ନୂଆଦିଲ୍ଲୀ : ଲଣ୍ଡନରେ ଭାରତୀୟ ହାଇକମିସନ ବାହାରେ ଖଲିସ୍ତାନ ସମର୍ଥକମାନେ କରିଥିବା ହିଂସା ଉପରେ ପ୍ରତିକ୍ରିୟା ରଖି ଭାରତର ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର କହିଛନ୍ତି ଯେ ଯେତେବେଳେ ଭାରତକୁ ସମ୍ମାନ ମିଳେ ନାହିଁ ସେତେବେଳେ ସେ ରାଗି ଯାଆନ୍ତି । ମାର୍ଚ୍ଚ ମାସରେ କିଛି ଲୋକ ବ୍ରିଟେନରେ ଥିବା ଭାରତୀୟ ଦୂତାବାସ ବାହାରେ ଖଲିସ୍ତାନୀ ବିଚ୍ଛିନ୍ନତାବାଦୀ ଅମୃତପାଲ ସିଂହଙ୍କ ପତାକା ଓ ପୋଷ୍ଟର ଧରି ବିକ୍ଷୋଭ ପ୍ରଦର୍ଶନ କରିଥିଲେ। ଲଣ୍ଡନରେ ଥିବା ଭାରତୀୟ ହାଇକମିସନରେ ଚଢି ପତାକା ତଳକୁ ଓହ୍ଲାଇବାକୁ ଚେଷ୍ଟା କରିଥିଲେ ।
ଏକ ପଡକାଷ୍ଟରେ ଯୋଗ ଦେଇ ଜୟଶଙ୍କର ଭାରତର ବୈଦେଶିକ ନୀତି ଏବଂ ଗତିଶୀଳ ଭୂ-ରାଜନୈତିକ ଦୃଶ୍ୟପଟରେ ଉଦୀୟମାନ ଆହ୍ୱାନ ସହିତ ଜଡ଼ିତ ଅନେକ ପ୍ରସଙ୍ଗ ଉପରେ ବକ୍ତବ୍ୟ ରଖିଥିଲେ। ସେ କହିଥିଲେ, ଯେତେବେଳେ ଲୋକେ ବ୍ୟକ୍ତିଗତ ସ୍ବାର୍ଥ ପୂରଣ ପାଇଁ ଉଦ୍ୟମ କରନ୍ତି, ତେବେ ସେ ତାହାକୁ ଅଣଦେଖା କରନ୍ତି, କିନ୍ତୁ ଯେତେବେଳେ ‘ଭାରତ’କୁ ସମ୍ମାନ ଦିଆଯାଏ ନାହିଁ, ସେ କ୍ରୋଧିତ ହୁଅନ୍ତି ।
ଜୟଶଙ୍କର ମଧ୍ୟ ଭାରତୀୟ ଦୂତାବାସର କୂଟନୀତିଜ୍ଞମାନଙ୍କୁ ସୁରକ୍ଷା ଯୋଗାଇବା ପାଇଁ ବ୍ରିଟେନ ନିଜର ଦାୟିତ୍ୱ ପୂରଣ କରିନଥିଲା ବୋଲି ଅଭିଯୋଗ କରିଛନ୍ତି। ଯେଉଁ ଦେଶରେ ହାଇ କମିସନ ବା ଦୂତାବାସ ରହିଛି ସେହି ଦେଶ ସୁରକ୍ଷା ଦେବ ବୋଲି ଆଶା କରାଯାଏ । କିନ୍ତୁ ବ୍ରିଟିଶ ସରକାର ତାହା ଯୋଗାଇନଥିଲେ । ଏ ନେଇ ବ୍ରିଟିଶ ସରକାରଙ୍କ ସହ ଆଲୋଚନା କରିଛନ୍ତି ବୋଲି ସେ କହିଛନ୍ତି ।
