ମୁମ୍ବାଇ: ପ୍ରଖ୍ୟାତ ସାମାଜିକ କର୍ମୀ ଆନ୍ନା ହଜାରେଙ୍କ ସ୍ୱାସ୍ଥ୍ୟ ଅବସ୍ଥା ଖରାପ ହେବା ପରେ ତାଙ୍କୁ ବମ୍ବେ ହସ୍ପିଟାଲର ଇଣ୍ଟେନସିଭ୍ କେୟାର ୟୁନିଟ୍ (ICU)ରେ ଭର୍ତ୍ତି କରାଯାଇଥିଲା। ଡାକ୍ତରୀ ସୂତ୍ର ଅନୁସାରେ, ୮୭ ବର୍ଷୀୟ ଆନ୍ନା ହଜାରେ ପ୍ରଥମେ ତାଙ୍କ ଜନ୍ମସ୍ଥାନ ରାଲେଗାନ ସିଦ୍ଧି ନିକଟସ୍ଥ ଏକ ମେଡିକାଲରେ ଚିକିତ୍ସିତ ହେଉଥିଲେ। ପରେ ଗୁରୁତର ଭାଇରାଲ୍ ସଂକ୍ରମଣ, ଡିହାଇଡ୍ରେସନ୍ ଏବଂ କିଡନୀ ଜନିତ ଜଟିଳତା ଦେଖାଦେବା ପରେ ତାଙ୍କୁ ଉନ୍ନତ ଚିକିତ୍ସା ପାଇଁ ମୁମ୍ବାଇ ପଠାଯାଇଥିଲା।
ସେ ବର୍ତ୍ତମାନ ଗୌତମ ବଂଶାଲିଙ୍କ ତତ୍ତ୍ୱାବଧାନରେ ICUରେ ନିରନ୍ତର ପର୍ଯ୍ୟବେକ୍ଷଣରେ ଅଛନ୍ତି। ଡାକ୍ତରୀ ବିଶେଷଜ୍ଞମାନେ ରୋଗ ନିର୍ଣ୍ଣୟ ପାଇଁ ପରୀକ୍ଷା କରୁଛନ୍ତି ଏବଂ ରିପୋର୍ଟ ଆଧାରରେ ଚିକିତ୍ସା ଯୋଜନା ସ୍ଥିର କରାଯିବ ବୋଲି କୁହାଯାଇଛି। ତେବେ ତାଙ୍କ ସ୍ୱାସ୍ଥ୍ୟ ଉପରେ କଡ଼ା ନଜର ରଖାଯାଇଛି।
ଦେଶବ୍ୟାପୀ ସମର୍ଥକ ଏବଂ ଶୁଭେଚ୍ଛୁମାନେ ଚିନ୍ତା ପ୍ରକାଶ କରିବା ସହ ତାଙ୍କ ଆରୋଗ୍ୟ ପାଇଁ ପ୍ରାର୍ଥନା କରୁଛନ୍ତି। ଉଲ୍ଲେଖଯୋଗ୍ୟ, ଆନ୍ନା ହଜାରେ ଦେଶରେ ଦୁର୍ନୀତି ବିରୋଧୀ ଆନ୍ଦୋଳନର ଏକ ପ୍ରମୁଖ ଚେହେରା। ବିଶେଷ କରି ୨୦୧୧ ମସିହାରେ ‘ଇଣ୍ଡିଆ ଅଗେନଷ୍ଟ କରପସନ’ ବ୍ୟାନରରେ ଜନ ଲୋକପାଳ ବିଲ୍ ପାଇଁ ସେ କରିଥିବା ଅନଶନ ସାରା ଦେଶରେ ଆଲୋଡନ ସୃଷ୍ଟି କରିଥିଲା।
