କାନପୁର: ଦୁଇ ମାସ ପୂର୍ବେ କାନପୁରର ଶୁଭମ ଦ୍ୱିବେଦୀ ଏକ ନୂତନ ଜୀବନ ଆରମ୍ଭ କରିଥିଲେ। ଶେରୱାନି ପିନ୍ଧି, ଘୋଡା ଚଢି, ମଞ୍ଚ ଉପରେ ନାଚିଥିଲେ ଏବଂ ନିଜ ଜୀବନସାଥୀ ଐଷ୍ଣ୍ୟାଙ୍କ ହାତ ଧରିଥିଲେ। ପ୍ରତ୍ୟେକ ମୁହୂର୍ତ୍ତ ଏକ ଉତ୍ସବ ଥିଲା। ପ୍ରତ୍ୟେକ ଫଟୋରେ ଶୁଭମ ଓ ଐଷ୍ଣ୍ୟାଙ୍କ ଖୁସି ସ୍ପଷ୍ଟ ବାରି ହୋଇପଡ଼ୁଥିଲା। କିନ୍ତୁ କିଏ ଜାଣିଥିଲା ଯେ ମାତ୍ର ଦୁଇ ମାସ ପରେ ଏହି ହସ ଲୁହର ବନ୍ୟାରେ ପରିଣତ ହେବ ଏବଂ ଶୁଭମଙ୍କ ହସୁ ହସ ମୁହଁ ଆତଙ୍କବାଦୀଙ୍କ ଗୁଳିର ଲକ୍ଷ୍ୟ ପାଲଟିବ।
ପହଲଗାମ ଆତଙ୍କବାଦୀ ଆକ୍ରମଣରେ ସହିଦ ହୋଇଥିବା କାନପୁରର ଶୁଭମ ଦ୍ୱିବେଦୀଙ୍କ ଭାଇ କହିଛନ୍ତି ଯେ, “ଶୁଭମ, ଐଷ୍ଣ୍ୟା ଭାଉଜ ଓ ଆମ ପରିବାର କଶ୍ମୀର ବୁଲିବାକୁ ଯାଇଥିଲୁ। ପରିବାରର ବାକି ଲୋକ ଅଲଗା ଥିବା ବେଳେ ଶୁଭମ ଓ ଐଷ୍ଣ୍ୟା ଭାଉଜ ମ୍ୟାଗି ଖାଇବାକୁ ଯାଇଥିଲେ। ଏହି ସମୟରେ ଆତଙ୍କବାଦୀମାନେ ଶୁଭମଙ୍କୁ କହିଥିଲେ ଯେ ଯଦି ସେ ଜଣେ ମୁସଲମାନ, ତେବେ ସେ କଲମା ପଢ଼ି ସେମାନଙ୍କୁ ଶୁଣାନ୍ତୁ। ଯେତେବେଳେ ଶୁଭମ ଏହା କରିପାରିନଥିଲେ ସେ ତାଙ୍କ ମୁଣ୍ଡକୁ ଗୁଳିମାରିଥିଲେ। ଏହା ଦେଖି ଯେତେବେଳେ ଐଷ୍ଣ୍ୟା ଭାଉଜ କହିଲେ, ମୋତେ ମଧ୍ୟ ମାରିଦିଅ। କାପୁରୁଷ ଆତଙ୍କବାଦୀମାନେ ଭାଉଜଙ୍କ ମୁଣ୍ଡରେ ବନ୍ଧୁକ ରଖି କହିଲେ ଯେ, ତୁମକୁ ମାରିବୁ ନାହିଁ। ଆମେ କ’ଣ କରିଛୁ, ତୁମର ମୋଦୀ ସରକାରଙ୍କୁ ଯାଇ କୁହ।”
ସେ ଆହୁରି କହିଛନ୍ତି ଯେ, “ଏହି ଘଟଣାର ସରକାରଙ୍କୁ ଉଚିତ ଜବାବ ଦେବା ଉଚିତ, ଯାହା ଦ୍ଵାରା ଆତଙ୍କବାଦୀମାନେ ଏପରି କାପୁରୁଷତାପୂର୍ଣ୍ଣ କାର୍ଯ୍ୟ ନକରିବେ ଏବଂ କୌଣସି ଭାରତୀୟଙ୍କ ଉପରେ ଗୁଳି ଚଳାଇବା ପୂର୍ବରୁ ୧୦୦ଥର ଚିନ୍ତା କରିବେ।”
