାଇଥିଲା।
ଯଦି ଅସ୍ତ୍ରବିରତି ୩ ଦିନ ବିଳମ୍ବ ହୋଇଥାନ୍ତା, ତେବେ ପାକିସ୍ତାନ ଅଧିକୃତ କଶ୍ମୀର ଆଜି ଭାରତର ଅଂଶ ହୋଇଥାନ୍ତା। ଆମ ପ୍ରସଙ୍ଗକୁ ଜାତିସଂଘକୁ ନିଆଯାଇଥିଲା, ଯାହା ଏକ ବଡ଼ ଭୁଲ ବୋଲି ସେ କହିଥିଲେ । କଂଗ୍ରେସ ସାଂସଦମାନେ ଅମିତ ଶାହାଙ୍କ ଏହି ବୟାନକୁ ତୀବ୍ର ବିରୋଧ କରିବା ସହ ଗୃହରେ ତୀବ୍ର ହଙ୍ଗାମା ହୋଇଥିଲା।
ଏହା ଉପରେ ଅମିତ ଶାହା କହିଛନ୍ତି ଯେ ଯଦି ଆପଣ ରାଗିବାକୁ ଚାହୁଁଛନ୍ତି ତେବେ ମୋ ଉପରେ ନୁହେଁ, ନେହରୁଙ୍କ ଉପରେ ରାଗିଯାଆନ୍ତୁ । ଏହାପରେ କଂଗ୍ରେସ ସାଂସଦମାନେ ଲୋକସଭାରୁ ଓ୍ଵାକ୍ ଆଉଟ୍ କରିଥିଲେ।
