ନୂଆଦିଲ୍ଲୀ,୧୯।୬: ବୈଦେଶିକ ମନ୍ତ୍ରଣାଳୟ (ଏମଇଏ) ଗୁରୁବାର ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ସଂଘର୍ଷ ପରେ ଉତ୍ତେଜନା ବୃଦ୍ଧି ପାଇବାରୁ ‘ଅପରେସନ ସିନ୍ଧୁ’ ଅଧୀନରେ ଇସ୍ରାଏଲରୁ ଭାରତୀୟ ନାଗରିକମାନଙ୍କୁ ଉଦ୍ଧାର କରିବା ପାଇଁ ଯୋଜନା ଘୋଷଣା କରିଛି।
ଏକ ବିବୃତିରେ, ଏମଇଏ କହିଛି ଯେ ବର୍ତ୍ତମାନ ଇସ୍ରାଏଲରେ ଥିବା ଏବଂ ଘରକୁ ଫେରିବାକୁ ଇଚ୍ଛୁକ ଭାରତୀୟ ନାଗରିକମାନଙ୍କୁ ତେଲ ଆବିବରେ ଥିବା ଭାରତୀୟ ଦୂତାବାସ ସହାୟତା କରିବ। ମନ୍ତ୍ରଣାଳୟ ସେମାନଙ୍କ ସୁରକ୍ଷା ନିଶ୍ଚିତ କରିବା ପାଇଁ ସମସ୍ତ ଆବଶ୍ୟକୀୟ ବ୍ୟବସ୍ଥା କରାଯାଉଛି ବୋଲି ଆଶ୍ୱାସନା ଦେଇଛି।
ଏମଇଏ କହିଛି, “ତେଲ ଆବିବରେ ଥିବା ଭାରତୀୟ ଦୂତାବାସ ଭାରତୀୟମାନଙ୍କୁ ଉଦ୍ଧାର କରିବା ପାଇଁ ବ୍ୟବସ୍ଥା କରିବ। ସମସ୍ତ ଭାରତୀୟ ନାଗରିକଙ୍କୁ ଅନୁରୋଧ କରାଯାଉଛି ଯେ ଯଦି ସେମାନେ ପୂର୍ବରୁ ନାମ ପଞ୍ଜିକରଣ କରି ନାହାନ୍ତି, ତେବେ ତେଲ ଆବିବରେ ଥିବା ଭାରତୀୟ ଦୂତାବାସରେ ନିଜକୁ ପଞ୍ଜିକରଣ କରନ୍ତୁ (https://www.indembassyisrael.gov.in/indian_national_reg)।
ଆହୁରି କୁହାଯାଇଛି ଯେ, “କୌଣସି ପ୍ରଶ୍ନ ଥାଏ, ସେମାନେ ତେଲ ଆବିବରେ ଥିବା ଭାରତୀୟ ଦୂତାବାସରେ ଥିବା ୨୪/୭ ନିୟନ୍ତ୍ରଣ କକ୍ଷ ସହିତ ଯୋଗାଯୋଗ କରିପାରିବେ: ଟେଲିଫୋନ ନମ୍ବର: +୯୭୨ ୫୪-୭୫୨୦୭୧୧; +୯୭୨ ୫୪-୩୨୭୮୩୯୨; ଇମେଲ: cons1.telaviv@mea.gov.in।”
ଇସ୍ରାଏଲରେ ଥିବା ଭାରତୀୟ ଦୂତାବାସ ମଧ୍ୟ ପୂର୍ବରୁ ଜାରି କରିଥିବା ଚେତାବନୀକୁ ପୁନର୍ବାର ଦୋହରାଇଛି, ଦେଶରେ ଥିବା ସମସ୍ତ ଭାରତୀୟ ନାଗରିକଙ୍କୁ ସତର୍କ ରହିବାକୁ ଏବଂ ଇସ୍ରାଏଲୀୟ କର୍ତ୍ତୃପକ୍ଷ ଦ୍ୱାରା ଜାରି ସୁରକ୍ଷା ନିର୍ଦ୍ଦେଶାବଳୀକୁ କଡ଼ାକଡ଼ି ପାଳନ କରିବାକୁ ଅନୁରୋଧ କରିଛି।
ଏମଇଏ କହିଛି, “ଭାରତ ସରକାର ବିଦେଶରେ ଥିବା ଭାରତୀୟ ନାଗରିକମାନଙ୍କ ସୁରକ୍ଷା ଏବଂ ନିରାପତ୍ତାକୁ ସର୍ବୋଚ୍ଚ ଅଗ୍ରାଧିକାର ଦେଇଥାଏ। ସରକାର ପରିସ୍ଥିତିକୁ ନିରନ୍ତର ନୀରିକ୍ଷଣ କରିବେ। ଦୂତାବାସ ସମୁଦାୟ ସହିତ ନିରନ୍ତର ସମ୍ପର୍କରେ ରହି ସମସ୍ତ ସମ୍ଭାବ୍ୟ ସହାୟତା ପ୍ରଦାନ କରିବ।”
ଗୁରୁବାର ପୂର୍ବରୁ, ଉତ୍ତର ଇରାନରୁ ‘ଅପରେସନ ସିନ୍ଧୁ’ ଅଧୀନରେ ୧୧୦ ଛାତ୍ରଙ୍କୁ ଉଦ୍ଧାର କରାଯାଇ ଭାରତକୁ ଆଣିଛି। ଗତ ସପ୍ତାହରେ ଶତ୍ରୁତା ଆରମ୍ଭ ହେବା ପରେ ଇସ୍ରାଏଲ ଏବଂ ଇରାନ ପରସ୍ପର ସଦ୍ଦରେ ଶହେରୁ ଅଧୁକ ମିସାଇଲ ଏବଂ ଡ୍ରୋନ ଦ୍ୱାରା ସୈନ୍ୟ ଏବଂ ନ୍ୟୁକ୍ଲିୟର କ୍ୟାମ୍ପ ଉପରେ ଆକ୍ରମଣ କରିଛନ୍ତି।
