ଭୁବନେଶ୍ୱର : ଓଡ଼ିଶା ଜାତୀୟ ଆଇନ ବିଶ୍ୱବିଦ୍ୟାଳୟ (ଏନଏଲୟୁଓ) ପକ୍ଷରୁ ଘରୋଇ ହିଂସାର ଶିକାର ହେଉଥିବା ମହିଳାମାନଙ୍କୁ ତ୍ୱରିତ ନ୍ୟାୟ ପ୍ରଦାନ ଏବଂ ସାଂସ୍ଥାନିକ ଢାଞ୍ଚାର ପୁନର୍ବିନ୍ୟାସ ଉପରେ ଏକ ଦୁଇଦିନିଆ ଜାତୀୟସ୍ତରୀୟ ପରାମର୍ଶ କର୍ମଶାଳା ସଫଳତାର ସହ ସମ୍ପନ୍ନ ହୋଇଯାଇଛି। ଭୁବନେଶ୍ୱରର ‘ଦି କ୍ରାଉନ୍’ ହୋଟେଲଠାରେ ମେ’ ୩୦ ଓ ୩୧ ତାରିଖରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଦେଶର ବିଭିନ୍ନ ପ୍ରାନ୍ତରୁ ବିଶିଷ୍ଟ ଶିକ୍ଷାବିତ୍, ନ୍ୟାୟପାଳିକା, ପୋଲିସ ଅଧିକାରୀ, ସରକାରୀ ବିଭାଗର ପ୍ରତିନିଧି, ଆନ୍ତର୍ଜାତୀୟ ସଂଗଠନ ଏବଂ ଆଇନଜୀବୀମାନେ ଏକତ୍ରିତ ହୋଇ ଘରୋଇ ହିଂସା ରୋକିବା ପାଇଁ ଏକ ସାମଗ୍ରିକ ନିୟମାବଳୀ ବା ପ୍ରୋଟୋକଲ ପ୍ରସ୍ତୁତ କରିବା ଉପରେ ଗୁରୁତ୍ୱାରୋପ କରିଥିଲେ। ନେଦରଲ୍ୟାଣ୍ଡ ବୈଦେଶିକ ମନ୍ତ୍ରଣାଳୟର ସହାୟତାରେ ପରିଚାଳିତ ଏହି ପ୍ରକଳ୍ପର ମୁଖ୍ୟ ଲକ୍ଷ୍ୟ ହେଉଛି ଓଡ଼ିଶାରେ ଘରୋଇ ହିଂସା ବିରୋଧରେ ଏକ ପ୍ରଭାବଶାଳୀ ବ୍ୟବସ୍ଥା ଗଠନ କରିବା।
ଏନଏଲୟୁଓର କୁଳସଚିବ ପ୍ରଫେସର (ଡକ୍ଟର) ରଙ୍ଗିନ ପଲ୍ଲଭ ତ୍ରିପାଠୀ ଏବଂ ପରୀକ୍ଷା ନିୟନ୍ତ୍ରକ ଡକ୍ଟର ସୁମନ ଦାଶ ଭଟ୍ଟାମିଶ୍ରଙ୍କ ନେତୃତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ବିଗତ ଅଢ଼େଇ ବର୍ଷ ଧରି ରାଜ୍ୟର ୩୦ଟି ଜିଲ୍ଲାରେ କରାଯାଇଥିବା ଗବେଷଣାତ୍ମକ କାର୍ଯ୍ୟ ସମ୍ପର୍କରେ ସୂଚନା ଦିଆଯାଇଥିଲା। ବିଭିନ୍ନ ଅଧିବେଶନ ମାଧ୍ୟମରେ ଘରୋଇ ହିଂସା କ୍ଷେତ୍ରରେ ପୋଲିସର ପ୍ରତିକ୍ରିୟା, ପ୍ରମାଣ ସଂଗ୍ରହରେ ଥିବା ବାଧାବିଘ୍ନ, ଆଇନଗତ ସହାୟତା ଏବଂ ସାମାଜିକ ସଚେତନତା ଭଳି ଜଟିଳ ପ୍ରସଙ୍ଗଗୁଡ଼ିକ ଉପରେ ବିଷଦ ଆଲୋଚନା କରାଯାଇଥିଲା। ଏହି ଅବସରରେ ବିଶେଷଜ୍ଞମାନେ ବର୍ତ୍ତମାନର ବ୍ୟବସ୍ଥାରେ ଥିବା ତ୍ରୁଟିଗୁଡ଼ିକୁ ଚିହ୍ନଟ କରିବା ସହ ସେଗୁଡ଼ିକର ସମାଧାନ ପାଇଁ ଅନେକ ବୈପ୍ଳବିକ ପ୍ରସ୍ତାବ ରଖିଥିଲେ।
ଏହି ସମ୍ମିଳନୀରେ ଅତିରିକ୍ତ ଆରକ୍ଷୀ ମହାନିର୍ଦ୍ଦେଶିକା (CAW&CW) ଶାଇନି ଏସ୍. ଯୋଗଦେଇ ମହିଳାମାନଙ୍କୁ ନ୍ୟାୟ ପ୍ରଦାନ ଦିଗରେ ପୋଲିସ ପ୍ରଶାସନର ଭୂମିକା ଉପରେ ଆଲୋକପାତ କରିଥିଲେ। ଏଥିସହ ୟୁଏନଡିପି, ୟୁନିସେଫ୍, ଜାତୀୟ ମାନବାଧିକାର କମିଶନ, ରାଜ୍ୟ ମହିଳା କମିଶନ, ଓଡ଼ିଶା ମାନବାଧିକାର କମିଶନ, ଆଇନ ବିଭାଗ, ବିଜୁ ପଟ୍ଟନାୟକ ରାଜ୍ୟ ପୋଲିସ ଏକାଡେମୀ ଏବଂ ଓଡ଼ିଶା ଆଇନ ସେବା ପ୍ରାଧିକରଣର ପ୍ରତିନିଧିମାନେ ଉପସ୍ଥିତ ରହି ଏହି ପ୍ରୋଟୋକଲକୁ ଅଧିକ ସୁଦୃଢ଼ କରିବା ପାଇଁ ନିଜର ମୂଲ୍ୟବାନ ମତାମତ ଦେଇଥିଲେ। ସମଗ୍ର କାର୍ଯ୍ୟକ୍ରମକୁ ପ୍ରକଳ୍ପ ପରିଚାଳକ ଅମ୍ଳାନଜ୍ୟୋତି ରାଉତ, ତନ୍ମୟ ଦାସ, ମନମିତ୍ ସିଂ ଆରୋରା, ରାଜକିଶୋର ପଣ୍ଡା ଏବଂ ସୁଧାଂଶୁ ଭୂଷଣ ମହାରଣାଙ୍କ ଏକ ଦକ୍ଷ ଟିମ୍ ସଫଳତାର ସହ ପରିଚାଳନା କରିଥିଲେ। ଏହି ପରାମର୍ଶ କର୍ମଶାଳା ଆଗାମୀ ଦିନରେ ଓଡ଼ିଶାରେ ମହିଳାମାନଙ୍କ ପାଇଁ ଏକ ସୁରକ୍ଷିତ ଏବଂ ନ୍ୟାୟପୂର୍ଣ୍ଣ ବାତାବରଣ ସୃଷ୍ଟି କରିବାରେ ସହାୟକ ହେବ ବୋଲି ଆଶା କରାଯାଉଛି।
