କଣ୍ଟାବାଞ୍ଜି: କଣ୍ଟାବାଞ୍ଜି ରେଳ ଷ୍ଟେସନ ଅଞ୍ଚଳରୁ ୮ଜଣ ଦାଦନ ଶ୍ରମିକଙ୍କ ସହ ୫ଜଣ ଶିଶୁ ସମୁଦାୟ ୧୩ ଜଣଙ୍କୁ ଉଦ୍ଧାର କରିଛି ପୁଲିସ। ଏହି ଶ୍ରମିକମାନଙ୍କୁ ଇଟାଭାଟିରେ କାର୍ଯ୍ୟ କରିବାକୁ ଆନ୍ଧ୍ରପ୍ରଦେଶ ଚାଲାଣ କରାଯିବା ସମୟରେ ପୁଲିସ ଟାସ୍କ ଫୋର୍ସ ଉଦ୍ଧାର କରିଥିଲା। ଶ୍ରମିକମାନେ ସମତା ଏକ୍ସପ୍ରେସରେ ଯିବା ଲାଗି ଅପେକ୍ଷା କରିଥିଲେ। ଶ୍ରମିକମାନଙ୍କୁ ବେଆଇନ ଭାବେ ଚାଲାଣ କରୁଥିବା ଜଣେ ସର୍ଦ୍ଦାରକୁ ପୁଲିସ ଗିରଫ କରିଛି। ସେ ହେଲେ ମୁରିବାହାଲ ଥାନା ଅନ୍ତର୍ଗତ ଇଛାପଡା ପଂଚାୟତ ସରଗୁଲ ଗାଁର ସୁଶୀଲ ବେଣ୍ଟକାର। ତାଙ୍କୁ ଗିରଫ କରି ଅପରାହ୍ଣରେ କୋର୍ଟ ଚାଲାଣ କରିଛି। ଉଦ୍ଧାର ଶ୍ରମିକମାନେ ହେଲେ ବେଲପଡା ଥାନା ଖଲିପଦର ଓ ମୁରିବାହାଲ ଥାନା ସରଗୁଲ ଗାଁର ବୋଲି ଜଣାପଡିଛି। ଏ ନେଇ ଏକ ମାମଲା(୪୧୨/୨୫) ରୁଜୁ ହୋଇଛି। ସ୍ୱତନ୍ତ୍ର ପୁଲିସ ଇନ୍ସପେକ୍ଟର ପଞ୍ଚାନନ ନେଗୀ, ସହକାରୀ ଶ୍ରମ ଅଧିକାରୀ ତୁରକେଲା ଅଜୟ ମହାକୁଡ ଏବଂ ଅନ୍ୟ ଅଧିକାରୀ ସାମିଲ ଥିଲେ।
