ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ସେପ୍ଟେମ୍ବର ୩୦ରେ ବସିଥିବା କେନ୍ଦ୍ର କ୍ୟାବିନେଟ୍ ଏବଂ CCEA ବୈଠକରେ କୃଷି ଓ ଅକ୍ଷୟ ଶକ୍ତି କ୍ଷେତ୍ରକୁ ନେଇ ଏକାଧିକ ନିଷ୍ପତ୍ତି ନିଆଯାଇଛି। ବିଶେଷକରି ୨୦୨୭-୨୮ ମାର୍କେଟିଂ ସିଜନ୍ ପାଇଁ ୬ଟି ରବି ଫସଲର ନ୍ୟୂନତମ ସହାୟକ ମୂଲ୍ୟ ବା MSP ବୃଦ୍ଧିକୁ ଅନୁମୋଦନ ମିଳିଛି। କେନ୍ଦ୍ର ସରକାରଙ୍କ ନିଷ୍ପତ୍ତି ଅନୁସାରେ, ଗହମର MSP କ୍ୱିଣ୍ଟାଲ ପିଛା ୨୫ ଟଙ୍କା ବଢ଼ି ୨,୬୧୦ ଟଙ୍କା ହୋଇଛି। ବାର୍ଲିର MSP ୧୩୬ ଟଙ୍କା ବଢ଼ି ୨,୨୮୬ ଟଙ୍କା, ଚଣା ୮୩ ଟଙ୍କା ବଢ଼ି ୫,୯୫୮ ଟଙ୍କା ଏବଂ ମଶୁର ଡାଲିର MSP ୩୯୦ ଟଙ୍କା ବଢ଼ି ୭,୩୯୦ ଟଙ୍କା ହୋଇଛି। ସେହିପରି ସୋରିଷର MSP ୪୧୩ ଟଙ୍କା ବଢ଼ି ୬,୬୧୩ ଟଙ୍କା ଏବଂ କୁସୁମର MSP ୬୭୫ ଟଙ୍କା ବଢ଼ି ୭,୨୧୫ ଟଙ୍କା ପ୍ରତି କ୍ୱିଣ୍ଟାଲ ହୋଇଛି। କୁସୁମରେ ସର୍ବାଧିକ ୬୭୫ ଟଙ୍କା ବୃଦ୍ଧି ହୋଇଛି।
ସରକାର କହିଛନ୍ତି, ଏହି MSP ବୃଦ୍ଧି ଅଲ୍ ଇଣ୍ଡିଆ ଓଜନଯୁକ୍ତ ହାରାହାରି ଉତ୍ପାଦନ ଖର୍ଚ୍ଚର ଅତି କମରେ ୧.୫ ଗୁଣା MSP ଦେବା ନୀତି ଆଧାରରେ କରାଯାଇଛି। ଉତ୍ପାଦନ ଖର୍ଚ୍ଚ ଉପରେ ଗହମରେ ୧୦୬ ପ୍ରତିଶତ, ସୋରିଷରେ ୯୬ ପ୍ରତିଶତ, ମସୁରରେ ୯୨ ପ୍ରତିଶତ, ଚଣାରେ ୫୯ ପ୍ରତିଶତ, ବାର୍ଲିରେ ୫୮ ପ୍ରତିଶତ ଏବଂ କୁସୁମରେ ୫୦ ପ୍ରତିଶତ ମାର୍ଜିନ୍ ରହିବ ବୋଲି ସରକାର କହିଛନ୍ତି। ଏହା ମାଧ୍ୟମରେ ଡାଲି ଓ ତୈଳବୀଜ ଚାଷ ସହ ଫସଲ ବିବିଧତାକୁ ଉତ୍ସାହ ଦେବା ଲକ୍ଷ୍ୟ ରହିଛି।
