ଭୁବନେଶ୍ବର: ରାଜ୍ୟରେ ଆଇନଶୃଙ୍ଖଳା ପରିସ୍ଥିତି ନେଇ ସରକାରଙ୍କୁ ବିଜେଡିର ସମାଲୋଚନା। ତୀବ୍ର ସମାଲୋଚନା କରିଛନ୍ତି ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ। ସେ କହିଛନ୍ତି, ଆଇନ ଶୃଙ୍ଖଳା ସ୍ଥିତି ଆଉ ସରକାରଙ୍କ ନିୟନ୍ତ୍ରଣରେ ନାହିଁ। ସରକାର ଏଥିରେ ବିଫଳ ହୋଇଛନ୍ତି। ରାଜଧାନୀ ସମେତ ସାରା ରାଜ୍ୟରେ ଆଇନଶୃଙ୍ଖଳା ଭୁଶୁଡିପଡିଛି।
ବିଧାନସଭା ଭିତରେ ଆଉ ବାହାରେ ଶକ୍ତି ଦେଖାଉଛନ୍ତି ପୁଲିସ। ହେଲେ ବାହାରେ ଫେଲ୍ ମାରୁଛି। ଭୁବନେଶ୍ୱର ଭରତପୁର ଓ ଗଂଜାମ କବିସୂର୍ଯ୍ୟନଗର ଘଟଣା ଏହା ପ୍ରମାଣିତ କରୁଛି। ପ୍ରତି କଥାରେ ରାଜନୈତିକ ହସ୍ତକ୍ଷେପ ରହୁଛି। ସରକାରୀ ଦଳର ସାଧାରଣ କର୍ମୀ ପୁଲିସ କାମରେ ହସ୍ତକ୍ଷେପ କରୁଛନ୍ତି। ପୁଲିସ ସ୍ୱାଧୀନ ଭାବେ କାମ ନ କଲେ ଅପରାଧ ବଢିଚାଲିବ। ସରକାରୀ ଦଳ ନିଜଆଡୁ ଦେଖିବା କଥା ଯେ ପୁଲିସ ଉପରେ ଚାପ ନ ପକାନ୍ତୁ।
ପୁଲିସ ବି ଅପରାଧରେ ସମ୍ପୃକ୍ତ ରହୁଥିବା ରିପୋର୍ଟ ଆସୁଛି। ଯାହାର ପ୍ରଭାବ ସାଧାରଣ ଲୋକଙ୍କ ଉପରେ ପଡୁଛି। ତେଣୁ ଲୋକ ଅପରାଧ କରୁଛନ୍ତି। ବିଜେପି ବହୁ କଷ୍ଟରେ ଶାସନକୁ ଆସିଛି। ସେମାନେ ନିଜ କର୍ମୀଙ୍କୁ ପୁଲିସ ଉପରେ ହସ୍ତକ୍ଷେପ କରିବା ଉପରୁ ନିବୃତ ରଖିବା କଥା। ନହେଲେ ଆଗକୁ ସ୍ଥିତି ଆହୁରି ବିଗିଡିଯିବ ବୋଲି କହିଛନ୍ତି ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ୟ୍ୟ ।
