ଭୁବନେଶ୍ବର: ରାଜ୍ୟରେ ୪୭୧ ନୂତନ ଗ୍ରାମ ପଞ୍ଚାୟତ କାର୍ଯ୍ୟାଳୟର ଭିତ୍ତିପ୍ରସ୍ତର ସ୍ଥାପନ ହୋଇଛି। ରବିବାର ଏକ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରିମୋଟ ବଟନ ଚିପି ଏସବୁ କାର୍ଯ୍ୟାଳୟର ଭିତ୍ତିପ୍ରସ୍ତର ସ୍ଥାପନ କରିଛନ୍ତି।
ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, ପବିତ୍ର ଦୀପାବଳିର ଅବ୍ୟବହିତ ପୂର୍ବରୁ ଆମ ସରକାର ଗ୍ରାମୀଣ ବିକାଶର ଏକ ନୂଆ ଅଧ୍ୟାୟ ଆରମ୍ଭ କରିଛି। ଆଜି ନିଆଯାଇଥିବା ପଦକ୍ଷେପଗୁଡ଼ିକ ସମୃଦ୍ଧ ଓଡ଼ିଶା ଗଠନ ପାଇଁ ଆମର ଦୃଢ଼ ସଂକଳ୍ପ ଓ ପ୍ରତିବଦ୍ଧତାର ନିଦର୍ଶନ। ଆମେ ଦେଖିଥିବା ବିକଶିତ ଓଡ଼ିଶାର ସ୍ୱପ୍ନର ମୂଳଦୁଆ ଆମ ଗାଁରେ ହିଁ ରହିଛି। ସେଥିପାଇଁ ଆଜି ଏକାସାଙ୍ଗରେ ୪୭୧ଟି ନୂତନ ଗ୍ରାମପଞ୍ଚାୟତ କାର୍ଯ୍ୟାଳୟର ଭିତ୍ତିପ୍ରସ୍ତର ସ୍ଥାପନ କରାଯାଇଛି। ଏହି କାର୍ଯ୍ୟାଳୟଗୁଡିକ ଆମ ଗ୍ରାମୀଣ ଜନସାଧାରଣଙ୍କୁ ସେବା ଯୋଗାଇବାର ‘ନୂଆ ମନ୍ଦିର’ ହେବ। ଏହି ‘ଓ୍ଵାନ୍ ଷ୍ଟପ୍ ସର୍ଭିସ୍ ସେଣ୍ଟର’ରେ ନାଗରିକଙ୍କୁ ସମ୍ମାନ, ସୁବିଧା ଓ ସମାଧାନ ଏକାସାଙ୍ଗରେ ମିଳିବ।
