ତାଇପେଇ: ଚୀନ୍ ଦୀର୍ଘ ଦିନ ଧରି ତାଇୱାନକୁ ତା’ର ବିଶାଳ ନୌସେନା, ବାୟୁସେନା ଏବଂ ସେନା ବ୍ୟବହାର କରି ଭୟଭୀତ କରିବାକୁ ଚେଷ୍ଟା କରିଆସୁଛି । କିନ୍ତୁ ଏବେ ଚୀନର ଆଉ ଏକ ପଦକ୍ଷେପ ତାଇଓ୍ବାନ ପାଇଁ ଚିନ୍ତାର କାରଣ ହୋଇଛି । ତାହା ହେଉଛି ଚୀନ ଦ୍ବାରା ପଠାଯାଉଥିବା ଛୋଟ ଛୋଟ ଡଙ୍ଗା ।
ତାଇୱାନ ତଟରକ୍ଷୀ ବାହିନୀର ଉପ-ମହାନିର୍ଦ୍ଦେଶକ ସିହ ଚିଙ୍ଗ-ଚିନଙ୍କ ଅନୁସାରେ, ତଟରକ୍ଷୀ ବାହିନୀ ୧୬୦ କିଲୋମିଟର (୧୦୦ ମାଇଲ) ବିସ୍ତୃତ ତାଇୱାନ ପ୍ରଣାଳୀ ପାର କରିଥିବା ମୋଟ ୩୮ ଜଣ ଚୀନ୍ ନାଗରିକଙ୍କ ବିରୋଧରେ ମାମଲା ଦାଏର କରିଛି। ଏହି ତାଇଓ୍ବାନ ପ୍ରଣାଳୀ ସ୍ୱଶାସିତ ଗଣତାନ୍ତ୍ରିକ ଦ୍ୱୀପକୁ ସ୍ୱେଚ୍ଛାଚାରୀ ଚୀନ୍ ମୁଖ୍ୟଭୂମିରୁ ପୃଥକ କରେ।
ଗୋଟିଏ ମାମଲାରେ, ଟିକଟକର ଚୀନ୍ ସଂସ୍କରଣ, ଡୁଇନରେ ପୋଷ୍ଟ କରାଯାଇଥିବା ଏକ ଭିଡିଓରେ ଜଣେ ବ୍ୟକ୍ତି ଚୀନ୍ ଭାଷାରେ କଥା ହେଉଥିବା ଏବଂ ତାଇୱାନିଜ୍ ବେଳାଭୂମିରେ ଏକ ଚୀନ୍ ପତାକା ଲଗାଉଥିବାର ଦେଖାଯାଇଛି। ପୃଷ୍ଠଭୂମିର ଦୃଶ୍ୟ ରାଜଧାନୀ ତାଇପେର ଦକ୍ଷିଣରେ ଥିବା ଉପକୂଳର ଏକ ଅଂଶ ଦେଖାଯାଉଥିବା ପରି ମନେ ହେଉଛି।
ଟିକଟକରେ ଦେଖାଯାଇଥିବା ବ୍ୟକ୍ତି ଧରାଯାଇନାହିଁ, କିମ୍ବା ତାଙ୍କର ପରିଚୟ ସାର୍ବଜନୀନ କରାଯାଇନାହିଁ। ତାଇୱାନ କର୍ତ୍ତୃପକ୍ଷ ତାଙ୍କୁ ଦ୍ୱୀପର କାହାଠାରୁ ସାହାଯ୍ୟ ମିଳିଛି କି ନାହିଁ ତାହା ନିର୍ଣ୍ଣୟ କରିବାକୁ ଚେଷ୍ଟା କରୁଛନ୍ତି। ସୂଚନାଯୋଗ୍ୟ ଯେ, ଚୀନ୍ ତାଇୱାନକୁ ନିଜର ଅଞ୍ଚଳ ବୋଲି ମାନିଥାଏ ଏବଂ ଦାବି କରେ ଯେ ଆବଶ୍ୟକ ହେଲେ ସେ ବଳପ୍ରୟୋଗ କରି ଏହାକୁ ଦଖଲ କରିପାରିବ। ତେବେ ତାଇଓ୍ବାନ ନିଜକୁ ସ୍ବାଧୀନ ଅଂଚଳ ବୋଲି କହିଥାଏ ।
