ଅହମ୍ମଦାବାଦ୍: ଗୁରୁବାର ଦିନ ଅହମ୍ମଦାବାଦରେ ଘଟିଥିବା ଏୟାର ଇଣ୍ଡିଆ ବିମାନ ଦୁର୍ଘଟଣାରେ ଅତି କମରେ ୨୫୦ରୁ ଉର୍ଧ୍ବ ଲୋକଙ୍କର ମୃତ୍ୟୁ ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପରିସ୍ଥିତିର ସମୀକ୍ଷା କରିବା ପାଇଁ ଅହମ୍ମଦାବାଦ ଗସ୍ତ କରିଛନ୍ତି। ମୋଦୀ ଅହମ୍ମଦାବାଦ୍ରେ ପହଞ୍ଚି ଦୁର୍ଘଟଣାଗ୍ରସ୍ତ ସ୍ଥାନ ପରିଦର୍ଶନ କରିବା ପରେ ଆହତମାନଙ୍କୁ ଭେଟିବା ପାଇଁ ହସ୍ପିଟାଲ୍କୁ ଯାଇଥିଲେ। ଏହି ଦୁର୍ଘଟଣାରେ ଯେଉଁଠାରେ ୨୬୫ ଜଣଙ୍କ ଜୀବନ ଚାଲିଯାଇଥିଲା, ସେଠାରେ ଚମତ୍କାର ଭାବେ ବଞ୍ଚିଥିବା ବିମାନରେ ଯାତ୍ରା କରୁଥିବା ରମେଶ ବିଶ୍ୱାସ କୁମାରଙ୍କୁ ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭେଟି ତାଙ୍କର ସ୍ୱାସ୍ଥ୍ୟାବସ୍ଥା ବିଷୟରେ ପଚାରିଥିଲେ।
ହସ୍ପିଟାଲ ବେଡ୍ରେ ଶୋଇଥିବା ବିଶ୍ୱାସ କୁମାର ଏକ ନ୍ୟୁଜ୍ ଚ୍ୟାନେଲକୁ ନିଜର ଅନୁଭବ ବର୍ଣ୍ଣନା କରିଥିଲେ। ସେ କହିଥିଲେ ଯେ ବିମାନଟି ରନୱେରେ ଗତି ବଢ଼ାଇବା ଆରମ୍ଭ କରିବା ମାତ୍ରେ କିଛି ଅଜଣା ଅନୁଭବ ହୋଇଥିଲା। ହଠାତ୍ ୫-୧୦ ସେକେଣ୍ଡ ପାଇଁ ସବୁକିଛି ଯେପରି ଅଟକି ଯାଇଥିଲା। କେବଳ ନୀରବତା…, ତା’ପରେ ହଠାତ୍ ସବୁଜ ଏବଂ ଧଳା ଲାଇଟ୍ଗୁଡ଼ିକ ଜଳି ଉଠିଥିଲା। ଲାଗୁଥିଲା ଯେପରି ପାଇଲଟ ଟେକଅଫ ପାଇଁ ପୂରା ଶକ୍ତି ଲଗାଇଥିଲେ। ତା’ପରେ କ’ଣ ହେଲା, ସେହି ଗତି ସହିତ ବିମାନଟି ସିଧାସଳଖ ହଷ୍ଟେଲ ବିଲ୍ଡିଂରେ ପଶି ଯାଇଥିଲା।
ବିଶ୍ୱାସ କହିଥିଲେ ଯେ, ମୋର ସିଟ୍ ବିମାନର ଯେଉଁ ଭାଗରେ ଥିଲା, ତାହା ବିଲ୍ଡିଂର ନିମ୍ନ ଭାଗ ସହ ଧକ୍କା ଖାଇଥିବ। ଉପର ଭାଗରେ ନିଆଁ ଲାଗି ଯାଇଥିଲା, ଅନେକ ଲୋକ ସେଠାରେ ଫସି ରହିଥିଲେ। ସମ୍ଭବତଃ ମୁଁ ସିଟ୍ ସହିତ ତଳକୁ ଖସି ପଡ଼ିଥିଲି। ମୁଁ କୌଣସି ପ୍ରକାରେ ବାହାରି ପାରିଥିଲି। ଦ୍ୱାରଟି ଭାଙ୍ଗି ଯାଇଥିଲା, ଆଗରେ କିଛି ଖାଲି ଜାଗାରେ ଦେଖା ଯାଇଥିଲା, ତେଣୁ ବାହାରିବାକୁ ଚେଷ୍ଟା କରିଥିଲି। ସେ କହିଛନ୍ତି ଯେ ଅନ୍ୟ ପାର୍ଶ୍ୱରେ ଏକ କାନ୍ଥ ଥିଲା, ସେଠାରୁ ବୋଧହୁଏ କେହି ବାହାରି ପାରିନଥିଲେ। ରମେଶ ବିଶ୍ୱାସ କହିଥିଲେ ଯେ ତାଙ୍କ ଆଖି ଆଗରେ ଦୁଇଜଣ ଏୟାର ହୋଷ୍ଟେସ, ଜଣେ ମାମୁଁ-ମାଉସୀ ଏବଂ ସବୁକିଛି ଜଳୁଥିବା ଦେଖିଥିଲେ। ଏହି ଦୁର୍ଘଟଣାରେ ବିଶ୍ୱାସଙ୍କର ବାମ ହାତ ପୋଡ଼ି ଯାଇଥିଲା, କିନ୍ତୁ ଜୀବନ ବଞ୍ଚି ଯାଇଥିଲା। ସେ କହିଛନ୍ତି ଯେ ବାହାରକୁ ଆସିବା ମାତ୍ରେ ନିଆଁ ବ୍ୟାପି ଯାଇଥିଲା। ଯଦି କିଛି ସେକେଣ୍ଡ ବିଳମ୍ବ ହୋଇଥାନ୍ତା, ତେବେ ବୋଧହୁଏ… ବଂଚି ପାରି ନଥାନ୍ତେ।”
ଇଣ୍ଡିଆନ୍ ମେଡିକାଲ ଆସୋସିଏସନ୍ ଗୁଜରାଟ ତିନି ଜଣ ଏମବିବିଏସ ଛାତ୍ରଙ୍କ ମୃତ୍ୟୁର ନିଶ୍ଚିତ କରିଛି ଏବଂ ଏହି ଘଟଣା ପରେ ଅନ୍ୟ ୪୫ ଜଣଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ଘଟଣାରେ ଦୁଃଖ ପ୍ରକାଶ କରି କହିଛନ୍ତି ଯେ ସେ “ସ୍ତବ୍ଧ ଏବଂ ଦୁଃଖିତ”। ପରବର୍ତ୍ତୀ ସମୟରେ ସେ ଅହମ୍ମଦାବାଦ୍ ବିମାନବନ୍ଦରରେ ଏକ ବୈଠକ ଡାକିଛନ୍ତି।
ଗୁରୁବାର ଘଟିଥିବା ଏୟାର ଇଣ୍ଡିଆ ବିମାନ ଦୁର୍ଘଟଣାକୁ ଦୃଷ୍ଟିରେ ରଖି ଅହମଦାବାଦର ସର୍ଦ୍ଦାର ବଲ୍ଲଭଭାଇ ପଟେଲ ବିମାନବନ୍ଦର ଏହାର ଯାତ୍ରୀମାନଙ୍କ ପାଇଁ ଏକ ପରାମର୍ଶ ଜାରି କରିଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅହମ୍ମଦାବାଦ ବିମାନ ଦୁର୍ଘଟଣା ସ୍ଥଳ ପରିଦର୍ଶନ କରିବା ଏବଂ ବଞ୍ଚିଥିବା ଲୋକମାନଙ୍କୁ ଭେଟିବା ପରେ ଏକ୍ସରେ ଏକ ପୋଷ୍ଟ କରିଛନ୍ତି।
‘‘ଅହମ୍ମଦାବାଦରେ ହୋଇଥିବା ବିମାନ ଦୁର୍ଘଟଣାରେ ଆମେ ସମସ୍ତେ ମର୍ମାହତ। ଏତେ ହଠାତ୍ ଏବଂ ହୃଦୟ ବିଦାରକ ଭାବରେ ଏତେ ଲୋକଙ୍କ ଜୀବନ ଚାଲିଯିବା ଶବ୍ଦ ବାହାରେ। ସମସ୍ତ ଶୋକସନ୍ତପ୍ତ ପରିବାର ପ୍ରତି ସମବେଦନା। ଆମେ ସେମାନଙ୍କର ଯନ୍ତ୍ରଣା ବୁଝିପାରୁଛୁ ଏବଂ ଏହା ମଧ୍ୟ ଜାଣୁ ଯେ ସେମାନଙ୍କ ଅଭାବ ଆଗାମୀ ବର୍ଷ ବର୍ଷ ଧରି ଅନୁଭୂତ ହେବ’’ ବୋଲି ମୋଦୀ ଲେଖିଛନ୍ତି।
