ଭୁବନେଶ୍ବର : ଓଡ଼ିଆ ସାହିତ୍ୟର କାଳଜୟୀ କାବ୍ୟ ‘ରସକଲ୍ଲୋଳ’ର ଅମର ସ୍ରଷ୍ଟା ଭକ୍ତକବି ଦୀନକୃଷ୍ଣ ଦାସଙ୍କ ପବିତ୍ର ଜୟନ୍ତୀ ଅବସରରେ ରାଜଧାନୀ ଭୁବନେଶ୍ୱରରେ ଏକ ଶ୍ରଦ୍ଧାଞ୍ଜଳି ସଭା ଓ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି। ଶ୍ରୀଜଗନ୍ନାଥ ଆଶ୍ରିତ ମଣ୍ଡଳୀ ଟ୍ରଷ୍ଟ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମଟି ଗତ ୩ ତାରିଖ ଦିନ ସ୍ଥାନୀୟ ଶରଣ ଶ୍ରୀକ୍ଷେତ୍ର ପରିସରରେ ଅତ୍ୟନ୍ତ ଭକ୍ତିପୂତ ପରିବେଶ ମଧ୍ୟରେ ସମ୍ପନ୍ନ ହୋଇଥିଲା।
ଏହି ଆଲୋଚନା ସଭାରେ ବିଶିଷ୍ଟ ସମାଜସେବୀ ହରି ବନ୍ଧୁ ମଙ୍ଗରାଜ ସଭାପତିତ୍ୱ କରିଥିବା ବେଳେ କବିଙ୍କ ଜୀବନୀ ଓ ଓଡ଼ିଆ ସାହିତ୍ୟକୁ ତାଙ୍କର ଅବଦାନ ସମ୍ପର୍କରେ ଆଲୋଚନା କରାଯାଇଥିଲା। କାର୍ଯ୍ୟକ୍ରମର ପ୍ରାରମ୍ଭରେ ଭକ୍ତକବି ଦୀନକୃଷ୍ଣ ଦାସଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରାଯିବା ସହ ଧୂପ ଓ ଦୀପ ପ୍ରଜ୍ୱଳନ କରି ତାଙ୍କ ପ୍ରତି ଭକ୍ତିପୂର୍ଣ୍ଣ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା। ଉପସ୍ଥିତ ଅତିଥିବୃନ୍ଦ ଓ ଶ୍ରଦ୍ଧାଳୁମାନେ କବିଙ୍କ ସ୍ମୃତି ଚାରଣ କରିବା ସହ ତାଙ୍କର ସାହିତ୍ୟିକ କୃତି ଓ ଜଗନ୍ନାଥ ଭକ୍ତି ସମଗ୍ର ଓଡ଼ିଆ ଜାତି ପାଇଁ କିପରି ଏକ ଅମୂଲ୍ୟ ସମ୍ପଦ, ସେ ସମ୍ପର୍କରେ ମତ ରଖିଥିଲେ।
ଏହି ଅବସରରେ ଆୟୋଜିତ ଆଲୋଚନାଚକ୍ରରେ ବିଶିଷ୍ଟ ବକ୍ତା ଓ ଆଲୋଚକ ଭାବେ ବିରଜା ପ୍ରସାଦ ଶତପଥୀ, ରମାକାନ୍ତ ମିଶ୍ର, କୈଳାସ ଚନ୍ଦ୍ର ରଥ, ଭାବଗ୍ରାହୀ ପରିଡା ଏବଂ ଜୟନ୍ତ କୁମାର ପରିଡା ଯୋଗଦାନ କରିଥିଲେ। ଆଲୋଚକମାନେ ନିଜ ନିଜ ବକ୍ତବ୍ୟରେ କହିଥିଲେ ଯେ, କବି ଦୀନକୃଷ୍ଣ ଦାସ କେବଳ ଜଣେ କବି ନଥିଲେ, ବରଂ ସେ ଥିଲେ ଜଣେ ନିଷ୍ଠାବାନ ଜଗନ୍ନାଥ ପ୍ରେମୀ ଓ ସ୍ପଷ୍ଟବାଦୀ ମାନବବାଦୀ ସ୍ରଷ୍ଟା। ତାଙ୍କର ‘ରସକଲ୍ଲୋଳ’ କାବ୍ୟ ଓଡ଼ିଆ ସାହିତ୍ୟର ଏକ ମାଇଲଖୁଣ୍ଟ, ଯାହା ଶବ୍ଦ ସଂଯୋଜନା ଓ ଭକ୍ତିରସର ଅପୂର୍ବ ସମନ୍ୱୟରେ ପରିପୂର୍ଣ୍ଣ। କବିଙ୍କ ବହୁମୁଖୀ ପ୍ରତିଭା ଉପରେ ଆଲୋକପାତ କରି ବକ୍ତାମାନେ ଦର୍ଶାଇଥିଲେ ଯେ, ସେ ସମୟର ସାମାଜିକ ପ୍ରତିବନ୍ଧକ ସତ୍ତ୍ୱେ କବି କିପରି ନିଜର ଲେଖନୀ ମାଧ୍ୟମରେ ସଂସ୍କାର ଓ ଭକ୍ତିର ବାର୍ତ୍ତା ପ୍ରସାର କରିଥିଲେ। ତାଙ୍କ କବିତାରେ ଥିବା ଛନ୍ଦ, ଆଳଙ୍କାରିକ ଶୈଳୀ ଏବଂ ଶ୍ରୀକୃଷ୍ଣଙ୍କ ଲୀଳାର ବର୍ଣ୍ଣନା ଆଜି ବି ପାଠକ ଓ ଶ୍ରଦ୍ଧାଳୁମାନଙ୍କୁ ବିମୋହିତ କରେ
ଶ୍ରୀଜଗନ୍ନାଥ ଆଶ୍ରିତ ମଣ୍ଡଳୀ ଟ୍ରଷ୍ଟର ଏହି ପ୍ରୟାସକୁ ଉପସ୍ଥିତ ବୁଦ୍ଧିଜୀବୀ ଓ ଭକ୍ତମାନେ ବେଶ୍ ପ୍ରଶଂସା କରିଥିଲେ। ଶେଷରେ ସୁରଜିତ ମଙ୍ଗରାଜ ସମସ୍ତ ଅତିଥି, ଆଲୋଚକ ଓ ଉପସ୍ଥିତ ସଦସ୍ୟମାନଙ୍କୁ ଧନ୍ୟବାଦ ଅର୍ପଣ କରିଥିଲେ।
