କିବ୍: ରବିବାର ପ୍ରତ୍ୟୁଷରେ ରୁଷ ୟୁକ୍ରେନ ଉପରେ ଏପର୍ଯ୍ୟନ୍ତର ସବୁଠାରୁ ବଡ଼ ଏବଂ ଆକ୍ରମଣାତ୍ମକ ଡ୍ରୋନ୍ ଆକ୍ରମଣ କରିଛି। ଏହି ଆକ୍ରମଣ ଡ୍ନିପ୍ରୋପେଟ୍ରୋଭସ୍କ ଏବଂ ଡୋନେସ୍କ ଅଞ୍ଚଳକୁ ଦୋହଲାଇ ଦେଇଥିଲା। ଏହି ଆକ୍ରମଣ ୟୁକ୍ରେନର ପ୍ରତିରକ୍ଷା ବ୍ୟବସ୍ଥା ପାଇଁ ସମସ୍ୟା ସୃଷ୍ଟି କରିଥିଲା ଏବଂ ସାଧାରଣ ନାଗରିକଙ୍କ ମଧ୍ୟରେ ଆତଙ୍କ ସୃଷ୍ଟି କରିଥିଲା। ଏହି ସମୟରେ, ରୁଷ ରାଷ୍ଟ୍ରପତି ପୁଟିନ କହିଛନ୍ତି ଯେ ସେ ୟୁକ୍ରେନରେ ‘ସଂଘର୍ଷର କାରଣଗୁଡ଼ିକୁ ଦୂର କରିବାକୁ’ ଏବଂ ରୁଷର ସୁରକ୍ଷା ସୁନିଶ୍ଚିତ କରିବାକୁ ଚାହାଁନ୍ତି। ୟୁକ୍ରେନର ବାୟୁସେନା ପ୍ରକାଶ କରିଛି ଯେ ରୁଷ ରାତାରାତି ମୋଟ ୨୭୩ଟି ବିସ୍ଫୋରକ ଡ୍ରୋନ୍ ଏବଂ ଡିକଏ ମାଡ଼ କରିଛି, ଯାହା ଯୁଦ୍ଧ ଆରମ୍ଭ ହେବା ପରଠାରୁ ଗୋଟିଏ ରାତିରେ ସବୁଠାରୁ ବଡ଼ ଡ୍ରୋନ୍ ଆକ୍ରମଣ। ଏଥିମଧ୍ୟରୁ ୮୮ଟି ଡ୍ରୋନକୁ ୟୁକ୍ରେନୀୟ ପ୍ରତିରକ୍ଷା ବାହିନୀ ଗୁଳି କରି ଖସାଇ ଦେଇଥିଲା, ଯେତେବେଳେ ଅନ୍ୟ ୧୨୮ଟି ଇଲେକ୍ଟ୍ରୋନିକ୍ ଜାମିଂ ଯୋଗୁଁ ନିଖୋଜ ହୋଇଯାଇଥିଲା।
ଆକ୍ରମଣରେ ବ୍ୟବହୃତ ଡ୍ରୋନ ସଂଖ୍ୟା ରୁଷର ପୂର୍ବ ବୃହତ୍ତମ ଡ୍ରୋନ ଆକ୍ରମଣ ରେକର୍ଡକୁ ମଧ୍ୟ ଅତିକ୍ରମ କରିଛି। ଯୁଦ୍ଧ ଆରମ୍ଭର ତୃତୀୟ ବାର୍ଷିକୀ ପୂର୍ବରୁ ରୁଷ ୟୁକ୍ରେନ ଉପରେ ୨୬୭ ଡ୍ରୋନ ମାଡ କରିଥିଲା। କିଭ୍ ଅଞ୍ଚଳର ରାଜ୍ୟପାଳ ମାଇକୋଲା କାଲାଶ୍ନିକ୍ କହିଛନ୍ତି ଯେ ଆକ୍ରମଣରେ ଜଣେ ୨୮ ବର୍ଷୀୟା ମହିଳାଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ତିନି ଜଣ ଆହତ ହୋଇଛନ୍ତି। ଆହତମାନଙ୍କ ମଧ୍ୟରେ ଏକ ୪ ବର୍ଷର ନିର୍ଦ୍ଦୋଷ ଶିଶୁ ମଧ୍ୟ ରହିଛି। ଏହି ଆକ୍ରମଣ କେବଳ ୟୁକ୍ରେନର ସାମରିକ ଶକ୍ତିକୁ ଟାର୍ଗେଟ କରିନଥିଲା ବରଂ ସାଧାରଣ ନାଗରିକଙ୍କ ଜୀବନକୁ ମଧ୍ୟ ନଷ୍ଟ କରିଥିଲା।
