ନୂଆଦିଲ୍ଲୀ: ଦିଲ୍ଲୀ ବିଧାନସଭାରେ ଗତକାଲି ସିଏଜି ରିପୋର୍ଟ ଉପସ୍ଥାନ କରାଯାଇଥିଲା | ଅବକାରୀ ନୀତି ଉପରେ ଉପସ୍ଥାପନ ହୋଇଥିବା ସିଏଜି ରିପୋର୍ଟରୁ ଜଣାପଡ଼ିଥିଲା ଯେ ପୂର୍ବତନ ଆପ୍ ସରକାରଙ୍କ ଅବକାରୀ ନୀତି ଯୋଗୁଁ ୨୦୦୨ କୋଟି ଟଙ୍କାର ରାଜସ୍ବ କ୍ଷତି ହୋଇଛି। ମୁଖ୍ୟମନ୍ତ୍ରୀ ରେଖା ଗୁପ୍ତା ଗତକାଲି ଦିଲ୍ଲୀ ବିଧାନସଭାରେ ଏହି ରିପୋର୍ଟ ଉପସ୍ଥାପନ କରିଥିଲେ। ଲାଇସେନ୍ସ ଦେବା ପ୍ରକ୍ରିୟାରେ ବି ନିୟମର ଉଲ୍ଲଂଘନ କରାଯାଇଥିବା ରିପୋର୍ଟରେ ଦର୍ଶାଯାଇଥିଲା । ଏଥିସହ ରଦ୍ଦ ହୋଇ ସାରିଥିବା ଅବକାରୀ ନୀତି ପ୍ରସ୍ତୁତି ସମୟରେ କିଛି ପରିବର୍ତ୍ତନ କରିବାପାଇଁ ବିଶେଷଜ୍ଞ କମିଟି କିଛି ପରାମର୍ଶ ଦେଇଥିଲେ ମଧ୍ୟ ତତ୍କାଳୀନ ଉପମୁଖ୍ୟମନ୍ତ୍ରୀ ଏବଂ ଅବକାରୀ ମନ୍ତ୍ରୀ ମନୀଷ ସିସୋଦିଆ ଏହାକୁ ଗ୍ରହଣ କରିନଥିଲେ ବୋଲି ରିପୋର୍ଟରେ ଦାବି ହୋଇଥିଲା ।
ଏହି ରିପୋର୍ଟକୁ ନେଇ କଂଗ୍ରେସ ନେତା ସନ୍ଦୀପ ଦୀକ୍ଷିତ କହିଥିଲେ ଯେ ଇଡି ଏବଂ ସିବିଆଇ ସିଏଜି ରିପୋର୍ଟ ଅପେକ୍ଷା ଅଧିକ ଗମ୍ଭୀର ପ୍ରସଙ୍ଗ ବାହାର କରିଛନ୍ତି। ସେ କହିଛନ୍ତି ଯେ ସିଏଜି ରିପୋର୍ଟ ମଦ ନୀତି ବିଷୟରେ ଏବଂ ଏହି ସୂଚନା ପୂର୍ବରୁ ସାଧାରଣରେ ଉପଲବ୍ଧ।
ସନ୍ଦୀପ ଦୀକ୍ଷିତ କହିଛନ୍ତି, “ରିପୋର୍ଟ ଦର୍ଶାଉଛି ଯେ କିପରି କିଛି ଲୋକଙ୍କୁ ହେରଫେର ମାଧ୍ୟମରେ ଲାଭ ମିଳିଛି, ଯେଉଁଠାରେ ସେମାନଙ୍କୁ ଦୁଇଟି ଦୋକାନ ମିଳିବା କଥା ଥିଲା, ସେମାନେ ୫୪ଟି ପାଇଲେ।” ଯେଉଁ ଅଞ୍ଚଳରେ ଲାଭ ମିଳିପାରିବ ସେଠାରେ ବଣ୍ଟନ କରାଯାଇଛି। ଇଡି ଏବଂ ସିବିଆଇ ଅଧିକ ଗମ୍ଭୀର ପ୍ରସଙ୍ଗ ଉଠାଇଥିଲେ। ନୀତି ପ୍ରଚଳନ ପୂର୍ବରୁ, ପ୍ରତ୍ୟେକ ଠିକାଦାର ଜାଣିଥିଲେ ଯେ ଏକ ନୀତି ଆସୁଛି। ସନ୍ଦୀପ ଦୀକ୍ଷିତ ଦାବି କରିଥିଲେ, “କଣ୍ଟ୍ରାକ୍ଟର, ଦକ୍ଷିଣ ଭାରତର ମଦ ମାଫିଆ ଏବଂ ଆମ ଆଦମୀ ପାର୍ଟିର ବଡ଼ ନେତାଙ୍କ ମଧ୍ୟରେ ଆଲୋଚନା ଏବଂ କାରବାର ଚୁକ୍ତିନାମା ପରେ ନୀତି ପ୍ରସ୍ତୁତ କରାଯାଇଥିଲା। ଯେତେବେଳେ ଏକ ନୀତି ଭୁଲ ଭାବରେ ପ୍ରସ୍ତୁତ ହୁଏ, ଏହାର ଅର୍ଥ ହେଉଛି ଏହାକୁ ତିଆରି କରିବାରେ ଏକ ଭିନ୍ନ ପଦ୍ଧତି ଗ୍ରହଣ କରାଯାଇଥିଲା। ଠିକାଦାର ଏବଂ ନିର୍ମାତାଙ୍କ ମଧ୍ୟରେ ସଲାସୁତୁରା ଥିଲା।
