ଭୁବନେଶ୍ୱର : ପ୍ରଶାନ୍ତି ବିହାର ସ୍ଥିତ ବିଜୁ ପଟ୍ଟନାୟକ ସ୍ମାରକୀ ସରକାରୀ ଉଚ୍ଚ ବିଦ୍ୟାଳୟ ପରିସରରେ ଏକ ହୃଦୟସ୍ପର୍ଶୀ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି। “ଆଧ୍ୟାତ୍ମିକ ଜୀବନଯାପନ: ଶାନ୍ତି ଓ ନିରାମୟର ମୂଳ ଉତ୍ସ” ଶୀର୍ଷକ ଏହି କାର୍ଯ୍ୟକ୍ରମରେ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ଶ୍ରୀମତୀ ଜ୍ୟୋତ୍ସ୍ନାମୟୀ ସ୍ୱାଇଁ ସଭାପତିତ୍ୱ କରିଥିଲେ। ଏହି ଅବସରରେ ଶ୍ରୀମତୀ ସ୍ୱାଇଁ ଶିକ୍ଷାର୍ଥୀମାନଙ୍କୁ ଆଧ୍ୟାତ୍ମିକ ଜୀବନର ମହତ୍ତ୍ୱ ବୁଝାଇବା ସହ ଏହା କିପରି ଏକ ଶାନ୍ତିପୂର୍ଣ୍ଣ ଓ ସୁସ୍ଥ ଜୀବନ ପାଇଁ ମାର୍ଗଦର୍ଶନ କରେ ତାହା ବର୍ଣ୍ଣନା କରିଥିଲେ।
ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ଯୋଗଦେଇଥିଲେ ବିଶିଷ୍ଟ ସମାଜସେବୀ ଓ ଶିକ୍ଷାବିତ୍ ପ୍ରବାଳ କାନ୍ତି ମହାପାତ୍ର। ସେ ନିଜ ବକ୍ତବ୍ୟରେ ମହାଭାରତ ଓ ରାମାୟଣର ବିଭିନ୍ନ ଉଦାହରଣ ମାଧ୍ୟମରେ ଆଧ୍ୟାତ୍ମିକ ଜୀବନଯାପନ କିପରି ଶାନ୍ତି, ଆନନ୍ଦ ଓ ନିରାମୟ ଆଣିଥାଏ ତାହା ଅତ୍ୟନ୍ତ ସୁନ୍ଦର ଭାବରେ ବର୍ଣ୍ଣନା କରିଥିଲେ। ତାଙ୍କର ମାର୍ମିକ ବକ୍ତବ୍ୟ ଉପସ୍ଥିତ ସମସ୍ତଙ୍କୁ ଭାବବିହ୍ୱଳ କରିଥିଲା ଏବଂ ଆଧ୍ୟାତ୍ମିକତା ପ୍ରତି ଏକ ନୂତନ ଦୃଷ୍ଟିକୋଣ ପ୍ରଦାନ କରିଥିଲା।
ମୁଖ୍ୟବକ୍ତା ଓ ଆଲୋଚକ ଭାବରେ ଯୋଗଦେଇଥିଲେ ପ୍ରକାଶକ ତଥା ସାରସ୍ୱତ ସଂଗଠକ ଶ୍ରୀ ରମାକାନ୍ତ ମିଶ୍ର। ସେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଜୀବନାଦର୍ଶ ଉପରେ ଆଲୋକପାତ କରିଥିଲେ ଏବଂ ତାଙ୍କ ଜୀବନୀରୁ ଶିକ୍ଷା ଗ୍ରହଣ କରିବାକୁ ଛାତ୍ରଛାତ୍ରୀମାନଙ୍କୁ ଉପଦେଶ ଦେଇଥିଲେ। ଏଥିସହ, ସେ ଗୀତା ଓ ଭାଗବତର ଉଦାହରଣ ଦେଇ କହିଥିଲେ ଯେ ପିତାମାତା, ଶିକ୍ଷକ ଓ ଅତିଥିମାନଙ୍କ ପ୍ରତି ଭକ୍ତି ଓ ସମ୍ମାନ ପ୍ରଦର୍ଶନ କଲେ ପ୍ରତିଟି ଜୀବନ କିପରି ଆଶୀର୍ବାଦ ପ୍ରାପ୍ତ ହୋଇ ସଫଳତା ଲାଭ କରିଥାଏ। ସେ ଛାତ୍ରଛାତ୍ରୀମାନଙ୍କୁ ପ୍ରତ୍ୟହ ଗୀତା ଓ ଭାଗବତ ପାଠ କରିବାକୁ ମଧ୍ୟ ଉପଦେଶ ଦେଇଥିଲେ।
ଏହି ଅବସରରେ, ଶ୍ରୀ ମିଶ୍ର ସ୍ୱତନ୍ତ୍ର ଉତ୍କଳ ପ୍ରଦେଶ ଗଠନରେ ଅବଦାନ କରିଥିବା ମହାନ ନେତୃବୃନ୍ଦଙ୍କୁ ସ୍ମରଣ କରିଥିଲେ। ସେ ଉତ୍କଳ ଗୌରବ ମଧୁସୂଦନ, ଉତ୍କଳମଣି ଗୋପବନ୍ଧୁ, ମହାରାଜା କୃଷ୍ଣଚନ୍ଦ୍ର ଗଜପତି, ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ, ବ୍ୟାସକବି ଫକୀରମୋହନ, କବିବର ରାଧାନାଥ, ଭକ୍ତକବି ମଧୁସୂଦନ, ସ୍ୱଭାବକବି ଗଙ୍ଗାଧର ଆଦି ମହାନ ବ୍ୟକ୍ତିତ୍ୱମାନଙ୍କର ଅବଦାନ ସମ୍ପର୍କରେ ସମ୍ୟକ୍ ଆଲୋକପାତ କରିଥିଲେ। ତାଙ୍କର ଏହି ବକ୍ତବ୍ୟ ଛାତ୍ରଛାତ୍ରୀମାନଙ୍କ ମନରେ ଦେଶପ୍ରେମ ଓ ଇତିହାସ ପ୍ରତି ଆଗ୍ରହ ସୃଷ୍ଟି କରିଥିଲା।
ଅନ୍ୟତମ ସମ୍ମାନିତ ଅତିଥି ଶ୍ରୀ କୈଳାସ ଚନ୍ଦ୍ର ରଥ ତାଙ୍କ ବକ୍ତବ୍ୟରେ ଛାତ୍ରଛାତ୍ରୀମାନଙ୍କୁ “ଭଲ ପିଲା ହେବାକୁ” ପ୍ରେରଣା ଦେଇଥିଲେ। କ୍ରୀଡ଼ା ଶିକ୍ଷକ ଶ୍ରୀ ଘନଶ୍ୟାମ ହୋତା ସ୍ୱାଗତ ଭାଷଣ ପ୍ରଦାନ କରିବା ସହ ଅତିଥି ପରିଚୟ ପ୍ରଦାନ କରିଥିଲେ। ଶେଷରେ, ବରିଷ୍ଠ ଶିକ୍ଷୟିତ୍ରୀ ଶ୍ରୀମତୀ ଭାରତୀ ତ୍ରିପାଠୀ ଧନ୍ୟବାଦ ଅର୍ପଣ କରିଥିଲେ।
ଏହି ଆଲୋଚନାଚକ୍ର ଶିକ୍ଷାର୍ଥୀ ତଥା ଉପସ୍ଥିତ ସମସ୍ତ ବ୍ୟକ୍ତିଙ୍କ ମନରେ ଆଧ୍ୟାତ୍ମିକତା, ନୈତିକତା ଓ ମୂଲ୍ୟବୋଧ ପ୍ରତି ଏକ ସକାରାତ୍ମକ ଭାବନା ସୃଷ୍ଟି କରିଥିଲା। ଏହିପରି କାର୍ଯ୍ୟକ୍ରମ ଶିକ୍ଷା କ୍ଷେତ୍ରରେ ଗୁଣାତ୍ମକ ମାନ ବୃଦ୍ଧି କରିବା ସହ ଛାତ୍ରଛାତ୍ରୀମାନଙ୍କୁ ଉତ୍ତମ ନାଗରିକ ଭାବରେ ଗଢ଼ି ତୋଳିବାରେ ସହାୟକ ହେବ।
