ଇସଲାମାବାଦ: ଇସଲାମିକ ଧର୍ମଗୁରୁ ତଥା ପାକିସ୍ତାନୀ ସାଂସଦ ମୌଲାନା ଫଜଲୁର ରେହମାନ ପାକିସ୍ତାନକୁ ୧୯୭୧ ମସିହାର ବିଭାଜନ କଥା ମନେ ପକାଇ ଦେଇଛନ୍ତି, ଯେତେବେଳେ ପୂର୍ବ ପାକିସ୍ତାନ ଭାଙ୍ଗି ବାଂଲାଦେଶ ହୋଇଯାଇଥିଲା। ସେ କହିଛନ୍ତି ଯେ ବେଲୁଚିସ୍ତାନ ପାକିସ୍ତାନରୁ ଅଲଗା ହୋଇପାରେ ।
ମୌଲାନା ଫଜଲୁର ରେହମାନ ଦାବି କରିଛନ୍ତି ଯେ ବେଲୁଚିସ୍ତାନର ୫ରୁ ୭ଟି ଜିଲ୍ଲା ସ୍ୱାଧୀନତା ଘୋଷଣା କରିପାରନ୍ତି। ଭାରତ-ପାକିସ୍ତାନ ଯୁଦ୍ଧକୁ ଉଲ୍ଲେଖ କରି ସେ ଚେତାବନୀ ଦେଇଛନ୍ତି ଯେ ପୁଣି ଥରେ ସମାନ ପରିସ୍ଥିତି ଉପୁଜିପାରେ।
ସେ ପାକିସ୍ତାନର ନ୍ୟାସନାଲ ଆସେମ୍ବଲି (ଏନଏ)ରେ ପ୍ରକାଶ କରିଛନ୍ତି ଯେ ଯଦି ବେଲୁଚିସ୍ତାନର ଜିଲ୍ଲାଗୁଡ଼ିକ ସ୍ୱାଧୀନତା ଘୋଷଣା କରନ୍ତି, ତେବେ ଜାତିସଂଘ ସେମାନଙ୍କ ସ୍ୱାଧୀନତାକୁ ସ୍ୱୀକୃତି ଦେଇପାରିବ । ଏହାବ୍ୟତୀତ ସେନାକୁ ଟାର୍ଗେଟ କରି ସେ କହିଛନ୍ତି ଯେ କିଛି ଶକ୍ତିଶାଳୀ ବ୍ୟକ୍ତି ବନ୍ଦ କୋଠରୀରେ ନିଷ୍ପତ୍ତି ନିଅନ୍ତି, ଯାହାକୁ ସରକାର ଗ୍ରହଣ କରିବାକୁ ବାଧ୍ୟ ହୁଅନ୍ତି।
ପାକିସ୍ତାନର ଉତ୍ତର-ପଶ୍ଚିମ ଅଞ୍ଚଳ କୁରମରେ ପୁଣି ଥରେ ହିଂସାକାଣ୍ଡ ଘଟିଥିବା ବେଳେ ସେ ଏଭଳି ବୟାନ ଦେଇଛନ୍ତି। ଏହି ଅଞ୍ଚଳ ଦଶନ୍ଧି ଧରି ପାକିସ୍ତାନରେ ସିଆ-ସୁନ୍ନି ସଂଘର୍ଷର କେନ୍ଦ୍ରବିନ୍ଦୁ ପାଲଟିଛି। ନଭେମ୍ବରରୁ ଆରମ୍ଭ ହୋଇଥିବା ଏହି ନୂଆ ଲଢ଼େଇରେ ଏପର୍ଯ୍ୟନ୍ତ ୧୫୦ ଜଣଙ୍କ ମୃତ୍ୟୁ ଘଟିଛି। ଏହା ଆଫଗାନିସ୍ତାନ ସୀମାରେ ଥିବା ପାକିସ୍ତାନର ଏକ ପାହାଡ଼ିଆ ଅଞ୍ଚଳ । ଅତ୍ୟଧିକ ସଶସ୍ତ୍ର ଯୋଦ୍ଧାଙ୍କ ସହ ସଂଘର୍ଷ ଏହାକୁ ଦୁନିଆରୁ ପ୍ରାୟ ବିଚ୍ଛିନ୍ନ କରିଦେଇଛି। ବାରମ୍ବାର ଅସ୍ତ୍ରବିରତି ପାଇଁ ଉଦ୍ୟମ କରାଯାଇଥିଲେ ମଧ୍ୟ ହିଂସା କମିନାହିଁ।
